Mindat nih an tuah ding an hngalh, Nangteh Na Ral A Tha Ve Maw?: Pu Ram Kulh Cung (CNF)

Hriamtlaih dohthlennak a tuahmi paoh harnak an tong dih ko. Atu ah mipi nih uarmi Kachin kan unau pawl hi hriam an rak kawl, tangka an rak kawl, riantuantu an rak kawl ve ko. Chanthar Israel miphun zong kum 2,000 dengmang an rak chuahtak cangmi kamhmi ram ah Ram an rak dirh timh lio ah cu thiam a si ve ko.

Chin miphun zong cu lam cu kan zulh ve a hau ko. Chinram Pennak kan ser khawh ding le ser khawhlo dingmi hi kan khuaruahnak le kan lungput ah aa hngatmi a si. Pathian bochan ko usih. Kan kut le kan ke tein dir ko usih. Cu khua ruahnak nih Chinram Pennak cu a hrin lai. Zeidang lam a um lo.

Chinram Pennak (9) Ralthat timi hi tihnak kan ngei lo tinak a si lo. Tihnak timi cu a ho paoh nih kan ngei ko. Nain, bochan awk zong kan ngei ve. Tlaih le khih, tuk le velh, thawngthlak, tlaihhrem, thah tbk. cu a ho paoh nih tih cio a si. Khatlei ah kanmah nih kan tuah khawhmi asilole pakhatkhat nih an kan tuahpiak khawhmi a um ahcun bochan awk kan kawl.

Ralthat timi hi harsatnak le thihnak kha kan tih ko nain thil tha tuah kan duh i kan tinhmi kan fiang tikah kan tuah khawhmi kan thei asilole Bawipa nih A kan umpi ko timi kan hngalh i nunnak tiang kan thap ngammi le zei paoh kan tuah ngammi kha a si.

Phun dang in kan chim ahcun, mithalo pa nih thilsual a tuahmi kha kan theih, zeidah thil tha a si timi kha kan theih asilole Bawipa nih A kan duh/tinhpiakmi kha kan theih, Thiang thlarau nih A kan umpi timi kan theih hnu ahcun zei zong te hi kan ngamh, nunnak pek tiang in.

Thil tha lo tuah hi sual a si. Thil tha tiah theih ko nain tuahlo zong hi sual a si. Mithalo pa nih thilsual a tuah cuahmah. Thil tha na tuah awk hi zeidah a si timi na theih ko nain na tuah lo ahcun sual a si.

Ralthat timi hi thil sining fiang tein hngalh le tuah awk a simi thil tuah kha a si. Chin miphun kan ral a tha maw? Mindat peng kan unau pawl nih an tuah awk thil an hngal, an tuah khawhmi te an tuah, an ral a tha. Pasaltha an si. Na ral a tha ve maw?

Be the first to comment

Leave a Reply

Your email address will not be published.


*