Myanmar Khuakhannak Duh Lo Tu Miss Universe Myanmar

Kar hmasa Ningani khan Florida-a Miss Universe 2020 thlanna stage-ah Miss Myanmar Thuzar Wint Lwin chu *Lai thuam* inbelin, khawvel rilru hnehtu thuziak ‘Pray for Myanmar’ tih kengin a rawn inlan a; Best National Costume a dawn phah hial.

Amaherawhcu, Miss Universe pageant platform kha Thuzar Wint Lwin-in Myanmar-a sipai rorelna a duh lohna a lantir vawi khatna a ni hauh lo. Khawvel nula pian nalh leh mawi tak tak rual inelna, Miss Universe pageant-a a telpui dangte an inbuatsaih mup mup lai, February thla velahte khan Thuzar Wint Lwin hi chu a pianna khua Yangon kawtthlerah an rama sipai chet dan duh loin kawng a la zawh. Chumai a ni lo, a pawisa khawl ang angte chu sipaiin rawng taka an thah chhungte hnenahte a pe bawk.

An rama rorel mek sipai lamin Miss Universe-a inlan turin an ram chhuahsan a phal dawn em tih pawh ngaihtuah hleithei loin, nunna thapin internet lamah pawh an rama sipai rorelna dik lohzia a auchhuahpui nasa hle.

Pageant atana a video message siamah pawh an ram mipuite chu nitinin an thi tih leh sipaiin an kah hliam reng thu a la sawilang ngam bawk. Kum 22 mi lek, East Yangon University-a English major laa zir mek Thuzar Win Lwin hian Miss Universe inelnaa tel hi a tum ruh hle a, Facebook lamah pawh khawvelin an ram chanchin, an zalenna leh mihring dikna chanvo rahbeh a nih nasat zia puanchhuahna atana pageant platform chu hman a tumzia a sawi lang a ni.

Vanneih thlak takin thla tir lamah khan Yangon airport a paltlang thei ta hlauh a, a tum ang ngeiin khawvel hriat turin an ram dinhmun chu a puang chhuak ta a ni. Mahse, Yangon airport ah pawh hian a fimkhur hle a, an interview-naah chuan miin an hriat lohna turin hoodie a hak bakah tarmit a vuah tih a sawi lang a, an rama let leh chu a tan chuan him rih loa a ngaih thu a sawi bawk.

Thuzar huaisenna hian fak a hlawh a, Myanmar national unity government thupuangtu Dr Sasa pawhin thuchhuah a siamah a huaisenna chu fakawm a tih thu a sawi. Media į¹­henkhatin Myanmar sipaite’n Thuzar manna tur ‘arrest warrant’ an tichhuak nia an tarlan chu The Guardian lam erawh chuan thudik a ni em tih an la fihfiah theih loh thu an tarlang thung a, Miss Universe Organization lam pawhin hemi chungchangah hian thuchhuah an la siam lo. Chutihrual erawh chuan social media lamah chuan Thuzar Wint Lwin himna tura campaign hmuh tur a tam tawh hle a ni.

Be the first to comment

Leave a Reply

Your email address will not be published.


*