Minung lungput a hngaltu Pathian nih

Minung lungput a hngaltu Pathian nih;-

 

Khrih ah dawtmi u le nau hna minung cu dawt a duh hmasami kan si caah a kan daw hmasatu cu kan dawt ve bak ko hna. Asinain kanmah bak nih hin mi va dawt hmasa timi tu hi cu kan ngei kho hrimhrim bak loh.

 

Cu bantukin Pathian nih minung kan lungput cu a hngalh caah kan lungput zoh in Pathian nih keimah nih ka dawt hmasa hna lawngah minung nih hin an ka dawt khawh ve lai tihi a hngalh i cu a dawtnak a takin a langhter. ( Johan 3 : 16 )..

 

Pathian nih minung kan cungah a dawtnak a langhter ning kongah hin Jesuh a rak zultu a simi Johan nih a chim ning ahcun, “Pathian nih a kan dawtnak a langhterning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai.

 

Dawtnak cu, Pathian kan rak dawt hi a si lo, amah nih a kan dawt i kan sual ngaihthiamnak caah a Fapa kan sinah a run thlah hi a si,” tiah a rak chim. ( 1Johan 4 : 9 – 10 ). A bawmtu ah ( Johan 3 : 17 – 18 )..

 

Dawt a duh hmasatu minung lungput a hngaltu Pathian nih a kan dawt hmasa bantukin kannih zong nih a kan dawtu kan biakmi Pathian cu daw ve cang hna u sih ti zong kha ka duh.

 

Asinain Pathian cu hmuh khawh a si lo caah hin zeitindah Pathian cu kan dawt khawh kun lai tiah cun zultu Johan nih a van ti thanmi cu, “Ahohmanh nih Pathian an hmu bal lo; sihmanhsehlaw pakhat le pakhat kan i dawt ahcun Pathian cu kan chungah a um i kan chungah a dawtnak cu a tling,” tiah a rak ti than. ( 1Johan 4 : 12 ).

 

Unau pakhat le pakhat cungah dawtnak taktak kan ngeih a si ahcun cucu kan biakmi kan Pathian kan dawt kha a si..

 

NOTE :- Khrih ah dawtmi u le nau hna nang le kei cu zumhnak thawngin Pathian dawtmi fa le Pathian cungah a ummi kan si bantukin midang cungah hin a takin dawtnak kha langhter hmasa ve cang hna u sih. Dawt hmasa lawng a duhmi si ti hna hlah u sih law Jesuh nih a kan cawnpiak bantukin mi nih kan cungah tuah hna seh ti kan duh bantuk in khan kanmah hrimhrim nih hin midang cungah khan tuah khawh hmasa kha i zuam hna u sih.

 

Zeicatiah cun hi thil hi kan biakmi kan Pathian nih a duhmi zong a si caah a Fapa ngeihchuan a simi Jesuh Khrih kan Bawipa vawlei i a thlah hlan ah hin a mi hna hruaitu dingah tiin a rak thimmi Moses sinah a rak pekmi Nawlbia le a profet hna nih an rak cawnpiaknak a sullam taktak zong kha an rak si. ( Mathai 7 : 12 ).

 

Hi bia hna hi minung ruahnak menmen a si lo caah Peter zong nih a rak timi cu, “Profet chimchung bia zeihmanh minung ruahnak in a rami a si lo, Pathian nih Thiang Thlarau in bia a chim i a cawlcanghtermi nu le pa hna sin tu in a chuahmi a si,” tiah a rak ti. ( 2Peter 1 : 21 ). A biathiang aa hrawmmi khomi zumtu kan dihlak cungah dawtnak a simi Pathian cu um zungzal ko seh..

 

 

Thank You For All;

Johnly Fambawl

Be the first to comment

Leave a Reply

Your email address will not be published.


*