Mindat Khuate lei Bawmhnak Pek SAC Ralhrang nih an Onh lo caah UNHCR nih Thilri Cheukhat Kirpi Timh

Mindat Khuate lei Bawmhnak Pek SAC Ralhrang nih an Onh lo caah UNHCR nih Thilri Cheukhat Kirpi Timh
————
Mindat khuate lei ah bawmhnak pek ding in UNHCR nih timhtuahnak a ngei nain SAC ralhrang nih nawl an onh lo caah bawmhnak thilri cheukhat kirpi tthan an timh, tiah kan theih. Nizaan July 19 ah Mindat khua ah a phanmi UNHCR bawmhnak thilri pawl cu Mindat khuapi chung lawng ah peknak nawl an onh i khuate lei ah lanh i vung bamwhnak nawl an onh hna lo.

“Khuate lei ah a ummi ralzaam pawl bawmh ding SAC nih kan onh lo an ti caah a taangmi thilri pawl kirpi an timh,” tiah Mindat khuami pakhat nih a chim. Mindat ralzaam bawmhnak ttuanvo a latu minung pakhat nih, “Atu a rak phanmi bawmhnak thilri pawl hi kanmah pehtlaihnak in tuahmi a si lo. SAC nawl onhnak in a phanmi an si,” tiah a chim.

Mindat khuapi chung taktak ah cun ralzaam 200 hrawng lawng an um. A dang milu thongthong ralzaam pawl hi khuate lei ah a ummi an si hna. Cucaah, UNHCR bawmhnak cu ralzaam tam deuhpi sin ah phan kho lo ding dirhmun ah a phan.

Mindat ralzaam pawl bawmh an herh tuk caah ICRC le WFP zong nih bawmh ding in SAC an hal nain atu tiang an onh rih hna lo. Mindat khuami pakhat nih, “Facang hi SAC nawl onhnak le anmah nawl onhmi zat lawng in thiar a ngah. Nawl onhmi zat a lonh ahcun a kan chuh. Sii hrimhrim cu luhpi a ngah lo. A kan chuh colh,” tiah a chim. The Chin Journal

Be the first to comment

Leave a Reply

Your email address will not be published.


*