Sual Phuan In Thla Kan Cam Lai-Lamkaltu Evan. Tluang Lian

KAN RUAH LEM LO MI, THLUACHUAH DAWNTU

Face book le thil dangdang i kan i post a tam tuk ahcun BAWIPA kilvennak a zawrter khawh. Cucaah na fa le kha na dawt hna ahcun BAWIPA sintu ah up/chia ko hna law, face book chungkhan rak hnawt cang hna. Nan inn chung i nan hmantlak nganpi in naa taarmi nihkhan na hmuh ding thluachuah a dawnh khawh. Thluachuah kan titikah BAWIPA huhphenhnak le a sinin a ra dingmi, kan hmuh dingmi thil tampi hna kha a kir ter khawh.

Relchap
=====
SUAL PHUAN IN THLA KAN CAM LAI

keimah sualnak, ka chungkhar le kan Ministry sualnak kan i phuang i kan thok cang. Kan Miphun sualnak vialte kan phuan lai. BAWIPA ngaihthiam le zaangfah kan nawl lai.

BAWIPA zaangfahnak tampi kan hmuh hrimhrim lai. Kan zawtnak zongah a kan damter țhan lai. A poi bik cu kan zawt sual zong i kan dam ti lo mi kha a si. Thih tiang sualnak a tuahmi le thi ding hrimhrim ah BAWIPA nih a ruah lomi hna cu an dam țhan lai.

Relchap
===
KAN INN TE AH UM HNA USIH

Salm 90:1
BAWIPA cu zungzal kan inn a si caah, zungzal kan inn taktak a si mi, BAWIPA chungtu ah um ( Stay Home) tuah zungzal ko.

Johan 15:5
BAWIPA JESUH KHRIH chungah na um peng,
( Stay Home ) na tuah peng ahcun, thei tampi na tlai ko lai. Harsatnak na tonmi nih an tei lai lo, BAWIPA khamhnak na hmuh lengmang lai.

Vawleicung zumlotu hna bantuk in taksa lei lawngin aa ralringmi si loin, BAWIPA he na pehtlaihnak kha țhatter chinchin law, rul bantuk in va ralring ve law thuro bantukin țhilthalo va tuah hlah.

Na zawt dam lo sual i na thinphan i, thlacampi, thlacampiak na duh ahcun ph rak ka chawn. A si lo le midang zong thlacam cah ko hna.

Ka ph number- 09400303083

Lamkaltu
Tluang Lian ( Martar)

Relchap
=======
A KAN DAMTER ȚHAN LAI

Biahmaițhi: Vansang ngaiin mikip kan um i kan hmailei lam a pih i a muihtuk lio caanah, Kan dam țhannak ding Lam hun hmuh cu! Ka thlarauin ka hrum i, thinlung kekkuai chungin lunglawmhnak mitthli biangah a hung luang! A Zaangfahnak Thinlung nih țhazaangthar a hun ka pek! BAWIPA kan PATHIAN cungah SUNPARNAK le UPATNAK um ko seh.

KAN LUNG KAN ȚHUMIN KAN I NGAICHIH KHO LO

2 Chanrelnak 7:13-14 kan zoh tikah, BAWIPA nih vanruah hna a phih i a mi hna lakah rai a tlunter tikah, ” Ka MIN in kawhmi ka mi hna nih khan an lung an țhumh i thla an cam i ka Hmai an kawl i an lam țhalo khan an i mer ahcun, ka ngaihthiam hna lai i ka damter hna lai,” a ti.

2 Chanrelnak 7:14 bantuk hin Nineveh khuami hna nih khan BAWIPA Bia, profet Jonah chimmi cu an rak ngaih i an lung an țhumh i an lam țha lo in an i mer tikah BAWIPA nih a rak ngaithiam hna i a rak hrawk țhan hna lo.

Juda siangpahrang Manasseh cu faakpiin BAWIPA Hmai ah a rak sual i Babilon sal ah hruai a rak si. Harnak a ton tikah faakpi in a rak i țhumh i BAWIPA sinah thla a rak cam. A nawlnak cu BAWIPA nih a rak cohlan piak i Jerusalem ah a kirpi țhan ( 2 Chan 33:11-13).

Kan nih Chinmi BAWIPA a biatu hna sin zongah, vainam le rai nih a hun kan phak i mi tampi an thih cuahmah i an zawt cuahmah tikah, kan hmailei hi a mui hringhran ko. BAWIPA sinah nawlpiaktu ding, Evangelist hna le Pastor bochanmi tu tam tuk an hun thih tikah, thling a za i tuk a sum i ningți in kan um hna. “BAWIPA nih kan thlacam nawlnak a ngai ti lo i, rai in maw kan thih dih ko ne lai,” kan ti!

PATHIAN Bia Profet Jonah phuan mi kha an theih tikah Nineveh khuami hna nih BAWIPA Hmaiah anlung an rak țhumh. Harnak a cung i a tlun tikah Manasseh nih a lung a țhumh i thla a cam. Kan nih tah? Kan sual ruang a si pek si lo pek, hi vialte harnak le thihnak kan ton cuah cang hnu ahhin, BAWIPA Hmaiah ho dah aa țhumh lai i a sual aa phuang lai i thla a cam ve lai?

Kan sualruang thengah a si lo, vawlei pumpi nih an ton cio ko kan ti lai maw? Vawlei pumpi nih an tonmi thihnak hna le rai hna hi minung sual ruangah pei a si fom cu! BAWIPA JESUH hmanh vawlei minung hna ruangah misual ah rel a rak si ve kha! Nang le kei zong sualnak kan tuah pek tuah lo pek, ram a sual ruangah misual ah rel kan si ve lo maw?

Moses, Nehemiah le Daniel cu anmah an sual bak lo nain an miphun nih harnak faak an ton tikah, BAWIPA Hmai ah an i țhum i an țhu i rawl an ul i anmah sualnak le an miphun sual an phuang i BAWIPA cu ngaithiam an rak hal!

ZEITIN DAH KAN DAM NE LAI?

2 Chan 7:14 bantukin kan lung kan țhum kho ti lo, kan i ngaichih kho ti lo, kan lam țha loin kan i mer kho fawn lo. BAWIPA Hmai ah aa țhumhmi le a ngaichihmi tlawmpal cu an um ko lai. Sihmanhselaw Kan zapi cun kan naisai hrim lo! Kan hak tuk ko rih hna! Isaiah 48:10, “Temhinnak mei chungah kan hneksak hna, asinain santlai lo nan rak si,” a rak ti bang, san kan rak tlai hrim lo, kan hak lillel tuk ko rih hna.

Sihmanhselaw, BAWIPA a kan Dawtu nihcun a kan damter țhan lai! Kan luatnak nak ding caah Lam a um ko rih. A kan ngaihthiam țhan lai, a kan damter țhan lai.

BAWIPA VEL IN KAN DAM ȚHAN LAI

Isaiah 57:17
An sual ruang le an duhfah ruangah an cungah ka thin a rak hung, cucaah cun ka thinhun in dan ka tat hna. Sihmanhse law an lung a hak i anmah kalning thiamthiam khan an kal.

57:18-19
An umtuning kha ka hmuh cang; Sihmanhselaw ka damter hna lai; ngaih a chiami kha ka hnemh hna lai. An dihlak in, lamnai i a ummi he lamhla i a ummi he, ka daihnak kan pek hna lai, ka ti hna. Ka mi cu ka damter țhan hna lai.
PATHIAN Zaangfahnak Vel cu na cungah um ko seh.

* Kan pehțhante lai

* Share chinte mu

Lamkaltu
Tluang Lian ( Martar)

Pehrih
=====
BAWIPA Zaangfahnak le Vel na cung le na chungkhar chungah um ko seh. BAWIPA țhawnnak nih in hupphengin damnak in pe ko hna seh. A Zaangfahnak nih in hnem hna selaw a Velngeihnak in in umpi ko hna seh.

BAWIPA Vel Khuaruahhar cu AMAH a autu nan dihlak cungah rak tlung ko seh.

BAWIPA nih in dam ter ko hna seh.

Lam Kal Tu Even Tluang Lian ( martar )

Be the first to comment

Leave a Reply

Your email address will not be published.


*