Hakha ah SAC Ralhrang Helicopter Pakhat a Phan

Hakha ah SAC Ralhrang Helicopter Pakhat a Phan
————-
Nihin chun sml. 2:30 hrawng ah Hakha ah SAC ralhrang helicopter pakhat a phan i Rungtlang lei ah a ttum. Kalay lei in SAC ralhrang helicopter pahnih an rak kai nain Hakha ah pakhat lawng hi a rak phan. Rungtlang ah caan tlawmpalte a um i sml. 3:05 hrawng ah a kir tthan colh. The Chin Journal

thawngpang dang : “Ka fapa na sinpi maw tiah hal kan duh lo. Dam tein um rak i zuam mu : Dr. Sasa Nu Sin A Fapa Dawt Biacah

Dr. Sasa le a nu chikhat te phone an i chonh nak ah hringtu a nu nih a fapa sin ah hithihin bia a cah taak…zeizong vialte ah tha tein rak i zohkhenh tiah ka fapa chimh kan duh. “Ka fapa vawlei cung na rak sem ka tein harsatnak tampi kan rak tuar. Na chuah ni ah ruah a rak sur, Na nu nih thla kan cawmpiak ka fapa na cungah hin Pathian nih tuah a duh mi hi zeidah a si?

“Ka fapa na hngakchiat lio tein na cungah thil khuaruahhar lawng te ka hmuh. kan ruah lomi thil hi na cungah a tlung peng. Na nu nih ka zumh mi cu ka fapa vawlei cung a chuah chan hi amah ca thatnak lawng tuah ding ah a silo, Ka fapa hi midang caah a herhmi tuah piak tu dingah Pathian nih hin vawlei ah na rak thlah mi a si ko.

“Cu ruangah na lung rak sau ko. Ngaihthiamnak thinlung rak nei ko. Ka fapa na si khawh tawk in mipi caah a tha bik in riantuan ko Pathian nih hlawhtlinnak an pek lai.

“Ka fapa na nu nih hin nan tuah mi Naingaizi kong hi zeihmanh ka thei lo Cozah thar nan dirh mi zong ka theih lo. Sinain kan ram mipi nih kan pek mi mee pawl hi a lak si lo dingin mi tam u nih kan duh mi Democracy cu na riantuan pi hawi pawl he kut i tlai in hlawhtlinnak nan hmuh tiang rak tuan ko uh! Na nu nih kan tuah piak khawh mi cu Pathian sin thlacam lawng hi a si ko ee…ka fapa”. tiah a ti.

thawngpang dang : Min Aung Hlaing Thihhrimolh Lainawng Pa Nih A Hlen Khawhmi Laimi Nan Um Maw

ThihHriMolh.Phungthlukbia 17:15 “Mithalo thiamcoh le miding sualphawt hi an pahnih in Bawipa mithmuh ah fihnung an si veve”Lucifer hi thih-hri-molh zawtnak a ngeih hnu ah Pathian tluk si ding le nawlngeihnak (power) vialte lak a duh. Vancung ah ral dohnak a um tikah, ral a sung. Vancungmi cheu thum cheu khat a hlen khawh hna i vawlei ah aa tlakpi hna. (Bia 12:8-9). A hlen khawhmi vialte zong thih-hri-molh zawtnak a ngeihter dih hna.Ahab siangpahrang le a first lady Jezebel zong Lucifer nih a hlen khawh hna caah thih-hri-molh zawtnak an ngei ve. Naboth an thah hnu ah a mitsur dum an chuh. Thih-hri-molh mi cu mithah le thil chuh hi zei ah an rel lo. MAH ralkap zong nih mi an thah, thil an chuh ve hna.

Bawipa nih “Ka thin na ka phawh hlei ah Israel mi na sualter hna caah Naboth thi uico nih an liah bantuk in uico nih na thi an liah ve lai” a ti.(1King 21:22). Raldohnak hmun ah mipakhat nih tinh setsai mi ngei loin thal a kahmi nih Ahab cu a khen. A thi cu uico nih an liah ve (1King 22:34-38). A nupi Jezebel zong sar thih in a thi i a sa kha uico nih an ei.(2King 9:37)David fapa Amnon zong Lucifer nih a hlen caah thih-hri-molh zawtnak a ngei ve. A farnu Tamar kha a tlaihhrem hnu ah huatnak fak ngai in a huat. Absolom nih rawldanghnak a tuah lio, Amnon zu a rit lio ah, thingtan in an tuk i sarthih in a thi. (2Samuel 13:1-29). MAH ralkap zong nih nungak an thleihhrem ve hna.

Haman cu thih-hri-molh zawtnak a ngeih caah Israel mi vialte thah a timh hna. Mordekai thlainak dingah tung dong 50 a phun. Miphun a dawtu Esther nih rawlulhnak in siangpahrang a chimh tikah, Haman thih-hri-molh pa cu amah tu an thlai. (Esther 7:10)Thih-hri-molh cangmi hna cu thihnak hri nih a tlaih cang hna i a molh in an molh chin lengmang. Thih-hri-molh a simi hna: Adolf Hitler, Saddam Hussein, Muammar Gaddafi, Bin Laden, hna hi sualnak ngei lomi nunnak tamtuk a lami hna an si. Sarthih sawhsawh hmanh siloin thih chia taktak in an thi ve.

Min Aung Hlaing zong thih-hri-molh zawtnak in a zual ngaingai cang. Amah lawng thih cu a di a riam lo caah hawikawm tampi aa sawm hna. Tangka in a hlen hna. Power le bawi sinak in a hlen hna. Khuabawi le penguk le thim lomi bawi sinak in a hlen hna. A hlen khawh lomi kha meithal in a kahter hna. Thong a thlak hna. Khua a duahpiak hna. Thih-hri-molh lam a zulh caah a rau ti lai lo. Thih-hri-molh hna donghnak bantuk in a dong tuan ve lai.

Min Aung Hlaing thih-hri-molh misualpa nih a hlen khawhmi Laimi nan um sual maw? Nan um ahcun thih-hri-molh pa MAH hi zamtak cang u. Amah nan tih ahcun ramdang ah zam u. Ram thumnak nih an in zaangfah khawh rih hna. Laimi cu vakok nun ngeimi kan si. Dinnak le felnak le raldoh ah ralthami kan si. Thih-hri-molh lakah kan tuanbia i-tel hrimhrim hlah seh. Mipi khamhtu Jesuh lei ah tang zungzal ko hna u sih. Cathiang nih “Mithalo thiamcoh le miding sualphawt hi an pahnih in Bawipa mithmuh ah fihnung an si veve” a ti. (Pthlukbia 17:15) Cat’ialtu: Sailo Pa

Be the first to comment

Leave a Reply

Your email address will not be published.


*