Good News : Kanpetlet ah SAC Ralhrang 6 an Thi, SAC Ralhrang nih Kanpetlet ah Thazaang an Chap Thluahmah

Kanpetlet ah SAC Ralhrang 6 an Thi, SAC Ralhrang nih Kanpetlet ah Thazaang an Chap Thluahmah
————-
May 28 in aa thawkmi SAC ralhrang le CDF-Kanpetlet karlak kahdohnak ah SAC ralhrang 6 an thi, tiah CDF-Kanpetlet chungtel pakhat nih RFA ah a chim. Kanpetlet peng, Makya khuate ah SAC ralhrang pawl lut kho lo ding in CDF nih May 28 thawk in an kham hna i nihin zinglei tiang kahdohnk pehzul in a um.

SAC ralhrang nih a lang in miakpi in CDF pawl an kah hna pin ah Kyaukhtu le Gangaw lei zong in ralkap thazaang an rak chap hna. Ralhriam le thazaang lei in SAC rahrang an tthawn deuh tuk caah khua dangdang zong nih Kanpetlet na kan bawmh a herh ko, tiah a cunglei CDF-Kanpetlet chungtel nih a chim.

Kanpetlet cu Mindat he meng 20 hrawng a hlatnak ah a ummi a si i, May 16 thawk in SAC ralhrang nih helicopter in ralhrang thazaang tampi an rak chap caah Kanpetlet khuami tam u nih an khua an zaamtak hna. The Chin Journal

thawngpang dang : Jehovah Pathian Sinah Thla Kan Cam Ah Cun An Mah Le An Mah A Thahter Dih Ko Hna Lai

JEHOVAH PATHIAN NIH ANMAH LE ANMAH KHA A DOHTER HNA. Biaceihtu 7:22. 2Chan. 20:23 Nihin kan ram boruak caah pumpâk in siseh, chungkhar in siseh, a bu bu in siseh thla a camtawnmi hna nih thlacam zia kan theihthiam khawh nâkhnga voi hnih khêng te Baibal ah fiang tein kan hmuhmi theihhngalhnâk he thâzâng la cio hna u sih.Zeicatiah raldohnâk hriamnâm phun tling le ralkap thazâng tampi he a ummi cozah pakhat a simi kha sakah nâk ah serchommi meithal le lakhruak in cahmi hriamnam cheu khat he doh i tei kan timh tikah a cân cân ah cun kan thlacam zâng zong tlung set loin kan um cân le lung dong i kan um cân zong a um kho ko.

Kawlram tlângcung mi tamdeuh cu a nungmi Jehovah Pathian a biatu Kristian kan si bangin kan i țhumhnâk bik kan Baibal ah hin voi hnih khêng te kan hmuhmi cu Pathian nung a biami Israel a dotu milembia mibu kha Jehovah Pathian nih ANMAH LE ANMAH KHA A DOHTER HNA i Israel nih teinâk an rak conâk kong kha a si.A voi khatnâk ah kan hmuhmi cu kum sarih chung Israel a rak uktu Median ralkap bu kha Gideon le mi za thum hna nih an rak doh i Gideon le a ralkap za thum hna nih teinâk an rak comi kha a si.

Hi kongah Baibal nih a țialmi cu:-Cun mi za thum hna nih muko kha an tum tikah, Jehovah nih an riahnâk dihlak ah ANMAH LE ANMAH kha vainam in a tukter hna i.an zâm. Biaceihtu 7:22 Hi thil a can hlân deuh ah Baibal nih, ‘cun Israel tefa kha Jehovah sinah an au,’ tiah a ti. Biaceihtu 6:6.Gideon le mi zathum lawng nih Midian mi thong tampi an teinâk ah a biapi bik mi cu Jehovah an Pathian sinah an au, ti hi a si.Nihin zongah hi tluk in a chiakha tak takmi ralkap uknâk chungin teinâk le luatnâk kan hmuh khawhnâk dingah a hrampi tak tak a simi cu ralthuam le ralkap thazâng ah si loin Jehovah Pathian sinah au hi a si.

Israel aunâk aw kha Jehovah nih a rak theih i Gideon le mi zathum hna nih an doh hna hlan ah Jehovah Pathian nih Midian ralkap bu cu ANMAH LE ANMAH a dohter hna, tiah a ti. Hihi Israel nih teinâk a conâk kongah a hrampi tak tak cu a si. Kan nih zong nih kan biakmi Jehovah sinah biatak tein kan au ahcun hriamnam tling le ralkap thazâng tampi he a ummi hna hi serchommi meithal he mibu kilvêngtu ralkap hna nih an doh hlan ah kan kawh auh lengmang mi Jehovah Pathian nih ANMAH LE ANMAH kha a dohter khawh ko hna. A voi hnihnâk cu Chanrelnâk pa hnihnâk dal 20 câng 23 ah kan hmuh.Israel ral a rak si pengmi Ammon mi le Moab mi hna kha Judah siangpahrâng Jehosafat nih a rak tei hna nâk ah pakhatnâk i kan hmuh mi cu, Mibu tampi he a rak pokmi kha Jehosafat nih a țih hna caah Jehovah kawl dingin â pe i ram pumpi ah rawl ulhnâk thawng kha a thanh, tiah a ti. 2Cha. 20:1-3.

Jehosafat le mibu hna nih rawl ul in an kawhmi Jehovah Pathian cu a cawl ve i Israel a dotu ding mibu hna cu ANMAH LE ANMAH kha a dohter hna. Israel mi hna nih ralram an phâk tik ah an hmuhmi cu Jehovah Pathian nih ANMAH LE ANMAH a rak dohtermi mi thi ruak lawng te kha a si. 2Cha. 20:24.Rawl ul in Jehovah kan Pathian hi kan auh tak tak ahcun kan mino hna nih an doh hna hlan hmanh in Pathian nih ANMAH LE ANMAH hi a dohter khawh ko hna timi Baibal Biatak hi i tlaih in kan biakmi Jehovah Pathian hi biatak tein au lengmang u sih. Zeicatiah Teinâk cu Jehovah kan Pathian ta a si. Credit:Evan Rualuk

Be the first to comment

Leave a Reply

Your email address will not be published.


*