Keimah Nakin Miphun Na Dawt Deuh Tiah Kan Hnahchuah Ngam Lo

Keimah Nakin Miphun Na Dawt Deuh Tiah Kan Hnahchuah Ngam Lo..Ka U ka dawt Chawn Ṭial… “Nangmah le ka nu nakin ka miphun ka dawt deuh hna” tiah na ka ti i hmailei kan tefa hna le Laimi tefa hna nih zalong tein ram chungah an len khawhnak dingah ralhrang doh dingin ram lak na kal lai ahkhan mu keimah nakin miphun na dawt deuh tiah keicu kan rak hnahchuah in kan rak uh ṭanh ngam lo i, a thloh zong kan rak thloh ngam lo. Miphun a dawt deuh caan a um bantukin keimah zong hi a ka dawt deuh caan a um ve te ko lai tiin kan sian lo tuk buin thazaang peknak bia he ram lakah kan rak kal ter.

Ram lak um cu na tlamtling maw kan ti ahkhan na tlamtlin lonak kong chimh na ka duh lo kha mu. Aa nuam tuk bantukin dakaw na ka chimh kha, a lungrethei sual lai ti na ka phan ca zongah a si ko lai nain. Tukum dongh lei cu ram a ṭhat pek ṭhat lo pek ah chungkhar kan dirh cang lai mu na rak ka ti ahkhan hawidang nu cio bang ka duh bikmi pa co lai cu kaa rak ngeih tuk ve cu. Ṭhitumnak thuam tete hna kei ka rak i zoh ve cang cu. Kan i duhdawtnak caan hi tawi hmanh seh law kum tam tukin aa duh daw cangmi bantukin na ka dawt i ka zawn na rak ka ruah. Hakha ah na rak tlun caan i na nu pawng na ih caan hmanhah a thli tein phone kan rak i chawn tawn kha. Na nu ṭhangh na duh lo caah.

Ka hniang, hawidang nu cio bangin dawtmi sinah i hnoh i caan hman te hna ka rak duh tuk ve i dakaw, na rak tlung deng maw kan ti caan i nai rih lo e na ka ti ahkhan a thli tein kan rak uh ṭanh tuk ve si. Kan ngai tuk nain keimah nakin miphun nai thim deuh lio a si caah na sinah vuivai nak bia chim ka rak duh lo cu. Ka hniang hringtu nu le pa cu dawt ding an si na rak ka ti i na nu na dawtnak kha na rak ka chimh i nangmah le keimah cu thluachuah kan hmu hrim hrim ko lai e na rak ka ti kha. Atu ahcun keimah pi lawng pei na ka kal tak ko hi.

Hniang poipang ka ton sual ahcun dl rak ngei te muh tiah na ka cah ta kha. Kan ngeih tak lai lo tiah kan rak ti kha capo ah pei ka rak ruah ko cu. Kal tak hrim hi maw na rak ka timh. Na nunnak a liam an ti lio ahkhan keicu kaa zumh lo. Hakha na rak tlun ahkhan a kir colh dingin na ka ti caah keimah hmanh ton ta manh lo tein na kal diam rua tiah pei ka ruah i ram lakah a um ko tiah ka rak el hna cu. Atu tiang hi keicu kaa zumh rih lo. Na nung rih ko cu.

Vei aw ka dawt, thlan khur na tlak thaizing kha dakaw nidang tawn ah nangmah nih thaithawh (breakfast) ei na ka hngah pengmi kha mah ni cu kan hngah peng cu. Phone kan call ca kan kuat len nain na ra ti lo. Hakha na um fawn ko nain na rak ti lo i ei thai loin keizong ka um ve cu. Ka hniang, ngahfah na tuar lio ah khan mu kan domh tlaih manh ve lo i ka ngai thiam. Khuazei dah a fak tiah kan hal manh lo i ka ngai thiam. Ka cungah lungfak in rak um hlah mu.

Nihin tiang hi na nun khawhnak dingah thla ka cam peng, na kal rih lo tiin ka cohlang kho lo. Miphun na dawt i na nunnak na pek bantukin na ka dawt ve caan a cu i nunnak pek loin nun tu ziah na rak i thim ve lo tiah kan mawhchiat ta ko lai mu.Ka dawt Hawi nih cun mu “Iang, Bawipa nih na thlacamnak hi an leh ko e. Na dawtmi hi a nung ko e a ka ti. A nunnak hmun belte ai dang. Nang hi vawlei ah na nung i a nih hi van ah a nung ve. Van le vawlei cu aa hlat lo. A cung le a tang in kan um. Second ṭem tete in kan naih ko e” tiah an ka hnemh tbantukin ka hmailei nun hi ka rak peh rih lai i Bawipa nih caan a ka khiah piakmi ka phak tikah van ahkhin sunglawi tein kan i tinhmi ṭhitumnak kan tuah lai mu.

A donghnak ah na nu ka leng i dakaw, tuni ahkhan Chawn kha na sinah a um ahcun rak lawi ter, na nu nih an ngai tuk e an ti tiah chim te mu a ka ti cu. Na sia a rem ko ti? Zei a si hmanh ah mu, miphun caah nunnak a pe balmi pa nih dawtmi ka si cu kaa uang tuk ko. Keimah le na nu nakin miphun na dawt deuhnak cungah keicu kan hnahchuah ngam lo. A kan daw lo ti zongah kan ruat lo. Kan hmailei pi pei na dawt chih cu. Cucu ka cungah na sia herhmi um hlah seh mu. Khi hmun ah nuam tein ka dong te law. Na dawtmi Na nau. Note: Chawn Ṭial cu june 5 ah Hakha ah bomh puahnak in a nunnak a liammi a si. A dawtmi nawlonhnak tein a tuanbia le an hmanthlak kan vun tar. Iang he bia kan i ruahmi chirhchan in ka ṭialmi a si.

Be the first to comment

Leave a Reply

Your email address will not be published.


*