အာဖဂနစ္စတန်က တပတ်အတွင်း လူ ၂ သောင်းခွဲကျော် အမေရိကန်ကယ်ထုတ်

အာဖဂနစ္စတန်က တပတ်အတွင်း လူ ၂ သောင်းခွဲကျော် အမေရိကန်ကယ်ထုတ်

Aug 23.2021

အာဖဂန်နစ္စတန် နိုင်ငံ မြို့တော် ကာဘူးလ်ကနေ ကယ်ထုတ်တဲ့ လူ အရေအတွက်ဟာ တရက်ပြီး တရက် အပြောင်းအလဲ ရှိလာမယ်လို့ သမ္မတ Joe Biden က တနင်္ဂနွေနေ့ ရုပ်သံ မိန့်ခွန်းမှာ ပြောပါတယ်။

နေ့တနေ့ချင်းစီရဲ့ လုံခြုံရေးနဲ့ အသေးစိတ် အခြေအနေတွေ ပေါ်မှာ မူတည်သွားမှာ ဖြစ်တယ်လို့လည်း သမ္မတက ပြောပါတယ်။ မြို့တော် ကာဘူးလ် ကနေ ပြီးခဲ့တဲ့ ၂၄ နာရီ အတွင်း လူပေါင်း ၇,၄၀၀ ကယ်ထုတ်ခဲ့ကြောင်း အိမ်ဖြူတော်က တနင်္ဂနွေနေ့ အစောပိုင်းမှာ ပြောဆိုပြီး ဒီသီတင်းပတ်ကုန် ၃၆ နာရီ အတွင်းမှာ လူပေါင်း ၁၁,၀၀၀ ကယ်ထုတ်နိုင်ခဲ့ကြောင်း သမ္မတ Biden က ပြောပါတယ်။

ကာဘူးလ် မြို့တော်ကနေ ထွက်ခွာဖို့ အတွက် လူပေါင်း သောင်းချီ စောင့်ဆိုင်းနေကြဆဲ ဖြစ်ပါတယ်။

“ဌာနေပြန်လိုတဲ့ အမေရိကန် အားလုံးကို ပြန်ခေါ်မယ့် အကြောင်း၊ အာဖဂန် မဟာမိတ်တွေနဲ့ တခြား လုံခြုံရေး စိုးရိမ်ရတဲ့ အာဖဂန်တွေကို နိုင်ငံတွင်းကနေ ကယ်ထုတ်နိုင်ရေးကိုလည်း ဆောင်ရွက်နေကြောင်း” သမ္မတ Biden က ပြောဆိုခဲ့တာပါ။

ကာဘူးလ်ကနေ ထွက်လာတဲ့ လေယာဉ်တွေ အမေရိကန်ကို တိုက်ရိုက် ပျံသန်းတာ မရှိဘူးလို့လည်း သမ္မတက ပြောပါတယ်။ ကာဘူးလ်ကနေ ပျံသန်းလာတဲ့ လေယာဉ်တွေက တခြား နိုင်ငံတွေမှာ ရှိတဲ့ အမေရိကန် စစ်စခန်းတွေကို ဆိုက်ရောက်ပြီး အဲဒီမှာ အမေရိကန် နိုင်ငံသား မဟုတ်သူတွေကိုတော့ နောက်ကြောင်း ရာဇဝင်နဲ့ လုံခြုံရေး စစ်ဆေးမှာ ဖြစ်ကြောင်းလည်း သမ္မတက ပြောပါတယ်။ ဇူလိုင်လ နောက်ပိုင်း ကာဘူးလ်ကနေ ကယ်ထုတ်လာသူပေါင်း ၃၃,၀၀၀ လောက် ရှိကြောင်းလည်း သမ္မတက ပြောပါတယ်။

ပြီးခဲ့တဲ့ သီတင်းပတ် အတွင်း အမေရိကန်က ကယ်ထုတ်လာသူ ၂၅,၁၀၀ ဦး ရှိခဲ့ပြီး ဇူလိုင်လကုန်ကနေ စလို့ ကယ်ထုတ်ခဲ့သူ စုစုပေါင်း ၃၀,၀၀၀ အထိ ရှိပြီ ဖြစ်ကြောင်းလည်း သမ္မတ အိမ်ဖြူတော်က ပြောပါတယ်။

ကာဘူးလ် မြို့တော်က ထွက်လာပြီးနောက် လုံခြုံရာမှာ ခိုလှုံနေကြတဲ့ အမေရိကန်နဲ့ အာဖဂန်တွေကို သယ်ယူပို့ဆောင်ရေးမှာ အမေရိကန် လေကြောင်းလိုင်း ၆ ခုက ခရီးသည်တင် လေယာဉ် ၁၈ စင်း အသုံးပြုမယ့် အစီအစဉ်ကို အမေရိကန် ကာကွယ်ရေး ဝန်ကြီး Lloyd Austin ကလည်း အစောပိုင်းမှာ ပြောဆိုထားတာပါ။

ဒါဟာဆိုရင် ပြီးခဲ့တဲ့ နှစ်ပေါင်း ၃၀ အတွင်း အမေရိကန် စစ်တပ်ကို ကူညီဖို့ တတိယ အကြိမ် အဖြစ် အရပ်ဘက် လေယာဉ်တွေ အသုံးပြုမှုလည်း ဖြစ်ပါတယ်။

အာဖဂန်မှာ အမေရိကန်တို့ နှစ် ၂၀ တိုက်ခိုက်မှုတွေ အတွင်း ကူညီခဲ့ကြတဲ့ အာဖဂန်တွေနဲ့ အမေရိကန်တွေကို လေကြောင်း ခရီးစဉ် ၆၀ နဲ့ ကယ်ထုတ်လာပြီး အများအပြားကတော့ အရှေ့အလယ်ပိုင်း နိုင်ငံတွေဆီကို ဖြစ်ကြောင်း အမေရိကန် နိုင်ငံခြားရေး ဝန်ကြီး Blinken က Fox News Sunday အစီအစဉ်မှာ ပြောပါတယ်။

အာဖဂန် အခြေအနေနဲ့ ပတ်သက်ပြီး အမေရိကန် သမ္မတ Joe Biden က နိုင်ငံခြားရေး ဝန်ကြီး Blinken ၊ ကာကွယ်ရေး ဝန်ကြီး Austin နဲ့ အမျိုးသား လုံခြုံရေးဆိုင်ရာ တာဝန်ရှိသူတွေနဲ့ အိမ်ဖြူတော်မှာ ဆွေးနွေးခဲ့ပါတယ်။

VOA

Be the first to comment

Leave a Reply

Your email address will not be published.


*