A Poi Tuk E : Pasaltha Kan I Ngeih Mi An Thah Ning Hmuh Tik Ah Lung A Tha Hrim Lo E

Pasaltha hrimhrim a si ko, a nunnak ding caah biatak tein a cawlcang len ve, lungthawng taktak in thazaang a chuah tuk ve ko nain, Ralhrang pawl kuanfang nih faktuk in a khen caah a nunnak a liam mi Monywa pasaltha kong ruah ah lungfah celh awk a ttha lo.

Monywa khuapi ah a um mi Ko Htun Oo cu Ralkap nih a kut le a taang ah Meithal in an kah. Mibu cawlcanghnak, Ralkap hramhram uknak dohnak i a cawlcangh nak ah Ralkap nih an kah hi a si. A kut le a taang ah fak ngai in Meithal kuanfang in an khen mi asi.

Meithal kuanfang a tuar ko nain, a zaam, a nun himnak caah a thazaang dihlak chuah in aa zuam. A kut khat lei in A ttang zawn Meithal kuanfang in thisen a chuak mi cu a phih pah, Meithal kuanfang nih a khennak a kut khat lei in a hni aa tliah pah in a zaam ve ko. A si nain faktuk in Meithal kuan nih a khen cang ruang ah caan saupi a tli kho lo, thutnak hmun a phak ahcun a nunnak a thaw nih a zo ti lo i, a nunnak a liam ti asi.

A hmanthlak, a cawlcangh ning zoh ah lungfak tuk hringhran a si ko. Raltha tein ralkap a doh, meithal kuanfang nih faktuk in a khen hnu zong ah a dirhmun a fek. Sihmanh sehlaw, Ralhrang pawl a chiahru tuk mi hna cawlcanghnak ruang ah Ko Htun Oo cu a nunnak a dih hi asi. Pasaltha hrimhrim a si ko. A tuanbia chim a dai ti lai lo. Vom

Thawnpang dang : Tukum KumHramthawk in Kawlram ah Ralzaam Sing 1 leng an Phan cang

Kawlram ah 2021 kum hramthawk in inn le lo chuahtak in a zaam mi sing 120000 leng an si cang, a tam deuh cu ralhrangbu nih uknak an lak hnuah a zaam mi an si tiah UN nih a thanh. “Kawlram chungah a um mi kan riantuan hna nih an kan chimh ningin ramchungah kahdohnak a um peng ruangah le cheukhat cu an inn, an khuachungah an um ngam lo ruangah a zaam mi dihlak 120000 leng an si cang tiah kan theih. A tam deuh cu ralhrangbu nih uknak an lak hnuah a cang mi a si” tiah UN chimhnak nawlngei Farhan Haq nih a chim.

Karenni Mipi Ralkap- KPDF le ralhrangbu tuzarh chung an i kahnak in minung 37000 hrawng an zaam cang tiah a chim. Shan ram chaklei ah ralhrangbu le tlangcung hriamtlai kar i kahnak le Shan hriamtlaibu hna karlak i kahnak ruangah a thong in an um.

Chin ramkulh chung ah zong minung thong renglo an inn le lo chuahtak in hmunhimnak lei ah an zaam tiah a ti. UN nih Kawlram ah ralzaam minung sing 10 hrawng caah ei le din, bawmhnak an herh tiah tukum hramthawk ah khan a rak chim cang. Atu hi UN nih a rak tuakmi minung nakin minung tampi an i chap caah ralzaam hna bawmhnak caah UN hawikom ram hna nih buaibainak um lo tein an bawmh khawhnak dingah tawlrel dingin UN cu an nawl.

Be the first to comment

Leave a Reply

Your email address will not be published.


*