Apoi Taktak Si : CDF-Mindat in CDM Palik Salai Choi Ling a Nunnak a Liam

Mindat Kahdohnak Ah Mipi Lei CDM Palik Pakhat A Thi
============
June 4, tuni Mindat kahdohnak ah mipi lei CDM palik pakhat a thi tiah theih a si. Mindat peng, Chin ramkulh le Magway ramthen ramri Shwe Aung Tha khua ah ralhrang nih an thazaang an chap caah June 4, tuni zinglei in kahdohnak a zual tiah khuami hna nih an chim.

“Anih hi CDM a tuah i Mindat kahdohnak ah mipi lei in aa telmi a si. Kahdohnak ah hruaitu pakhat a si ve” tiah CDF-Mindat in thawngthanhnak lei tuanvo ngeitu pakhat nih a chim. A thimi CDM palik cu Salai Chui Ling a si. Sniper kut in a thimi a si. Zinglei ah a thi nain zanlei tiangah a ruak an la kho rih lo. June 4 kahdohnak ah ralhrang lei nih hriamngan le sniper hna an hman i mipi lei hliam a tuarmi zong an um tiah theih a si.

Kalaymyo Ah Nikhat Chungah COVID In Pali An Thi, Wesley Siizung Riantuantu 70 Lockdown An Si
============
Kalaymyo ah June 4, tuni nikhat chung lawngah COVID in mining pali an thi. Pathum hi zinglei ah an thi i pakhat hi zanlei ah a thi ve. Pathum hi kum upa an si i pakhat hi ngakchia a si. Cu pinah tuni ah mining 75 zawtnak an chek hna i mining 25 sinin zawtnak a hmuh chap fawn hna. Tahan i Wesley siizung siibawi 8 hna cu COVID in an zawt caah anmah he aa naihniammi siizung riantuantu 70 hna cu lockdown an tuah hna tiah theih a si.

Mandalay Ah Chin Miphun Palik Bawi Pakhat Meithal In An Kah
=============
Mandalay khuapi Ungchaw ramri veng palik hruaitu U Ling Hung cu June 3 ah khan saikel in a riantuannak lei i a kal lioah aho ti theih lomi hna nih an hnulei in an dawi i meithal in an kah, a hmun ah a nunnak a liam colh tiah theih a si.

June 5, Thaizing Chin Ramkulh Peng Mei A Mit Lai
============
June 5, thaizing hi Gangaw lei Mei an remh lai caah Chin ramkulh peng 9 dihlak mei a mit lai tiah theih a si. A mih caan cu zinglei 8 in chun 12 tiang a si lai tiah Gangaw district Electric Engineer zung nih an thanh.
Than Lwin Khet, Zalen

thawngpang dang relchap : CDMers Hna I Ralrin Chin Chin A Hau Cang Hi Mu Tha Tein Mah Hi Rak Thei Ve Hrimhrim

CDMers Hna I Ralrin Chin Chin A Hau
===========
Ralhrang lei runvennak (စစ်ဘက်ဆိုင်ရာလုံခြုံရေးတပ်ဖွဲ့ – စရဖ) nih Rangon khuapi Sipin committe in CDM a tuahmi hna an min, an rank, an umnak le an hmanthlak hna cu pek/kuat dingin ralhrang nih an khanhmi YCDC Secretary nawlpeknak in department hotu chang a simi U Than Htut nih Myone EO hna sinah nawl a pek hna tiah theih a si.

Hi nawlpeknak ca hi a thli tein email in kuat a si. Hi cakuat kong an theih tikah Rangon khuapi sipin committee in CDM tuahtu hna cu thinphang le lungrethei in an um cang. Hihi Rangon khuapi chung lawngah a si lai lo. Ramthen le ramkulh cozah zungkip zongah hi nawlpeknak hi a ra te lai. Cucaah CDMers vialte a hlan nakin ralring chinchin kan hau ko.

Cu lawng si loin June 2 ah khan ralhrangbu nih CDM tutu siibawi hna cu ramleng chuahnak nawl phih ding, ramleng chuahnak passport hrawh piak ding le sualpuh a tongmi siibawi hna cu an licence chuh dingin ramthen le ramkulh ngandamnak zung le siizung uktu hna sinah a thli tein nawlpeknak ca a kuat cang hna. (Khit Thit Media)

Myanmar Ramchungah COVID A Karh Biknak Cu Chin Ramkulh A Si Cang
==========
Ramkhel buai ruangah mipi thinphang le lungrethei taktak in kan um lioah COVID nih a vun kan den chih ve. A poi tuk ti pin chim ding dang a um lo. June 2 tiangah Chin ramkulh chungah COVID zawtnak a ngeimi 191 an si i Myanmar ramchungah COVID mizaw an tamnak bik a si. A pahnih cu Chin ramkulh he aa tlaimi Sagaing ramthen a si i 154 an si. A pathumnak cu Rangon a si i 82 lawng an si. Ram buai ruangah mizaw cazin hi fiangin theih lo zong a um kho. Asinine Chin ramkulh le Sagaing ramthen Kalay khuapi cu COVID zawtnak a karh ngai ti cu theih cio a si. (VOA)

Be the first to comment

Leave a Reply

Your email address will not be published.


*