A Fale Minung (4) Cu an pali Ning Tein ralkap nih Thih-daan An Pek Hna ,Pathian nih Dirpi Ko Hna Seh

Yangon Dagon Myothit i um mi Daw San San Aye cu a fa le 4 bak ralkap nih thit daan an pek hna caah an nu cu thinlung kekkuai taktak in a um ti theih a si.Cu ruangah thil dang zeihmanh a tuah kho lo i a tuan khawh lo caah ni fa tin te cu a fa le thonginn chung i um mi hna caah ei din siam lawng a rian ko ti si.Amah a cawmtu bik a simi hna a fa le 4 an um ti lo caah chun zaan in mitthli he lawng caan a hmang ti theih a si.

March 29 2021 ah Yangon Myothit i um mi U Zaw Min cu ho ti theih lomi nih a thah i a ruak cu lam kam ah an hlawnh piak men hna. Cu kongah cun veng chung duty i ai telmi Daw San San Aye i fa le 4 cu ralkap nih bia tlawmte hal ding kan in ngei hna tiah an tleih hna. Ralkap pawl nih mi an kalpi ah cun inn i rak lawi timi cu a um ti lo i ralkap uknak duh loin lam an zawh caah pukmah 505 case tuah piakin thonginn chungah an khumh hna i si ko lai tiah a nu nih cun a ruahmi a si.A sinain a nu nih a ruah ning bantuk cu a si lo.

A fa le 4 cu ralkap nih mithat case an rak orhter hna i May 24 ah khan ralkap court ah a fa le 4 cu thih daan an rak pek cang hna. Ralkap i thih daan pek hnuah ram uktu sinah nawlnak tuah khawh a si i nawlnak ca an pek hna mi ah cun an luat dingmi cu a fa le 4 le nu cem nih cun ruahchannak tam pi an ngei.A fa le 4 nih cun mithat tu ah cun kan i tel lo lawlaw sinain lam zawhnak tuah cun kan i tel ko ee tiah a nu cu an rak chimh. An nu Daw San San Aye nih cun ka fa pakhat min kawl in zinglei ah inn ah cun an ra i ka fa le 4 cu an tleih hna.

Ka fa le ah cun a tho rih lomi zong an rak um i bia kan in chimh mi hna nan zulh lo ah cun kan in kah colh hna lai tiah an rak hro colh hna. Bia hal ding tlawmte kan in ngei hna tiah an ti hna caah an thlah than ko hna la timi cu ka rak i ruahchan. Sinain ka rak ruahmi bantuk in cun a si ti lo. May 24 ah ka fa le 4 cu thih daan an rak pek cang hna. Ka lungrethei tuk i zeiruangah dah pukmah 505 cun thih daan pek phung cu a si tung lo tiah ka buai len i a hnuah mithat case 302 an rak orhter hna i thihdaan cu an rak pek hna.

Zeihmanh buai pi tu zong an rak ngei lo i zeikong hmanh theihter lem loin an mah duh bak cun thih daan cu an rak pek hna. Kan veng chung i thihnak a um lioah hin ka fa le 4 cu lam kamah an duty lio a si i cu ka hmunah cun an kal dih. An buainak hmunah cun an um lo hrimhrim timi cu a nu zong nih cun ka theih khawh tuk ve.

Ka fa le 4 nih cun mithat tu sinah cun kan i tel lo i an buai hnuah mi tampi nih an zoh caah cu hnu cun kan va zoh ve men mi a si i lam zawhnak tuah cun kan i tel ve ko.Lam zawhnak i ai telmi cu pukmah 505 lawng orhter an si i cu caah cun ka nu na ngeih rak chia hlahlaw lungrethei tukin rak um bak hlah. Kan rak chuak kho than hrimhrim ko lai tiah an rak ka ti. Ka fa le 4 nih hin hi bantuk hi an tong te lai timi cu ka ruat bal lo i ka fa le 4 nih thih daan timi an van ton hnu lawng hin thih daan timi zong hi ka theih.

Ka fa le 4 nih mi cu an thah lo hrimhrim caah nawlnak ca cu pek kan duh hna. Ka fa le hi kum no tete an si i hmailei ah a thangcho te dingmi an si tiah a ti. Ralkap nih nawlngeihnak an lak hnu thla 5 hnuah hin thi dingin hremnak an pek cangmi hna hi minung 64 an um cang i thi dingin hremnak an pek cangmi hna cu Yangon Insein thonginn ah a dang te in an chiah hna ti theih a si.

Be the first to comment

Leave a Reply

Your email address will not be published.


*