Kan Tonmi Sunghnak Hna Hi Kan Donghnak An Si Lo

Kan Tonmi Sunghnak Hna Hi Kan Donghnak An Si Lo

 

Minung kan nunnak lamthluan i kan khuasaknak ah puicimh sunghzatlaknak hna hi nang zeitindah na ruahning si ti khi hei siseh law cucu ruah len awk ngaingai thil pakhat a hung si. Voikhat sungh zong sungh, voihnih sungh zong sungh. Sungh cio cio an si ko i, ai khat ko tiah kan ti men lai.

 

Asinain kan cungah a tlungmi le kan tonmi sunghnak hna hi kan donghnak an si tiah kan ruah lo ding hi a biapi taktak. Kan sunghmi inn le lo dum le hau le thilri hna hi kan donghnak an si tiah ruat hna hlah usih ti zong cah kan duh hna. Vawleicung minung nih thil kan tonmi cungah puicimh sunghzatlak timi hi min pakhat bantukin mikip sinah hman le chimmi bia a si ko cang. Sihmanhsehlaw atu bantukin kan cung i thil a tlun tikah kan dih bak cang ko tiin tangah khup i bil riangmang i kut i thlir i lungdong in um ding cu i tim duh hlah usih.

 

Thil kan tonmi hna hi chikkhat chung ca te khi an si ko hna. Hi hnuah i zuamnak caan ṭha tampi kan ngei ko rih. Voikhat kan sungh zongah hi kan tonmi sunghnak hi kan ca i hmailei karhlan khawh chin nakding caah lam ṭha hmuhsaktu an si tiin ruat kho usih law a ṭha. Zaan ah mitthli tlaknak um hmanh seh law zinglei ah cun lawmhnak a ra ṭhan ve (Salm 30:5). Kar khatnak kan tluk zongah a kar hnihnak kar khawh i zuam ṭhan usih.

 

Voikhat kan tluk paoh ah thachia in thawh kan i timh ti lo si ahcun atu ah hin lamkal kan thiam rih hnga lo. Ngakchia kan rak si lio caan kha kan mitthlam in hei cuan ta hna usih. Dir kan i timhka ah kan dir i kan tlu, kan dir ṭhan. Lamkal kan i hrawtka ah kar khat kan kar ah kan tlu, sihmanhsehlaw kan tho i kar khat hnu kar khat in kan kar kan hlan i cuticun lamkal kan thiam thai. Kan tonmi sunghnak hna hi ka dihdonghnak a si tiah ruat in chim hlah usih. An tonmi le an sunghmi cung lawng kha aa buai pi i ngan tukah a ruatmi nih hmailei a kal nakding lam a ruat kho ti lo.

 

Voikhat ah mipa pakhat a inn mei nih ciam lak a kanghpiak i umnak ngei loin lungrawk in a um. Zei tuah taktak hmanh a huam ti lo, a tonmi puicimh sunghzatlaknak lawng kha a ruat i lam kam ah lungrawk in a ṭhu ko. Cucu tarpa nih a hmuh i thil sining a hal. Tlangvalpa nih a tonmi le a cungah a tlungmi thil sining vialte a chimh dih. Cutikah tarpa nih cun tlangvalpa cu, “Ti hrai khat chungah cite zapei ṭhuam khat in a paihter i a dinter. Zeitindah a um tiah tarpa nih a hal i, tlangvalpa nih a al taktak si. A al tuk ning ah hin a khaat bakin a kha din khawh ding hrimhrim a si lo,” tiah a leh.

 

Cucaah tlangvalpa cu tarpa nih tidil kaupi umnak ah a kalpi ṭhan i, cite zapei ṭhuam khat in tidil kaupi chungah cun a paihter i a dinter ṭhan. Atu teh zeitindah a um? tiah a hal ṭhan. Tlangvalpa nih zeitihmanh in a um lo. Amah ningte a si ko, a kik i a thaw ngai ko tiah a leh. Tarpa nih cun tlangvalpa, kan cung i a tlungmi thil kan tonmi fahnak le vanchiatnak hna le puicimh sunghzatlaknak hna ruangah lungrawk in kan um i lungdong in zeihmanh tuah huam ti loin kan um hi a ṭha lo. Hi thil hi nangmah lawng nih na tonmi a si lo, mikip nih an ton ciomi a si. A din deuh le a fak deuh tu a si i kan tonmi tu ai dang lengluang cio ko lai. Kan tonmi fahnak ruangah lungrawk in kan um ahcun hmailei kan nunnak caah lam a pit.

 

Atu nai ah hrai hmete khat in cite ṭhuam khat na paih i a haang na din i a kha tuk, a al tuk i na ding kho lo. Asinain tidil nganpi chungah cite ṭhuam khat na paih ve i a haang na din ṭhan i na din khawh a si lo maw? Atu na cungah a tlungmi puicimh sunghzatlaknak hna hi hrai hmete chung cite ṭhuam khat haang bantuk i na ruah peng ahcun na ding kho in na tonmi ngaihchiatnak hi na tuar kho lai lo. Cucaah cun atu na tonmi ngaihchiatnak le na sunghmi vialte hna hi tidil kaupi chung cite haang bantukin ruat law fawi tein na din khawh lai, na lung a dam lai. Hmailei na kal nakding ah ruahchannak nganpi na ngei lai i atu na tonmi hi cu zeihmanhlo ah na rel ko lai a ti.

 

Tarpa chimmi a theih in tlangvalpa cu a tonmi kha fahnak le vanchiatnak ah ruat loin hmailei a kal nakding lamthluan caah lamhmuhsaktu le thazaang lak chinnak tu ah a hman. Cu hnuah a tonmi kip ah lungsi hnangam tein um zia a thiam.

 

Cucaah cun hawi dawt hna, kan cungah a tlungmi fahnak hna le kan tonmi puicimh sunghzatlaknak hna hi kan donghnak an si tiin ruat hna hlah usih. Zuamnak caan tampi a um ko rih. Kan tonmi fahnak hna hi hrai hmete chungah paihmi cite haang bantuk ah ruat loin tidil kaupi chungah paihmi cite haang bantuk in kan ruah si ahcun kan din khawh lai i a tuar zia kan thiam ko lai. Kan tonmi kip ah lungsi hnangam tein kan um kho ko lai.

 

Atu lio ah mingei mirum milian mingan hna le miṭhawngṭha kan timi vialte hna zong khi caan khat lio ah puicimh sunghzatlaknak le harsatnak phunkip a rak tong i a rak tuarmi lawngte an rak si ve ko hna ti zong hngal usih law philh hna hlah usih.

 

Kan nunnak lamthluan ah kan tonmi puicimhnak le sunghnak hna hi kan donghnak an si lo ti kha hngal in ruat usih.

 

A reltu Bawipa nih thluachuahnak in pe ko hna seh.

 

Dinnak kha a cat lomi tiva bantukin luanter camcin ko u (Amos 5:24).

Salai K. Biak Lian Thawng

Be the first to comment

Leave a Reply

Your email address will not be published.


*