Kawl ralkap pakhat hriamnaam he Karenni GZ sin ah aa fon, tangka sing 30 pek

Kawl ralkap pakhat hriamnaam he Karenni GZ sin ah aa fon, tangka sing 30 pek
=============================
Kawl ralkap pakhat cu MA phun meithal zuun khat he Karenni Generation Z Army (KGZ Army) sin, November 6 lio ah aa fon cang tiah KGZ nih an thanh. Kawl ralkap pa cu lunglawmh can ah tangka sing 30 (Ks.3,000,000) an pek tiah theih a si.

thawngpang dang : HLAWHTLINNAK PHEN I TEIRIALNAK: Jackie Chan Nih Amah Tuanbia A Chimmi

Hihi zukcawl thlaknak in vawlei cungah minthang bik pakhat ah aa chuahmi Jackie Chan nih amah tuanbia le a hlawhtlinnak phenah aa thupmi a rak i zuamnak / teirialnak kong hmangin mino hna sinah thazang peknak bia a chimmi a si.

Ngakchia te ka si lio in zukcawl thlaknak hmunah ka rak kal lengmang cang. Kum ruk ka si lio in ka pa nih zukcawl lei cawnnak hmun (theatre) ah a ka chiah. Cu hmunah cun drama cawn kaa thok. Cuka hmun ka um lio hi ka rak baa ngaingai. Harnak a phunphun ka rak tuar. Video film ah kaa tel hmasa biknak Butterfly Lovers i kaa thlak lioah mithi bantukin um ding ka si. A voikhatnak lem ka cannak a si i Director nih a ka sik lengmang kha ka theih peng ko. “Caang hlah, mithi na si khah, ziah na pum cu na cawlter lengmang” tiah a ka ti.

A thli tein ka hnabei a rak dong ngaingai. Mithi bantukin lemcan ding hmanh ka ti khawh ṭung lo, tiah ka tha a chia. Cu hnu cu ralring tein ka um. Zeitikah dah thaw ka chuah lai, zeitikah dah thaw kaa khawn lai, zeitikah dah video camera cu keimah leiah a rak hawi lai i zeitindah mithi bantukin ka um lai? ti bantuk kha a si khawh chungin ka cawn. Cuticun a donghnak ah cun mithi taktak bantukin kaa thihter kho ve.

Mah lio hrawng i ka rak i ruahchan bikmi cu muicawl i thlaknak ah kungfu le vuak ningcang cawnpiaktu si hi a si. A ruang cu kungfu cawnpiaktu si dingah kaa tlaak ngai in ka theih. Asinain zukcawl chung i kungfu an i vuakning hruaitu si khawhnak dingah cun a hmasa ah camera an thlak ning phunglam theih a herh. Cu ruangah kumhnih chung bak camera phurtu rian ka ttuan.

Hi lio ahhin zukcawl thlaknak ah minthang ngai pakhat a rak um. Amah cu dirhmun sang a ngeimi a si i zultu zong tampi a ngei. Kei zong cu amah zultu hna lak i zultu chin pakhat ka si ve. Cu pa nih a theihmi si dingin a phunphun in ka rak i zuam. Muicawl an i thlaknak ding hmun ka hlathlai cia, an phak hlanah ka rak phan i amah hmuh khawhnak dingah ka rak um tawn.

Nikhat cu ka hmaiah mawṭaw in a dir i “nang hi keimah zultu maw na si” tiah a ka hal. Aw, ka ti i a mawṭaw ah a ka luhter ve. Lam thluan chuak kaa khat hmanh holh loin ka ṭhu. Muicawl thlaknak hmun kan phanh in a mawṭaw cu thiang tein ka kholh piak. Ka nunchung ah cu tlukin thiangin mawṭaw ka kholh hi ka thei rih lo. Cu hnu cun zukcawl thlak ah an kalnak poah ah a mawṭaw kaa cit lengmang cang. Nitin in a mawṭaw cu ka kholh i thiang tein ka tuahpiak lengmang. Cuticun mah kungfu thiam pa zultu pakhat a si tiin mi nih an ka theih ngai.

Hi kong ka chimmi hi keimah hlawknak dingah a si hrimhrim lo. Muicawl leiah mingthang pakhat si dingah cun mi nih theih ngaimi si a herh. Kha lioah khan thawngthanhca i ka langh ve khawhnak ding a si ahcun zeibantuk thil tuah hmanh ka huam. Thawnglatu hna nih ka cu-kha ve hna seh ti duh ah mitbenh a nakmi pi kaa benh tawn. Asinain tadinca a chuah taktak tikah cun ka lang ve bal lo. Keimah ka cuannak zawn kha an rak hnawh (phiat) caah a si.

Muicawl thlaknak ah zeitluk tiang dah khonden na ton tiah bia an ka hal tawn. Kaa khondennak hi rel cawk ding a si ti lo. Ka taksa pum chung i ka ruh hna hi voikhat nak tam an kiak dih. Cu pinah meikangh, hliamhma le khondennak dangdang zong tam tuk ka tuar. Ka kedong in ka luthlung tiang kaa khon lonak a um lo, ti tluk a si ko. Hlanah cun muicawl thlak tikah aamahkhan ti bantuk zong a rak um lo cu mu! Meikangh ding nak hmun i lem ka can tikah mei taktak ka hman tawn. Ka mithmul zong a rak kaang dih bal. Meideu kan hman ah siseh, mei taktak kan hman ah siseh lemcannak hmunah cun kan himnak hmanh ruat loin biatak thlak in kan rak i zuam.

France ram i muicawl kan thlaknak ah atu tiang ka philh khawh lomi cu voihnih khengte operation tuah hau in ka lu kaa hliam kha a si. Cu lioah cun Yugoslavia ah ka phan, cukaa ramah cun ral a rak tho hoi. Siizung ah kaa thlop len ko nain ka dam kho ti lai lo timi ruahnak tiang ka rak ngei cang. Cu bantuk thil ka ton hnuah rian timi hi biapi in ka hmuh chin lengmang. Tu ni i ka tuah dingmi cu tu ni hrimhrim ah lim dingin kaa zuam.

Tu kum ah zeidah ka tuah lai, timi kaa chiah. Hmai kum i ka tuah dingmi cu ka ruat rih lo. A ruang cu kan nunnak hi a rak tawi tuk. Cu ruangah ka nunnak i nikhat te hmanh a lak in liamter ka siang lo. Mikip caah ka nunnak hi a man a sunglawi tuk ka ti duhnak cu a si lo. Asinain ka nunnak hi keimah ca tal ah cun a rak ṭhahnem ve ko dahkaw! Ka ruah ṭhan tikah Yukoslavia ram i ka tonmi khondennak nih nunnak timi ka hmuhning a thlen bak ti kaa fiang.

Voikhat lioah Jackie Chan nih kumkhat chungah a hlawh / hmuhmi cu cuzat a si tiah an phuan bal. Cucu mino tampi nih an rak hngar tuk. Cu tikah Jackie Chan nih cun “Hizat hlawh ding hi ka phu ve ko. Kum tampi nunnak thap in hram ka rak bunh ruangah ka hmuhmi a si. Mino nih hin mi nih an hlawhmi zeizat dah a si ti lawnglawng an zoh ding a si lo. An i zuamnak le pumpeknak zong hi an zohchih lengmang a herh” tiah muicawl leiah arfi pakhat bantukin ceu (minthan) a duhmi mino hna sinah a chim.

Mi an hlawhtlinnak lawng khi zoh hlah usih, an hlawhtlinnak phenah zeitluk in dah an i zuam, tei an mak? ti kha hmuhchih khawh i zuam usih. By. Salai CP Lian (CEO of The Chin Post)

Be the first to comment

Leave a Reply

Your email address will not be published.


*