Breaking News : Kawlram Tlangcung Hriamnam Tlai Chungtel Minung (5) Cu Tlaih An Tong

Mizoram ah Kawlram Tlangcung Hriamnam Tlai Chungtel Minung (5) An Tlaih Hna. Assam Rifles Lawngtlai palik he ai bawm mi nih cun June 12 ah Arakan Liberation Army chungtel 5 cu india le kawlram ramri Mizoram lawngtla peng KaKichhuah khua ah an tleih hna tiah theih a si. Arakan Liberation chungtel 5 cu Kakichhuah khua ah meithal keng in mipi cu an hrocer hna i phaisa zong an hal len hna.

Cu tik ah mipi nih cun a thli tein palik pawl cu an chimh hna i june 12 ah palik pawl nih cun an tleih hna. Arakan Liberation Army chungtel 5 pawl cu kutin 9mm pistol 1′ point 38 Revolver 1′ cerek 55 le kut puahmi bomb 5 zong an tleih chih. An tleihmi hna 5 cu lawngtlia khua ah kuat an si i ralthuam le ramdang mi sinak in hmangin case an tuah piak hna hnuah thongah an thlak hna.

Arakan Liberation Army cu Rakhine ralthuam tlaimi he ai bawm mi pakhat an si i AA tiah kan theih pengmi hna he hin kan thleidan khawh hna zong a herh. An nih cu Arakan Liberation Army (ALA) tiah min bunhmi tu an si. Karen ramkulh le Rakhine ramkulh Sittwe ah um hmun khuarmi an si. AA le ALA hi an i lo lo i ALA pawl cu KNU pawl he ral rak do timi kha an rak si.

thawngpang dang relchap : Bawipa Kan Bawm Law : Ralhrang Ruangah Khuahring Tlang Chung Khua 3 Nih An Khua An Zaam Tak

SAC ralhrang ruang ah Khuahring tlang chung in khua thum nih khua an chuah tak. State Administration Council (SAC) ralhrang le Chinland Defense Force-Thantlang (CDF) kar 2021 June 10 i kahdohnak a chuah hnu Thantlang peng Khuahring tlang khua chung in khua thum cu an khua an chuah tak dih cang tiah theih a si.

Khua a chuah tak mi hna hi, Mualkai, Tihbual le Tlangkhua hna an si tiah thawng kan theih. Hi kong he pehtlai in min langhter duh lo pakhat nih, “June 10 ahkhan SAC ralhrang le CDF-Thantlang hna karlak ah kahdohnak a chuak. Hi kahdohnak a chuak hnu in an i kahnak pawngkam i khuami hna cu kan um ngam ti lo ca ah khua kan chuah tak,” tiah a chim.

Mualkai le Tihbual khua hna hi June 10 in khua an chuah tak. Hi hna khua hnih chung ah SAC ralhrang nih Tihbual khua chung ah umhmun an khuar. Cun, Mualkai khua i an zuat Ar zong an thah dih i ei loin inn leeng ah an chiah hna tiah theih a si.

Cun, “June 10 i an kahnak hmun hi Tihbual le Mualkai karlak ah a si. An i kah hnu in nihin tiang SAC lei nih nifatin bomb le meithal an thlah peng. Nikhat ah bomh an thlah mi hi zuun 100 fai cu a si peng lai,” tiah a chim.
2021 June 10 i SAC le CDF-Thantlang kar i kahnak ah SAC lei in minung 17 an nunnak a liam. CDF nih an meithal zuun nga le hriamnam dangdang zong an laak khawh. CDF lei tu cu hliam a tuarmi le a thimi an um lo tiah kan theih. Credit: The Hakha Post

Be the first to comment

Leave a Reply

Your email address will not be published.


*