Donald Trump A Holh Ve Cang, Biden Ruangah Taliban Nih American Tthawnnak Zei Hmanh Ah An Rel Ti Lo

Donald Trump A Holh Ve Cang, Biden Ruangah Taliban Nih American Tthawnnak Zei Hmanh Ah An Rel Ti Lo

American nih hin mi ramdang kongah aa thlaak peng awk si lo tiah an ram president thar simi Joe Biden nih Afghanistan ram ah ummi an ralkap pawl cu kan hnu lei in khan a vun laak tthan hna, Biden nih Afghanistan ram in an ralkap pawl a vun laak hna hnu tlawmpaal ah Afghanistan ram cu Taliban ralhraang nih an laak colh.

Hi kong he pehtlai in Joe Biden nih siseh president hlun Donald Trump zong nih an chimmi bia tampi ko nain a biapi deuhmi tete lawng kan vun leh lai, Biden nih Afghanistan in an ram ralkap laak a timh hna lio ah khan midang dang hna siseh Donald Trump zong nih a rak soisel ngai, a si nain Biden nih cun Afghanistan in kan ralkap pawl an kir tik ah Saigan bantuk dirhmun kha a phan lai lo.

Cun Afghanistan ram ah ummi American Embassy zung cung in minung an tlaak lio zong na hmu fawn lai lo tiah a luan ciami July ni 8, kum 2021 ah khan Biden nih cun press confrence ah Donald Trump ti hnawh in bia a rak chim. A si nain tu ni ah zei dah cang, social media cung ah tampi kan hmuh cang ko lai, Afghanistan mipi hna cu US Airforce vanlawng ke ah aa awkmi le a tlami hna an um, vanlawng kalnak ttha lo tiang in an zulh.

Afghanistan ram in American ralkap pawl an laak hna hnu tlawmpaal ah Kabul khua ah ummi US Embassy zung rianttuan tu pawl zong vanlawng in an laak thluahmah hna, Biden nih Donald Trump ti hnawh in bia a rak chimmi pawl cu a mah lila nih a ei tthan, khat lei in chim ah cun bia aa rak chim sual bak khi si ko.

July ni 8 i Press Confrence an rak tuah lio ah khan Taliban pawl nih Afghanistan an laakmi hi loh theih lo thil a si maw tiah journalist pakhat nih bia a rak halmi cu “a si nemmaam lo, Afghanistan nih ralkap 300000 an neih, cu ralkap pawl cu ready bak in an chiah hna bantuk in vawlei cung zei bantuk ralkap zong Taliban ralhraang 75000 hna he kalh in ral doh a cawngmi an um ko” tiah a rak chim.

A si nain Biden nih a rak chimmi le thil a hung cang tak tak mi cu van le vawlei bantuk in aa dang, tu ah American lawng si loin Britis le Germany te hna zong nih Kabul khua ah an ram Embassy zung chiah an tim ti lo, mah vialte hi Biden ruangah a si ti khawh zong a si ve, zei ruangah tiah Afghanistan in US ralkap hi rak la dih hna hlawh sehlaw hi bantuk thil hi a chuak lo kho men, a si nain an mah ram ralkap hna caah cun a va ttha tuk ve ko lai dah!

Hi kong ah Donald Trump nih cun Biden ni Afghanistan in US ralkap a laak hna ruangah buainak tamtuk a chuak cang, Human Right zong a um kho ti lo, zei hmanh sualnak nei lo Afghanistan mipi nih hi tluk in an tuarmi hi zoh tik ah Biden hi a rian in phuah tlaak bak a si cang, Biden ruangah Taliban nih American cu zei hmanh ah an rel ti lo i American nih a neihmi tthawnnak zong zei hmanh ah an rel ti lo tiah a chim ve, a sau tuk lai caah kan rak peh tthan te lai.

Chin 24seven

Be the first to comment

Leave a Reply

Your email address will not be published.


*