A Va Tha Hringhran Dah : Zeipoh Hi Sualman Cu An Tla Thluahmah Ko La Vanlong Tlaknak Ah Seo Win Aa Tel Ve

Nihin Kawlram ralkap Vanlong tlaknak ah khan Kawlram ralkap bawi bik chang a simi Seo Win ai tel khomi a si tiah an chim. Nihin June 10,2021 ah khan Pyi Win Lwin ralkap airport pawng ah Kawl ralkap Vanlong pakhat a tla i minung 14 an nunnak a liam tiah theih a si.

Nunnak a liammi cazin ahhin minung 12 lawng Kawl ralkap nih an min an langhter hna i minung 2 an min an langhter hna lo tiah theih a si. A thimi lak ah an min langhter lomi ahhin boyoke hnukyi Seo Win hi tel dawh a si ko tiah thawnpang a leng. Vanlong chung ah ai citmi hi minung 16 an si i Kawl ralkap bawi chunhkhar an si hna. An min an langhter mi hna zong hi ralkap rengsang taktak mi lawng te an si hna.

Nihin June 10,2021 zing sml 8:00 hrawng ah ralkap Vanlong pakhat cu Pyin Oo Lwin airport ah tum ai tim. Ni khua a chiat deuh caah a tum kho lo a kir than. A kir lei tlawmpal a zuan ah Vanlong cu a tla tiah pawngkam um pakhat nih a chim.

Kawl ralkap nih thawng an thanh ning ahcun nikhau a that lo ruang ah vanlong a tla i nunnak liami le hliamtuar mi an um. Minung pahnih an nunnak kan chanchauh manh hna tiah an chim. Seo Win hi Min Aung Hlaing chang tu a si. Min Aung Hlaing hi an bawibik a si i a changtu ah Seo Win hi a si. A mah hi a sual taktak mi a si tiah an chim tawn.

Nihin Vanlong tlaknak ah khan ai tel bak ko lai tiah a mah kong a hlathlai tu le tuni Vanlong tlaknak kong a hlathlai tu hna nih an chim. Seo Win hi ai a thimi ah ai tel bak tiah fehter a si rih lo. Sinain ai tel khomi a si, ralkap nih a min an thuh ruang ah a si tiah thawngpang a leng. thechinstar

Thawngpang dang : KNU Lutlai Pahnih Nih NCA Ningin Kan Kal Lai An Ti Mi Hi An Mah Pumpak Ruahnak Lawng A Si

Nizaan June 9 ah KNU/KNLA bawizik Gen. Saw Gyaw Ni nih KNU chairman Saw Mutu Sae Poe ruahnak bantukin KNU/KNLA cu NCA framework ningin kan kal lai tiah a chim mi cu anmah pumpak ruahnak lawng a si tiah KNLA adjutant general in Brig. Man Shia Htoo Wong nih a chim.

General Mutu Sae Poe nih May 10 ah tulio ramkhel kong he pehtlaih in KNU nih NCA lam ning tein chawnhbiaknak kan kalpi lai. Bu dang dang hna zong nih NCA lam zulh in remdaihnak kilven cio dingin kan duh tiah amah pumpak ruahnak a rak thanh bal.

KNLA army chief nih nizaan ah KNLA cu KNU thithruainak tangah a kal mi kan si bantukin kan chairman ruahnak bantukin kan kal lai tiah a thanh caah mi tampi ruahnak ah KNU/KNLA nih ralhrangbu cozah a cohlan ko tiah ruahnak ngeih cio a si.

Hi kong he pehtlaih in Brig. Man Shia Htoo Wong nih “Gen. Saw Gyaw Ni cathanh hi KNLA Central General Office nih kan thei rih lo, a cathanh hmanh kan hmuh rih lo” tiin Myanmar Now sinah a chim.

Kan ruahnak bantuk cu a si lo, nain pumpak ruahnak lawng a si i zeihmanh fehternak a um lo. Pumpak ruahnak cu a ho cio poh nih ngeih mi a si ko. KNLA nih NCA lam in kan kal lai ti mi kan ngei lo. 2020 December thla ah kan rak thanh cang bantuk khan kan si ko. Mah cungah fek tein kan dir peng ko lai tiah a ti.

Ralhrangbu nih uknak an lak hlan 2020 december 1 i an cathanh mi ah “NCA min kan thut cang ko nain NCA ah a tel mi ralkap kong le caan karlak tuah dingah hnatlak cia mi pawl kan tuah khawh lo hlei ah NCA a buarmi cungah JMC zong tha tein rian a tuan kho lo.

Ralhrangbu nih hmunhma an kauh mi pawl 2021 kum dih hlan ah an zuh than lo ahcun KNLA nih kan ram venhimnak cu kanmah tein kan tuah hrimhrim lai tiah an langhter.

Ralhrangbu nih nawlngeihnak a lak hnuah KNU brigade 5 ah kahdohnak tampi a chuah pinah ralhrangbu nih nawlngeihnak an lak mi kongah KNLA nih kan pom kho lo, mahcu ralkap lei ruahnak a si tiah a chim.

KNU hi NCA minthut mi tlangcung hriamtlai bu 10 lakah bu ngan cem a si i, NCA minthut bu 10 nih fonh mi Peace Process Steering Committee- PPST chungtel zong a si. Ref; Myanmar Now

Be the first to comment

Leave a Reply

Your email address will not be published.


*