Good News: Nihin May 26 tiang kahdohnak 100 leng a chuak, Ralhrangbu 200 Leng An Thi, Lung A Hmui Kho Taktak

Brigade 5 Chungah May Thlachung Kahdohnak Voi zakhat ren KNUglo a chuak, Ralhrangbu 200 Leng An Thi
========================================
Nihin May 26 tiang kahdohnak 100 leng a chuak, ralhrangbu lei 100 deng an thi tiah KNU Brigade 5 chimhnak nawlngei Lt.Col. Saw Kale Doe nih hi ti hin a chim. “An mah lei BGF hna he fonh in kanmah lei ah thazaang an rak i chap caah kan karah buainak zong a zual, i kahnak zong a fak chin lengmang, A dai cang ti hrim a um lo. May thla thawkin nihin tiang voi 193 kan i kap cang” tiah a ti.

Voi 100 leng i kahnak ah ralhrangbu 128 an thi, 180 hriamhma an pu, Mawtaw 9 kan hrawh, thil phorhnak ah an hman mi Raang 12 a thi. Kanmah lei pahnih an nunnak a liam ve, Minung pakua hma kan pu tiah Lt.Col. Saw Kale Doe nih a ti. Ralhrangbu lei nih khuachung le Dum/lo ah meithal ngan lung 98 an kah, inn 5 an hrawh, Takawtha khua ah inndong 40 leng mei in an khangh i thilri le facang hna an lak piak hna tiah theih a si.

KNU Brigade 5 ah a cawlcang mi ralhrangbu hna cu “MOC 5 tang LIB 405, 407, 408 le BGF battalion 1103, 1014, 1011, 1018 le 1019 hna an si. Atu ah LID 44 tang battalion pawl zong Bilin leiin an rak kai tiah kan theih, minung le tatyin pawl tu cu fiangin kan chim kho rih lo tiah KNU nih a chim. May 24 le 25 ah zong BGF pawl he i kahnak a um than. BGF lei an hruaitu he minung 3 an thi, 11 hma an pu tiah theih a si. The Chin Post

thawngpang dang relchap : Ralhrangbu Deputy Home Minister Naupa Ko Soe Moe Hlaing Biahalnak Hmun Ah A Thi
===================================
Ralhrangbu Deputy Home Minister Naupa, ramkhel kongah thong a raktla bal cang mi ralhrangbu nih an tlaih hnuah biahalnak hmun ah an hremnak ah a nunnak a liam tiah theih a si.

Hi kong he pehtlaih in Kawlram ramkhel thongtla hlun bu steering committee chungtel U Tun Kyi nih “Ko Soe Moe Hlaing hi ramkhel thongtla hlun a si. Lt.Col. Tan Hlaing naupa a si. An unau in lamdang cio ah an kal.

May 22 zaanah Pago ah an tlaih, 24 ah a ruak rak la uh an ti, kan va lak tikah a ruak cu pe lo in Mingalardo ralhrangbu siizung ah an kuat. Mah ahcun a pum an hlai i mahka ahcun an vui ko. An sual tak tak – Ka chim duh mi cu a chungle hmanh tha tein chimchawnh an i duh ter lo, Unau zong an in ngan lo ti mi hi a si” tiah a chim.

Ko Soe Moe Hlaing hi Pago Bawneci biahalnak sakhan ah an hremnak hliamhma celh lo in a thi mi a si i a ruak hi a chungle zong zohter an sianh hna lo tiah theih a si.

thawngpang dang : Loklung Ralzaam Naupawi Pakhat an Zaamnak Hmun ah Nau aa Then
————————————-
Loklung ralzaam hna lak ah aa telmi hringtu nu pakhat cu an zaamnak hmun naute a ngei, tiah Loklung ralzam kong thlacam sawmnak ah HBA nih a langhter. May 18 le 19 ah Rungtlang SAC ralhrang (266) nih Loklung khuapawng lei ah miakpi in an kah hna caah Loklung khuami cu an zaam dih hna.

A zaammi lak ah aa telmi pastor pakhat nih, “Fak piin thlacampi kan herh ko. Loklung cu hmun kip ah kan rol i khua a tthing ko. Lungrethei le thinphang in kan um lio a si. Vok le Ar zong veh lengmang ngam an si lo caah kawm bauh in kan thlah hna,” tiah a chim.

An zaamnak hmun ah tlangrai zong nih a tlak hna i ngakchia a zawmi an um len pin ah naupawi pakhat zong zaamnak hmun ah cun nau aa tthen. “Tlangrai nih a kan phak i kan ngakchia a zawmi an um pah len. Naupawi zong an um i pakhat cu zaamnak hmun ah aa then cang. Kum 80 cung tar zong an i tel. Zawt buin zaampimi zong an i tel.

Thlacampiak kan herh hringhran ko,” tiah HBA ttuanvo ngeitu sin ah a cunglei pastor nih a chim chap. Loklung ralzam hna ca ah ramchung le ramleng khuasa Laimi vialte nih thalchampiak ding in HBA nih sawmnak zong a tuah. Loklung hi a khua ning in an chuahtak dih i khuachung ah thluaktlinglo minung pahnih lawng an taang. A zaammi an zapi ah milu 850 hrawng an si, tiah pastor pakhat nih The Chin Journal ah a rak chim. The Chin Journal

Be the first to comment

Leave a Reply

Your email address will not be published.


*