A Poituk Hrinhran Ko Mu, July 1 Nihin Ah Theihternak An Tuah Kahdohnak Ah PDF Lei In Minung 27 Bak Te An Thi

Mipi Humhimtu PDF le Ralkap Doawknak Țum 30 Ah Mipi Humhimtu PDF 27 An Thi. Sagaing ramthen Yinmarin District Kani myone mipi humhimtu PDF cun ralkap thawn vei 30 an doawknak ah anmah mipi humhimtu lam 27 an thih zo thu ,tuini July 1 ah thu an suah.

Kani mipi humhimtu PDF cun “Tuitum ram buai caan ah ralkap pawl cu April thla thokin Kani myone ah an ra lut thok. April 4 le June 6 ah ralkap pawl cu Kani khawpi veng 3 le khua 51 ah an lutih sui, tangka, bike le thildang phunphun tluanah tilva tiang an laksak ih mipi neihsiah tami an rak siatsuah sak thluh. Cumi tlunah daiten ummen mipi 42 cu kutthlak in an hrem ih mi 39 an kaih tlunah mi 4 cu an rak hrem that. Cuvek ruangah Kani myone sungin mipi thawng 50 cu khua suahsan in hramlak ah an tlanih kum 9 pate cu hramlakah tukkui natnak in a thih phah.

“Ralkap pawl cu Democracy uknak duhtu pawlkom dang thawn tuantlang in kan neihsun ralthuam hmangin humhimawknak hrang kan do ve. Kani myone sungah ralkap thawn vei 30 tluk kan do aw ih ,kanmah mipi humhimtu PDF lamin mi 27 cu ram humhimnak hrang an nunak an hlan. Ralkap in duhduh in mipi an dekcok ih an neihmi thilri duhduh in an laksak men cu NUG cozah thusuak bangin mah le mah humhimawknak hrang Democracy kan ngah hlan tiang cu kan do ding tiah kan lo theihter.

“Tu ah doawknak cu nasa sinsin in hramthok a si ih mipi lam khal eiin siseh tulsammi ziangkim tawlrel in kan himnak hrang beunak le relhnak vek ngaihven cia dingah kan lo theihter duh. Khua tin le vengtin ah thuphuangtu kan ret thluh ih,ralkap siseh an tuanpi Pyu Saw Htee pawl ih cangvaih dan cu kan palai pawl hnenah simthei ringring dingin kan lo sawm. Mipi humhimtu lam a himnak hrang relh a tulih an lo pan asile rak ret him dingin kan lo sawm. Rinhlelh ralthuam le puak thei ding vek nan hmuh asile PDF lam simthei uhla, ralkap uknak cu kan tlin dan cio in dokalh ih tel dingah kan lo sawm a si,” tiah an ti. Vapual Auaw

Be the first to comment

Leave a Reply

Your email address will not be published.


*