HLASAK THIAM SITI NURHALIZA

HLASAK THIAM SITI NURHALIZA

1998 kum hrawng, Malaysia hlasak thiam, awțha muidawh, ngaknu note Siti Nurhaliza a rak laar lio ahcun, Malaysia a phanmi Laimi tampi nih kan rak uar tuk cio ve. News chung i ahmaantlaak hna an ah hna i an umnak inn vampang hnaah an rak i tar len hna. Ka mi uar phunte a si ve caah ka lungchungin ka rak uar ngai ve. A hmanthlaak tiangtiang i taar tu cu ka rak i sum.

Zankhat cu BAWIPA nih Mangin Langhnak a ka hmuhter; Ka mang ahcun, ramlak thingkung tam ngai a umnak ahcun lam phei kau nawnpi khi a um i cu lam zulh cun hmailei ah ka kal. Ruah lopi in, cu lam ahcun keimah lei panhin hlasak thiam Siti Nurhaliza a rak rat cu ka hei hmuh! A lu cung sam zatceo hrawng anmah Muslim puannakte cu dawh tekhin aa khuh. A tak i ka rak uar bantukin ka mang zong ahcun ka uar thiam caah, khawika dah a kal hnga tiin thatho ngai in ka zoh peng!

Cuti i nuam ngai in ka zoh peng ko lio ahcun, chun laipi ahcun khua a hung mui tluahmah!

“Ee, chunmui pei a tlung ko hi,” ka ti. Ka hnu lei van kil lei khin tisor thawng bantuk Aw nganpi nih cun, “chun mui a tlun tung lo, PATHIAN Biaceih caan pei a phan cang cu,” tiah Aw kuapi nih cun a hun ka chonh! Aw nih a hun ka chonh le cangka cun, nimtlau a lek, tur cukmakin khua an hung ri thluah mah, zukzek zukzek tiin țek an hung tla!

Ka hmailei Vankil khin, mimtlau a si lomi Ceu nganpi ka hei hmuh i Cu Ceu cu a Ceu ngai caah, Siti Nurhaliza zong cu a hnu lei ah a hun i mer i cu Ceu cu a hei zoh ve! Cu Ceu a hei zoh le cangka cun, a Muslim puan lu khuhte cun a hmai a huh zawkzawk i a kut pahnih in faakpi in a hmai cu a huh i, ” Awi! Ka ning zak tuk! Awi! Ka ning zak tuk!” ti pah in lam thlanglei tupi thing lak ahcun i thuh awkah a zaam!

Matthai 24:29-30 “Cu caan harnak cu a dongh cangka ni cu a mui lai i thlapa cu a ceu ti lai lo, arfi cu van in an tla lai i vancung țhawnnak cu an i hnin lai. Cun Mi FAPA hmelchunhnak kha van ah a lang lai; Khi tikah vawlei cung miphun vialte kha an țap lai i Mi FAPA cu Lianngannak le Sunparnak he vancungin a rat kha an hmuh lai.”

Isaiah 2:21 ” BAWIPA cu vawlei kha hninh awk i a rat tikah, a thinhunnak kha zamtak awkah le a Lianngannak le a Sunparnak kha thuhtak awkah mi cu lungpang tamnak tlang lungkua hna le khor chungah khan an i thup lai.”

Biathlam 6:15-17 Cun vawleicung siangpahrang hna le uktu hna le ralbawi hna le mirum hna le mițhawng hna le midang vialte cu sal he a luat mi hna he tlang cung lungkua le lungpi toiah an i thup dih. Tlang le lungpi cu an auh hna i, ” kan nenh u law Bawițhutdan cungah a țhumi HMAI le TUUFA thinhunnak cun kan phenh tuah u! An thinlinh ni, ni Lian ngan cu a phan cang i aho dah a celh lai,” an ti.

Ka mit var ter a si hnu cun, Siti Nurhaliza le vawleimi hna cungah zeidah a tlung te lai ti kha ka hngalh i, Siti Nurhaliza siseh, vawlei mi lianngan si hna seh, a zumduh lo mi si hna seh, JESUH KHRIH Sunparnak Mui Ceunak an hmuh tik ahcun, an ning a zak lai i an ning a hngal ngamti lai lo.

Sihmanhselaw law kan nih cu, 1Thes 5:9 “PATHIAN nih a thinhunnak in awkah khan a kan thim lo, sihmanhselaw kan BAWIPA JESUH KHRIH thawngin khamhnak hmuh awkah a kan thim.

KHRIH Dawtmi
Tluang Lian ( Martar)

Be the first to comment

Leave a Reply

Your email address will not be published.


*