မန္တလေးတွင်  ရပ်ကွက်အုပ်ချုပ်ရေးမှူးတစ်ဦး သေနတ်ဖြင့် ပစ်သတ်ခံရ

မန္တလေးတွင် ရပ်ကွက်အုပ်ချုပ်ရေးမှူးတစ်ဦး သေနတ်ဖြင့် ပစ်သတ်ခံရ

မန္တလေးမြို့၊ ချမ်းအေးသာစံမြို့နယ်၊ ရွှေလှံဗိုလ်ရပ်ကွက်အုပ်ချုပ်ရေးမှူး ဦးအောင်ဆွေထွန်းမှာ ယနေ့(ဩဂုတ် ၁၈) နံနက် ၁၁ နာရီခွဲခန့်တွင် သေနတ်သမားနှစ်ဦးက လာရောက်ပစ်ခတ်သဖြင့် ဦးခေါင်းကျည်ဖောက်ဝင်ဒဏ်ရာဖြင့် ပွဲချင်းပြီး သေဆုံးသွားကြောင်း မျက်မြင်တွေ့ရှိသူတစ်ဦးက ပြောသည်။

ဦးအောင်ဆွေထွန်းမှာ ရပ်ကွက်အုပ်ချုပ်ရေးမှူးရုံးတွင် ရှိနေစဉ် လုပ်ကြံသတ်ဖြတ်ခံရခြင်းဖြစ်ကာ “ပစ်တဲ့သူတွေက ထွက်ပြေးလွတ်မြောက်သွားတယ်” ဟု မျက်မြင်တွေ့ရှိသူ အမျိုးသားက ပြောသည်။ 

အသက် ၄၇ နှစ်အရွယ် ဦးအောင်ဆွေထွန်း သေနတ်ဖြင့် ပစ်ခံရချိန်မှာ စစ်ကောင်စီက မြို့နေလူထုကို ကိုဗစ်အကြောင်းပြ၍ တင်းတင်းကျပ်ကျပ် အသွားအလာကန့်သတ်ထားသည့် နံနက် ၉ နာရီမှ ညနေ ၃ နာရီအတွင်းဖြစ်သည်။

ရွှေလှံဗိုလ်ရပ်ကွက်တွင် နေထိုင်သည့် လူငယ်အချို့ကို ပြီးခဲ့သည့် ရက်ပိုင်းအတွင်း စစ်ကောင်စီက ဖမ်းဆီးခဲ့ခြင်းနှင့် ပတ်သက်၍ ဦးအောင်ဆွေထွန်း သတ်ဖြတ်ခံရခြင်းဖြစ်ကြောင်း ယင်းရပ်ကွက်တွင် နေထိုင်သူ အထက်ပါ အမျိုးသားက ဆိုသော်လည်း သီးခြားအတည်ပြုနိုင်ခြင်း မရှိသေးပေ။

“သူက ကြံ့ဖွတ်(ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ)။ နောက်ပြီးတော့ ဒလန်(သတင်းပေး) ၇၉လမ်း ၂၉လမ်းဘက်အိမ်တွေကို သူကိုယ်တိုင်လိုက်ပြတာ။ ဖမ်းဆီးတာတွေလုပ်ခဲ့တယ်” ဟု ၎င်းက ဆက်ပြောသည်။ 

ဦးအောင်ဆွေထွန်းအပေါ် စွပ်စွဲပြောဆိုမှုများနှင့် ပတ်သက်၍ မိသားစုကို ဆက်သွယ်မေးမြန်းရန် Myanmar Now က ကြိုးပမ်းနေဆဲဖြစ်သည်။ 

ဖေဖော်ဝါရီ ၁ အာဏာသိမ်းပြီးနောက် နေ့စဉ်ရက်ဆက် ဆန္ဒပြမှုများရှိခဲ့သည့် မန္တလေးမြို့တွင် အလောင်းပင် ပြန်မပေး၊ ကားဖြင့်ပင် တိုက်၍ ဖမ်းသည်အထိ ရက်စက်စွာ နှိမ်နင်းနေသည့် စစ်ကောင်စီကို တုံ့ပြန်ပစ်မှတ်ထားတိုက်ခိုက်မှုများ မေလမှစ၍ မကြာခဏပေါ်ပေါက်နေသည်။

Myanmar Now

Be the first to comment

Leave a Reply

Your email address will not be published.


*