Hniarlawnthar pawng Kahdohnak ah SAC Ralhrang 5 Thi

Hniarlawnthar pawng Kahdohnak ah SAC Ralhrang 5 Thi

 

Nihin zinglei sml. 10:00 hrawng in aa thawkmi Hniarlawnthar pawng kahdohnak ah SAC ralhrang lei in minung 5 an thi, tiah CNF chimnak nawlngei Salai Htet Ni nih a chim.

 

“Hniarlawnthar pawng ah zinglei sml. 10:00 hrawng in i kahnak a um i, SAC ralhrang lei in minung 5 an thi. Kanmah CNA/CDF lei in mithi/thliampu kan um lo. Hmaitonh in kan i kap ti awk ngaingai a ttha lo. Anmah lei nih cun kahthlorh in an kah,” tiah Khonumthung ah a chim.

 

Hniarlawnthar ah kum 13 pa ngakchia pakhat telh in minung 4 zong SAC ralharng nih an tlaih hna.

 

“Khua ah um ngam a si ti lo caah hmundang ah kan i tthial chung pah dih ko,” tiah Hniarlawnthar pastor pakhat nih The Chin Journal ah a chim.

 

Rialti Khua ah SAC Ralhrang nih Biakinn Telh in Inn 4 an Khangh

 

Updated – Falam-Hakha karlak Lungrang khua pawngte Rialti khua ah SAC ralhrang nih biakinn telh in inn 4 an khangh, tiah thawng kan theih.

 

Rialti cu Falam peng, Thlanrawn le Lungrang karlak ah a ummi inn 7 hrawngte an umnak khua a si.

 

“A kaangmi inn pawl lak ah Pu Sui Cem inn le Church Chairman Pu Lal Uk i a pa inn zong an i tel hna. Inn dang pawl zong hi an khangh chap khawh men,” tiah minung pakhat nih The Chin Journal ah a chim.

 

Hniarlawnthar ah SAC Ralhrang nih Minung 4 an Tlaih Hna

 

Nihin zinglei sml. 10:30 hrawng ah Hniarlawnthar ah a ummi pa pali SAC ralhrang nih an tlaih hna, tiah thawng kan theih.

 

Tlaih a tongmi hna lak ah Pa Van Tin Hmung le kum 13 lawng a si rihmi ngakchia Pa Peng Uk Ling zong an i tel.

 

“SKAT motor ngeitu pa inn ah an len lio ah an rak tlaih hna. An motor zong an tlaih chih i an kalpi,” tiah khuami pakhat nih The Chin Journal ah a chim.

 

Nihin zaanlei sml. 4:00 tiang ah Hakha le Chuncung karlak in meithal kah thawngpang le bomb puah thawngpang pawl an thei rih.

 

Khuami pakhat nih, “Tu zinglei sml. 9:30 hrawng khan an i kap i atu hi Hniarlawnthar ah kan um ngam ti lo. Atu tiang meithal thawng le bomb thawng a thang rih,” tiah a chim. The Chin Journal

Be the first to comment

Leave a Reply

Your email address will not be published.


*