Evan. Tluang Lian Nih Mipi Caah Bia Achim Mi

Mipi Hna Caah Evan Tluang Lian Nih Bia Achim Mi Cu ……..Ahman Tuk .

Kan Miphun Caah Thih Nakin Luat Nak Aum Ko Rih, Sualphuan In Bawipa Pathian Zangfah Nak Kan Hmu Hna LaiJer 3:13 Palhnak na tuahmi kha ka tuah taktak ko ti law, Bawipa na Pathian na dohnak kha i phuang ko. Maw Chinmi Maw kan Laimi Bawipa na Pathian sinah na sualnak cu phuang ko.  Maw, Kalemyo khuapi “Sepia le ritnak si le thilțhalo in,” a rummi khuapi na sualnak cu phuang ko. Na biakin țhațha hna le na cheuhra cheukhat hna cu an thiang lo. Cu cun na Pastor hna cu na cawm hna!

Maw, Khrihfabu hna, Pathian nih a thlahmi hna, na dohnak in THIANG THLARAU na donhnak cu i phuang ko. Nan meeting room in nan khuakhannak țhalo hna cu phuang ko. Maw, PATHIAN Chitithuh mi hna, PATHIAN  THLARAU nih a hmanmi hna,” Chawva duhin na zuanzamnak kha i phuang ko. Na lung chung cu hakkauhnak in a khat i Balaam bantukin, Pathian MIN le a Bia cu nangmah hlawknak ah na hman dih.

Maw, hlasak thiam awțha hna, Gomer bantukin an phalh khotu hna ca i na zuamzamnak cu i phuang ko. Naa țamhmawihnak vialte hna kha Bawipa caah fihnung an si i, zumlotu hna bantukin an thangțhattu duhtu mi tlawmte hna sinah, maak hngal loin Pathian hla in minta/mintami na țuan cu ngol cang.

Maw, pumtlamtlinglo le Tar hna le zuri le ngakțah a cawm i a zohkhentu hna, chawva hmuh awkah lih a phunphun in dawtu taktak alem nan țuannak le ngakțah nan fa le nan sualpi hna nak cu i phuang ko. Maw, Thlacamnak a tuah tu hna le Ministry a tuahtu i midang sual a phaw peng i, hakkauh in chawva ah a tlu mi hna nan sualnak cu phuang ko.Maw nungak tlangval le patung nutung hna nupa sualnak nan tuahmi cu i phuang ko. Maw, tangka ngei hna, chawkarhin mi na hrem hna i a karh karh chin tiang hmuh awkah taza na cuai hna i na volh na pamh hna i an thilri le inn le lo na chuh hna kha ka sual tiah i phuang ko. A thlitein nau a that i lai a nawngmi hna BAWIPA sinah i phuang ko. Maw, ram uktu hna le cozah rianțuantu hna ziknawh na lakmi vialte le mi ramri na detmi vialte hna le nupa sualnak nan tuahmi vialte cu BAWIPA sinah i phuang ko.

Maw, ramleng ummi hna nan chaw țhazang in ramchung mihar hna sinah siangpahrang nan țuannak porhlawt ruamkainak vialte cu i phuang ko. PATHIAN Pennak cu na tangka in cawk na timh tawn si lo mei? Na tangka thazangin na duh mi Pastor, na duhmi Evangelist, na duhmi singer naa sawm hna i na duhmi Missionary na thlah hna. Naa sawm khawhmi hna kha lunglawm tein chaw na phurhter hna i  Ram le Miphun caah an Duty rian an philh dih. Maw, Media hna lih le biaperh le hmanthlak thurnawmin chaw na kawlnak cu i phuang ko. Maw, Hakha. Maw, Thantlang. Maw,  Falam. Maw, Tidim. Maw Tonzang. Maw Matupi. Maw, Mindat. Maw, Palewa. Maw, Kanpalet na  unau na rem lo nak cu i phuang ko. Kan Miphun dihlak in kan phuan khawh chungin kan sual i phuang hna usih law, BAWIPA ngaihthiam hal hna usih.

Salm 32:1-7: A sualnak ngaithiam a si i a palhnak maimilh a simi cu a lung aa lawm. BAWIPA nih, sual a phawt lomi le a lung chungah hlennak a ngei lomi cu a lung aa lawm. Ka sualnak kha ka phuan hna lo tikah chun nitlak in ka țap. BAWIPA, chunzan in dan na ka tat i ka thazang cu a dihlak in a zor, țhal ni lin nih khua a roter bantuk khin ka thazang cu a ro dih. Khi tikah ka sualnak cu NANGMAH  sinah ka phuan hna; țhat lonak ka tuahmi cu ka thup hna lo. NANGMAH sinah khan ka phuan dih hna i ka nawlbuarnak vialte na ka ngaihthiam dih. Cucaah zumhawkltlak a simi vialte hna nih cun, herhnak caan an ton tikah na sinah thla an cam awk a si; tilian a tlun tikah a phan hna lai lo. NANGMAH cu kaa thuhnak hmun na si, harnak chungin na ka khamh lai. NANGMAH nih na ka huhphenh caah fakpi na khamhnak cu hla in ka thangțhat lai.

BAWIPA nih, “Na zulh awk hnga lam kha kan hmuhsak lai, kan cawnpiak lai i lungthin kan cheuh lai. Na duhnak zulhter awkah chak le kaahlawmh a haumi rang le laa bantukin hrut hlah,” a ka ti. Johan 1:8-10 Kannih nih, sualnak kan ngei lo, kan ti ahcun kanmah le kanmah kan i hlen a si i kan chungah biatak a um lo. Sihmanhselaw PATHIAN sinah kan sualnak cu kan phuan hna ahcun, a DINGMI le ZUMH AWK TLAKMI a si caah, a Biakam kha let loin kan sualnak kha a kan ngaihthiam lai i kan palhnak vialte kha a ksn thianhpiak dih lai. Asinain kan sual lo kan ti ahcun PATHIAN cu lihchim ah kan ser i s Bia cu kan chungah a um lo.

Gredit – Evan. Tluang Lian

Be the first to comment

Leave a Reply

Your email address will not be published.


*