Falam Peng Taal Khua Ralhrang Nih An Hrawh,Biakinn Zong An Hrawh

Falam Peng Taal Khua Ralhrang Nih An Hrawh,Biakinn Zong An Hrawh

Falam peng Taal khua inn hna cu ralhrang nih an hrawh,vok ar an thah dih hna,ralhrang thazaang 100 hrawng cu Taal khua ah ninga hrawng khua an sa,inn lawng si lo in biakinn zong an hrawh,vok ar zong an thah dih hna.Taal khua an luhhnawh i an hrawh hi a voihnihnak a si cang.
==

Thawngdang
Ralhrangbu nih an tlaih mi hna cu ralphaw ah hman an timh hna

Ralhrangbu nih an tlaih mi hna cu ral ramah an hren hna Karenni Dimawso pengah ralhrangbu nih an tlaihmi hna khuami pawl cu raltuknak hmunah an hruai hna i, ral ramah an hren hna tiah theih a si.

Mah an hruaimi hna hi Kum 15 mi pa pakhat le a pa, nu pakhat le midang pahnih, an dihlak 5 an si i, an nih hi August 14 ah Dimawso peng, Thiphokalo khuapawngah an tlai mi hna an si.

An tlaihmi hna hi ralhrangbu nih PDF he pehtlaihnak an ngei tiin palek sin ah ap lo in an kalnak paoh an hruai hna. An chungle nih amahkhan in thlahpiak dingin an nawl hna zongah an duh lo tiah kum 15 lawng a si rih mi a pupa nih a chim.

Mah an tlaihmi kum 15 pa hi a chuahka in a ngandam lo ruangah operation an tuahnak hma zong a dam rih lo mi, Asthma zawtnak zong a ngei mi a si.

Kan hnu August 13 ah Thiphokalo khua ah ralhrangbu le KNDF, PDF kar kahdohnak ruangah mah pawngkam khua 6 in khuami 2000 hrawng cu an zaam i, a thaizing ah an khua ah eidin le a herh mi thilri hna lak dingin an kal lio ah an tlaih mihna a si.

An tlaihmi 5 hna hi August 16 chun ah Dimawso in meng 10 leng a hlatnak Thiphian khualeng ah hri in an hren hna, an kaltak mi cu khuami nih an va hmuh hna. Ralhrangbu nih mahtin an hruainak hi i phenhnak caah hman an duh ruangah a si tiah theih a si.

Dimawso peng ralzaam hna hi kahdohnak a um rih caah atu tiang an khua ah an kir kho rih lo, eidin le dinti an har ngai tiah ralzaam a bawmhchanhtu phu riantuan nu pakhat nih a chim tiah Irrawaddy news nih a tial.
===

Thawngdang
AA nih ukknak lei cawnpiak dingin an hruaimi khuaami 5 an zam

AA nih ukknak lei cawnpiak dingin an hruaimi khuaami 5 an zam AA nih khua i thithruai ning kan in cawnpiak hna lai tiah kan hnu thla 2 hrawngah an hruai mi hna Paletwa peng Pichawng khuami (5) hna cu an zaam ruangah AA nih an tlerhkhawn hna tiah theih a si.

hi kong he pehtlaih in khuami pakhat nih AA nih training pek dingin an hruaimi (5) hna hi AA nih an kan tlerhkhawn ruangah kan rak zaam tiah an chim.

Paletwa peng Pichawng khuakomh chungah khuami hna cu AA nih ULA kan dirh lai tiin khua 1 ah minung 3 cio a hramhram in an auh hna.

Paletwa peng nitlaklei le nichuahlei khua vialte zong kan hnu thla in an auh mi hna a si. AA nih khuami hna cu hramhram in an auh hna i, training an pek hna hnuah khua chungah uktu rian an tuanter hna lai tiah khuami cheukhat nih an chim.

Paletwa nitlaklei Bangladesh ramri, Pichawng ahhin khua 30 renglo an um i, 2019 kum in AA nih umhmun an khuarnak a si i, Paletwa peng hmun tampi ah AA pawl an um tiah theih a si.
Ref; PLW news
===

Thawngdang
Mipi Runvennak Caah Ral Kan Do Hrim Lai

Mipi an nunnak le an inn lo kil vennak ding caah ral cu kan do hrim lai i a ni le caan tu cu i ceih in bia kan khiah lai tiah NUG caan karlak president Du Wa Lah Shi nih nihin an tuah mi NUG caan kel meeting (19.20.21) ah a chim.

“NUG nih cun nifatin in thahnawn a tong mi mipi an nunnak le an inn lo pawl kil vennak ding caah ral kan do hrim lai i timhtuahnak zong rian ngeitu hna nih dinh lo in an tawlrel cuahmah nak kong le thok ni cu i ceih in bia khiah hnu ah cabinet ah langhter than hnu ah i bawm in biakhiah than ding kong” caan karlak president Du Wah La Shi nih a chim.

Caan karlak president nih biatawi chimnak a ngeih i a ra laimi September thla ah UN Palai U Kyaw Moe Tun cu pehtlai in a riantuan ter ding kong vawlei pi nih cohlan piak ding kong cu a biapi mi thil a si caah remnak le ruahnak petu phu pawl nih an tawlrel cuahmah nak kong, ASEAN Palai Kawlram a rak phanh tikah NUG he tonbiaruah ding kong zong an ceih dih cang nak kong a chim.

Covid – 19 khamnak kong he pehtlai in Covid – 19 khamtu phu in Dr Zaw Wai Soe hruainak in ram chung phu pawl, ram dang phu pawl hna he i pehtlai in tawlrel an i zuamnak kong, Covid – 19 khamnak ding ah ralhrang pawl i tawlrel ning an dai thlannak,mipi tu kilven lo in an mah ukn k lawng kilven duhnak hna hi Kawlram pi a rawhral ter tu ding a si caah Covid – 19 khamnak ding kong ah cozah vialte he mipi vialte zong i bawm in tawlrel a herh nak kong zong caan karlak President nih a chim.
===

Thawngdang
Mongtaw Peng Padin Khuabawi Heiamtlai Minung 5 Nih An Tlaih

Mongtaw Peng Padin Khuabawi Heiamtlai Minung 5 Nih An Tlaih Rakhine ram chaklei Mongtaw peng Padin khuabawi Mamut Shaw Bi cu hriamtlai minung 5 nih nihin August 17 zinglei ah an tlaih tiah theih a si.

Khuabawi hi hriamtlai minungg 5 nih an innka bauh in an innchung an luh hnuah meithal in an tinh i an tlaih, an ngeih mi sui le phaisa zong an lak piak, zeiruang ah an tlaih ti belte kan thei lo tiah Padin khuanu khuapa pakhat nih a chim.

Khuabawi pa hi tuzing suimilam 2 hrawngah hmaigup mi hriamtlai 5 nih an innka an bauh i an luhnnawh hnuah meithal he a lu ah an tinh i an hruai.Khua ah zeidah an hruai, zei minung dah an si ti kan thei lo tiah Pantawpin khuabawi nih a chim.

Hriamtlai minunh 5 hna hi Muslim an si i, meithal a tawi mi 2, a sau mi 1 le namte 2 an put i, khuabawipa hi meithal in an tinh hnuah a nupi cu an thil ngeih mi chuah dingin an ti hna ruangah an ngeihmi sui hlawn tical (40), phone 2, facang hna zong an lak piak hna tiah theih a si.

Kanyintan khua hi Mongtaw thlanglei ah a um mi a si i, an tlaih mi U Shaw Bi hi kum 2020 thawkin khuabawi rian a tuan lio a si.
Ref; DMG
===

Thawngdang
Minkin Ah Ralhrang Zu Ri Nih Sualnak Ngei Lo Mipi An Kahthah Hna

Minkin Ah Ralhrang Zu Ri Nih Sualnak Ngei Lo Mipi An Kahthah Hna August 17 zanlei suimilam 2 hrawngah Sagaing ramthen, Minkin ah zuu ri mi ralhrangbu hna nih civil mi pakhat cu naih tein an kah, nu pahnih zong hliam an pu tiah mit in a hmuhmi hna nih an chim.

Hi thil hi Mungyua in Minkin lei a kal mi Minkin tilawng dinhnak hmun ah a cang mi a si i, tiva kam lungcungah Kunya a khai lio mi Ko Zaw Myo Myint (kum 39) cu zuu ri mi rallokap pakhat nih ziah na hmai na huh lo tiin a hal.

Ko Zaw Myo Myint hi Mungyua ah a kal ding mi tilawngah naupawi mi pakhat a rak thlah mi a si.Tilawng dinhnak ah hmaihuh a phoih i kunya a khai lio a si.

Ngaihthiam a hal zong ah a duh lo i, an chuih, an lamh hnuah rallokap pahnih nih a khua an hal i, Minkin a ti hnuah Kyuntaw nitlak lei ka si a ti than ruangah na lih tiin a lu ah meithal sawh pah in an kah tiah a hmuhmi nih an chim.

Meithal hi voi 2-3 an kah ruangah tiva kam ah a thu lio mi hna lak ah nu pahnih hliam an tuar, pakhat Ma Zin Mar Win cu a thi cang tiah Minkin khua mi sin in theih a si.

Zaw Myo Myint hi nupi le fa 3 a ngei mi a si.A ruak hi khua zeidah an kalpi ti zong theih a si rih lo pinah a chungle sin zong ah thawng an thanh rih lo tiah Kyuntaw khuami nih an chim.
Ref; Myanmar Now

The Chin Now

Be the first to comment

Leave a Reply

Your email address will not be published.


*