Hakha CDF Nih SAC Ralhrang An Thahmi Hna An Tam Ngai Hi

Chinland Defense Force – Hakha nih Bungzung palek sakhan kahdohnak ah SAC ralhrang 20 hrawng an thah tiah Chinland Defense Force social media cahmai ah phung ning tein thawngthanhnak an tuah. Thawngthanhnak an tuahmi an langhtermi cu, “June 29, 2021 ni, zinglei suimilam 5:40am in 11:00am tiang,

Chin ramkulh, Hakha pengkomh, Bungzung palek sakhan ah SAC ralhrang palek, ralkap phu hna le CDF – Hakha phu kar kahdohnak a chuah ral lei (SAC ralhrang lei) in minung 20 hrawng an thi. CDF lei in a nunnak a liammi le hliamhma fah a tuarmi an um lo i, minung pakhat lawng nih tlawmpal aa hliam tiah Chinland Defense Force nih phungning tein an tarlangh hi a si.

Tulio hi Chin miphun ralkap hna nih SAC ralhrang an thahmi an tlawm lo. Nizan June 29 ni, zinglei suimilam 7:30am hrawng in suimilam 2 chung, Chin National Defense Force le SAC ralhrang phu kar kahdohnak a chuah i, SAC ralhrang lei in minung 20 an thih pinah hliamhma tuarmi zong an tam ti a si. Cun kanmah Chin ralkap CNDF lei in paraltha minung 4 nih a nunnak an pe ve tiah Chin National Defense Force nih phungning tein cathanh an chuah ve.

Nizan June 29 ni lawnglawng ah Chin ralkap CNDF le CDF nih SAC ralhrang pawl minung 40 an thah tinak a si. Kan Chin ralkap pawl Pathian nih a um pi ko hna. Kan hnu June 27 ni, chun suimilam pakhat hrawng ah Gangaw lei in Kalay myo lei a rak rami ralkap motor 3, minung thazaang 50 hrawng a phurtu ralkap motor hna cu Khuaicin khua le Tanphu khua (Laimi khua) kar ah,

Kalay PDF ralkap phu nih a thlithup in an kah i, SAC ralkap lei a tlawmbik minung 9 an thi pinah minung tampi nih hliamhma an tuar i, Kalay PDF lei in cun hliamtuar pakhat hmanh um hraw loin hnu an tolh than tiah Kalay PDF nih thawngthanhnak an tuah ve. Hi hna zong hi Chin ram lei rak kai in Chin miphun doh a timhmi an si theu lai nain Pathian nih lamtamtim ah KPDF hmang in an kan tei piak fawn.

Hriamnam tha tlamtling lo buin tu bantuk teinak an hmuhmi hi Pathian nih a dirpi hna timi a langh. Pathian thimmi miphun Chin miphun nih hi hnu hmailei zongah teinak an hmu chinchin lai. Kan teinak a simi Cung Pathian sinah thlacamnak in le a lam kip in kan ti khawhmi cio in mipi nih bawmh ve hna usih. Jesuh min in kan dohthlennak kan tei hrimhrim lai. Source: Chinland Defense Force

Be the first to comment

Leave a Reply

Your email address will not be published.


*