Hakha ah SAC Ralhrang Thar an Phan, Khuathar Sianginn ah Hmuhma an Khuar

Nihin Myanmar ramchung ah a cangmi thawngpang cheukhat le Myanmar he aa pehtlaimi thawngpang tawi pawl.

Myanmar Mipi nih Chin Miphun He Kan Dir tiah an Langhter, Sifak Deuh Ralkap Fale pawl SAC Ralhrang nih Tangka Phalh in Khuapi ah an Thlah Hna. Myanmar Ngakchia 12 Millions Fimcawn Khawh lo kong ah UNICEF, UNESCO le Save the Children nih Ralrin Pek SAC Ralhrang nih Myanmar Ngakchia 53 an Thah Cang Hna Hakha ah SAC Ralhrang Thar an Phan

Myanmar Mipi nih Chin Miphun He Kan Dir tiah an Langhter. Chin ramkulh chung ah CDF le SAC ralhrang karlak kahdohnak pehzul in a um bang in Myanmar ramchung mino pawl nih Chinmi kan in dirpi hna, tiah an lungput an langter cio.

Abikin, Mindat ah ralhriam thangzaang a hleihluat hmang in SAC ralhrang nih ruru hranghrang in kahdohnak an tuah i, khuami 5,000 leng ralzam dirhmun in an ummi kong ah Myanmar rammipi nih an ngaihchiatnak le dirkamhnak an langhter. Yangon, Rakhine, Pakoku le Magwe ramtthen pawl ah Chinmi kan in dirpi hna tiah mino pawl nih an langhter.

Sifak SAC Ralhrang Fale pawl Tangka Phalh in Khuapi ah an Thlah Hna. Myanmar ramchung khuapi pawl ah runvennak tuah ding in SAC ralhrang nih sifak ralkap fale pawl nihlawh phalh in an thlah hna, tiah CDM ah aa telmi ralbawi pakhat nih DVB ah a chim.

“Sifak deuh ralkap fale pawl cu meithal kah ningcang ni tlawmpal training an pek hna i ni khat ah 7,000 MMK in khuapi pawl ah an thlah hna,” tiah a chim. SAC ralhrang nih uknak an chuh caan thawk in ralkap chungkhar pawl lengchuah le online hman kong ah cunglei an bawile nih fak piin an kham hna caah lenglei thil sining fiang in an thei lo tiah a chim chap.

Sihmanhsehlaw, atu ah cun SAC ralhrang bu in a zaamtakmi ralkap 1,000 leng an si cang i, SAC ralhrang bu doh awk ah raldohnak ningcang cawnpiaknak in mipi lei ah a ttangmi ralbawi cheukhat zong an um hna. Myanmar Ngakchia 12 Millions Fimcawn Khawh lo kong ah UNICEF, UNESCO le Save the Children nih Ralrin Pek

Myanmar ram ngakchia pawl fimcawng kho loin an umnak kum 1 leng a si cang pin ah SAC ralhrang nih uknak an chuh chap tik ah ngakchia pawl fimcawnnak, lungthin lei tthanchonak le an hmailei kong ah lungrethei dirhmun a si cang, tiah UNICEF, UNESCO le Save the Children nih ralrin peknak cathanh nihin ah an chuah.

Atulio Myanmar ram thil sining ruang ah abikin khuate lei ngakchia le pehtlaihnak a harnak hmun ah a ummi ngakchia pawl ca ko ah hnorsuannak nganpi a chuahpi lai, tiah an langhter.

“Ngakchia pawl fimcawnnak hmunhma cu ttihphannak le ral a umnak lonak hmun a si herh. Cucu Myanmar ram ngakchia hna caah abiapi bikmi a si. Tihphannak um lo tein le quality a ngeimi fimcawnnak Myanmar ngakchia pawl nih an tinco khawh lomi hi hmailei Myanmar ram techinfapar ca ah ttihnung dirhmun a si. Hi bantuk thil sining hi cohlan awk a ttha lo,” tiah cathanh ah an langhter.

CDM ah aa telmi saya/sayamate SAC nih rian in an phuah dihmi hna zong hi hmailei Myanmar ram fimcawnnak caah hnorsuannak nganpi a si, tiah an langhter chap.

SAC Ralhrang nih Myanmar Ngakchia 53 an Thah Cang Hna, February 1 thawk in May 18 tiang ah SAC ralhrang nih kumtlinglo Myanmar ram ngakchia 53 a thah cang hna, tiah Myanmar ramkhel thongtla bawmtu bu (AAPP) nih thawngpang an chuah.

Kumtlinglo ngakchia 53 an nunnak a liam cang pin ah a dang kumtlinglo ngakchia 73 hi SAC ralhrang nih an tlai hna i atu tiang thlah rih lomi an si. Phungninglo SAC ralhrang nih uknak an chuh hnu in Myanmar ramchung ngakchia hna ca zong ah humhimnak a um ti lo, tiah AAPP nih a langhter.

Hakha ah SAC Ralhrang Thar an Phan, Khuathar Sianginn ah Hmuhma an Khuar, Nihin (May 20) chun hrawng ah Hakha ah SAC ralhrang thar pawl motor in an rak phan, tiah thawng kan theih.

“Nihin chun hrawng ah khan an rak phan. Khuathar BEHS No. 2 sianginn ah hmunhma an la hna. A caancaan ah leng ah an chuak i an rak kir tthan lengmang,” tiah minung pakhat nih The Chin Journal ah a chim.

Nihin a phantharmi SAC ralhrang thar pawl cu Thantlang lam lei, Hakha University lei le Pyidawtha lei ah tiin an i tthen hna i an kalmi khuami pawl nih an hmuh hna. Thantlang lamlei ah a kalmi SAC ralhrang motor pakhat cu a lawng in Hakha ah a rak kir tthan. Nihin Hakha ah a phanmi SAC ralhrang motor hi 7 hrawng an si tiah an chim i nizan Kalay in a rak i thawhmi an si lai, tiah an zumh. The Chin Journal

Be the first to comment

Leave a Reply

Your email address will not be published.


*