A Poi Tuk E : Dalaan Nu Pakhat Nih Kawl Ralhrang Sinah Report Ruangah Khuami Minung 20 An Nunnak A Liam

Irrawaddy ramthen Kyung Pyeo pengkulh ah a um mi Hle Shwe khua ah tuzing June 5 2021 ah khan kawl ralhrang pawl hna le khuami mipi karlak ah kahdohnak faktuk in a chuah tiah khuami pakhat sinin thawngtheih a si. Tuzing kahdohnak cu a fahtuk caah khuachung ummi taarnu taarpa hna le nu le hngakchia paoh cu an zaam dih cang hna i khuachung zongah an umngam ti lo tiah thawng theih a si.

Hle Shwe khua ah hin meithal le Bomb tha pawl, hriamnam tha pawl a um tiin Hle Shwe khua ah cachim sayamah a tuanmi nu pakhat nih kawl ralhrang sinah phone a chawnh hna i thawngthanh nak a tuah hna ruangah kawl ralhrang pawl cu thazaang tamngai he khuachung ah an rak lut hna.

Cu hnuah khuami mino pawl le bia el nak a um hnuah kahdohnak hi a chuah mi a si tiah khuami pakhat nih cun a chim. “Kawl ralhrang lei nih hin khuami pakhat an tlaih caah kan duh ve lo i kan chuh thanh hna i cuticun bia el nak a hun um hnuah kahdoh nak a chuah hi a si” tiah khuami nih thawngzamh sinah an chim hi a si.

Cu hnu ah kawl ralhrang le khuami mino hna karlak ah kahdoh nak cu fak ngai in a hun chuak i kawl ralhrang pawl nih an thazaang an hun chap than, hriamnam ngan pawl in an kah hna caah khuami leiin a tlawmbik minung 20 an nunnak a liam hi a si.

Tuzan lei ah khan cun kawl ralhrang nih Hle Shwe khua cu an kulh dih cang hna i innkhat hnu innkhat an luhhnawh cuahmah ko cang hna tiah khuami nih Yangon Khit Thit Media Office ah an chim ning a si. Ref: Khit Thit Media

thawngpang dang : Hakha, Senthang Peng hmun cheukhat ah ralkap an lut, khuami an zaam inn lei an kir ngam rih lo
=======
Mizapi thimmi Myanmar ram uknak sin in hramhram in uknak a chuttu SAC mithat phu (ralkap) nih Hakha, Senthang Peng khua cheukhat an luh hnawh hna ca ah khuami hna cu mah inn le lo ah um ngam loin an zaam dih tiah thawng kan theih.

Senthang Peng chung min langhter duh lo khuami pakhat nih, “Kan khua hi 2021 June 2 ahkhan an rak lut. Khuami kan dihlak ralkap an ra ti kan theih in kan inn le lo kan chuah tak cio. Khua chung ah an lut i lamkam inn poh cu an boh dih. Cun, Solar le Bettery kan hman mi pawl zong an i lak. Innchung thilri tiang an hrawh dih,” tiah a chim.

SAC mithat phu (ralkap) hna khuate cheukhat i an lut hnu khuami hna cu bomb an hmanh sual lai ti kan phang ca ah khuachung ah an lut ngam ti lo tiah thawng kan theih. CDF-Hakha le SAC mithat (ralkap) hi a liamcia May thla in an i kap i hi kahnak ruang ah CDF-Hakha in minung pakhat a nunnak a liam.

Cun, Senthang Peng kong he pehtlai in Facebook cahmai ah, “Please helps Senthang, Please Give attention to Senthang, Please stay with Senthang We need your help, CDF, NUG, CNA/F Atu Senthang peng ah ral hrang nih duh poh in khua an sak cuahmah cang ca ah bawmhnak kan herh ko, speak out zong tampi kan tuahpiak ve cio uh tiah kan in nawl hna. Senthang pawngkam ah a um mi Zotung CDF le Hakha CDF zong nih nan kan cawl cangh pi nak lai zong kan in nawl hna,” tiah an langhter. The Hakha Post

Be the first to comment

Leave a Reply

Your email address will not be published.


*