Kabul Airport Lenglei Suicide Bomb Puah Ruangah US Ralkap 13 Le Civil Mi 60 Leng An Thi

Kabul Airport Lenglei Suicide Bomb Puah Ruangah US Ralkap 13 Le Civil Mi 60 Leng An Thi

 

Nizan August 26 ah Afghanistan khuapi Kabul airport luhnak kutka pawngah suicide bomb voi 2 an puah ruangah US ralkap 13 le civil mi 60 leng an nunak a liam.

 

Bomb hi ISIS tenge pakhat a si mi ISIS-K hna nih kanmah nih kan puah mi a si tiah an chim. Hma a pu mi pakhat nih ISIS-K hna nih hin US ralkap le US ralkap caah holh let tu hna an tinh mi a si tiah a chim.

Bomb puah hmasa hi an ram suimilam zanlei 6 hrawngah a si i, airport naihte Baron hotel pawngah an puah mi a si.

 

Baron hotel hi UK embassador hna nih UK ah thial ding in an buaipinak hmun a si.

Bomb pakhatnak a puah hnu tlawmpal ah meithal thawng nih a zulh colh i, mah hnuah airport pawng hor chungin pakhat a puak than i, a thi mi le hma a pu mi zeimawzat cu horah an tla.

 

Hi suicide bomb in US nih Afghanistan i a minung hna caan khiah mi chungah a lak dih dingin a timh cuahmah lio ah a puak mi a si i, bomb cak tuk ruangah airport pawngkam cu mithi ruak le hliam tuar mi a khat ko tiah theih a si.

 

Minung 60 hrawng an nunnak a liam pin ah 140 hrawng hma a pu mi an um i, tutan hi kum 2011 hnuah Afghanistan ah US ralkap pawl an thih tam bik nak a si. US ralkap a thi mi hna hi marine 12 le medic 1 a si i, 15 hliam an tuar tiah theih a si.

 

US president Joe Biden nih “suicide bomb a puah mi hna cu ngaihthiam an si lai lo, kan kawl lai i, an thiltuah man cu pek an si lai. Afghanistan in an mi le sa lak mi zong kan pehzulh lai” tiin a chim.

 

Bomb a puah tu ISIS-K hna hi Islamic state Korasan province (IS-K) hna an si i, an nih hi ISIS tiah a ti mi Afghanistan le Pakistan hrawngah a cawlcanghmi Jihardist militant group an si.

 

2015 January thla dirh mi a si i, an raldohtu hna hi Afghanistan le Pakistan minung an si. Mah bu hi Taliban hna cawlcanghnak an duhkhimlo ruangah dirh mi an si. A tu bomb a puah tu hna hi Taliban nih Afghanistan an lak than hnuah thongnla an chuahmi hna an si lai tiah zumh a si.

 

ISIS-K le Taliban hna hi i pehtlaihnak zawn cu an ngei nain an ruahnak a khat dih lemlo caah Taliban caah hnahnawhnak a pek khawh mi an si tiah theih a si.

Ref; NDTV

 

The Chin Post

Be the first to comment

Leave a Reply

Your email address will not be published.


*