Ngeih A Chia Kho Tuk E : Salai Cung Peng Lian Ttah Hla, Na pa sakhnem ruun tang ah, Na nu chuan rawl thaw dum in

Salai Cung Peng Lian Ṭah Hla: Na pa sakhnem ruun tang ah, Na nu chuan rawl thaw dum in, Na chuah sempi unau he, Chunmang dawh dawh manh ṭi, Na tum tuk ve ko lai pei ti, Pasal tiin na miphun caah, Lai meithal na tlaih i Lam chuk lam cho na kai zawn ah, Zei ko khi dah na lungthli in Na rak i hngah hlang bik hnga.

Ruah le rial lakah cangvet he, Aih puan hmanh ngei loin, Khua sik na tuar rawl ṭam na tuar. Teinak thantar an thlai tikah, Na bau te lai na sia herh lo maw? Hma le hnai he vawlei khur chung, Ralhrang hliam hma na tuar ah, Ruun inn na hlam ve lai ti ruah ah Thinlung mei hma bang a lin, Na liam lungsia a rem lai lo.

Ṭa hniang, na chuah sempi le, Sunghno na nu na pa, Na kom hawi rual hna nih, Na fahnak zawn men piak in, Za domh na ton manh hlan, Lei kik lakah na ciam ai. Na thi na hnai miphun ca, Na luan ternak hmel nih, Teinak thawngtu kan phurh in Ralhrang hi ciam hna seh.

Bungci Bawi Bik kan chimh lai, Puanrang aa hruk vanmi rual nih, Rak in mempiak hram seh. Na tuar le na in hma vialte. Miphun caah nun Pasal ṭha tiin, Van ahkhin rak in lawm hna seh. Nusung Hrangtlung- Note: A hmanthlak hi media dang tampi nih an tar cangmi a si caah ka hman lawlaw. A chungkhar nan sia rem lo ahcun thawng ka thanh te u law.

Pasaltha Cung Peng Lian Senthang Miphun Chungin The First Martyr Nun Pe Hmasa Na Si
==============
Surkhua le Aika khua karlak ralhrang misual phu le CDF – Hakha kahdohnak ah CDF-Senthang in Vaal Cung Peng Lian nih a nunnak a liam ti thawngpang kan theih cu kan umnak hmunhma cio kan celh cio lo ee. Ralhrang mithalo hna kutin a nunnak a liam mi Pasaltha kan i upat tuk ee. Tlangkip cul in nun him nak caah le ram le miphun caah retheih tuar hnu, na hnu in na sin phak tik cu na liam cang mu.

Pasaltha Cung Peng Lian (Kum 21) hi Surkhua le Aika karlak kahdohnak ah a telmi a si. Senthang miphun chungin ram le miphun caah a nunnak a pek hmasa bik tu a si. Tantak mi chungkhar Bawipa tu nih hnem hram ko hna seh.

CDF lei in pasaltha hna nih an nunnak a liam tikah Lungthin nih a celh hrim lo ee, Miphun le ram caah pasaltha (hero) na si. Senthang miphun chungin (the first martyr) nun pe hmasa na si kan nau. Na ram le na miphun nih kan i philh kho ti lai lo. Tuanbia dawh na kan tial piak, sian lo bu tein va kal ko law, zeitik hmanh ah nan khuami le nan penngtlang nih kan in philh hrimhrim lai lo. Na ram le miphun caah na nun na pek nak cu a lak si hrim lai lo e. Chin miphun dihlak nih kan i tihzah i kan upat tuk hrianghran ko.

Nihin June 1, 2021 ni zing suimilam 9:00AM in suimilam 2:00PM tiang ralhrang misual phu le CDF – Senthang hriamtlai phu hna cu an i kah than, tiah thawngtheih a si. Nizan ah ralhrang lei nih CDF – Senthang pawl cu an kulh hna caah pawngkam khuami security pawl nih an zuanhnawh hna i, an chan chuah khawh hna, tiah thawngpang tha tuk theih a si. Hi kahdohnak ruangah CDF – Senthang lei pehtlaih khawh rih lomi zong an um hna i, khoika an um timi zong theih khawh a si rih lo.

Matupi um hmun a khuar mi ralhrang phu hi motor 3 in an si tikah an tam hringhran ko, tiah mithmuhtu pakhat nih a chim. Ralhrang lei ralkap hi a tlawmbik 120 hrawng an tang rih ko, tiah an chim. Surkhua sakhaan cu CDF – Hakha nih an lak hnu ah zei thawngpang hmanh um lo tein a dai ngai cang, tiah khuami nih an ruahmi cu nihin ni ahcun Surkhua ah um hmun khuar dawh in an um cang. Asinain, hihi um hmun an khuar hrimhrim lai, tinak a si lo.

Tuzan tiang thawngpang kan theihning ahcun zingka in an i kahnak cu a dai cang. Nain, Surkhua khua taw hrawngah meithal thawng le Bomb puak thawng cu kan theih peng rih ko, tiah an chim. Nihin an i kahnak ah hin ralhrang lei nih hriam ngan pipi le Bomh in an kah peng hna caah CDF – Senthang hriamtlai phu caah thil fawi a si lo, tiin kahnak thawng a theihtu pawl nih an chim. Hihi kahdohnak hi pawngkam khuami security pawl nih Bomb puah thawng le meithal kahnak thawng cu an theih pengmi a si.

Nihin CDF – Senthang le Ralhrang pawl kahdohnak ah ralhrang lei ralkap minung 20 ruak cu motor cungah an chiahmi hna cu mithmuhtu pakhat nih a chim. Ralhrang ruak 20 tiang an putmi hna le motor cungah an chiahmi hna ka hmuh hna, hliamhma a pu mi zong an um pah len, tiah a chim. Ralhrang ruak motor cungah an chiah hna lio le an put lio hna ah ka rel lengmang tikah ralkap ruak 20 tiang ka rel tiin a chim. Cucaah, ralhrang ralkap 20 an thi i, hliamhma a pu mi zong an um len lai, tiah ruah khawh a si.

Tuzan hi ralhrang pawl cu Surkhua khuapi ah an riak lai, tiah zumh a si. A cheukhat nizan an i kahnak Leihva zongah an um pah rih ko lai, tiah an chim ve. Ralhrang ralkap hi 120 an tang rih i, an thazaang a thawng tuk rih tiin thawng kan theih. Cucaah, Surkhua khuapi pawngkam hrawng a ummi ralhrang ralkap thazaang hi fawi tein tei khawh ding an si rih lo, tiah thawngtheih a si. Bawipa tu nih CDF – Senthang ralkap venghim ko hna seh. Thlacamnak in bawmh cio hna usih.

Aho Dalan Ruangah Matupi Um Ralhrang Nih CDF Ready Tein An Kal Hnawh Hna? Matupi lei in ralhrang motor 3 a rak kai mi cu Hakha Peng, Senthang ramchung an phan bak in meng 2 hrawngah motor 2 cu a hmailei pi ah an kalter i, motor 1 chung a ummi ralhrang pawl cu motor cung in an tum dih in ke in an kal hna ti a si. Ralhrang motor 2 nih Leihva a phan tikah motor 1 cu a hnu lei pi meng khat hrawngah duhsa tein a kal rih ko. Motor 2 nih Leihva tiva an phan tikah CDF Senthang nih an bawh hna i an kah hna, a hnu lei motor 1 chung a ummi ralhrang pawl nih CDF umnak le um hmun an khuarnak an theih dih caah, an kulh khawhmi hna a si lai, tiah zumh a si.

Matupi um ralhrang nih zeiruangah Leihva tiva phan dengah motor 2 lawng an kalter i, Motor 1 cu hnu lei in duhsa tein an zulhter hnga. Cun, a hnu lei motor 1 ah a cit mi ralhrang pawl vialte an tum dih i ke in an kal hnga? Hihi, aho dalan ruangah thawngpang an theih i, an ralrin cia cang ti khawh a si. Ralhrang nih CDF pawl tu an kulh hna timi thawngpang theih tikah thinlung a kekkuai dih. CDF nih an bawh hna i an kahdoh hna nain, ralhrang lei nih a dum hna timi thawngpang cu vawleicung tuanbia hmanh ah a um tluk lai lo.

Nihin May 31, 2021 ni ah CDF-Senthang le ralhrang an i kahnak hi Surkhua le Aika karlak Matupi motor lam cung ah a si i, Bawinu tiva nitlak lei in Lungrang khua le Phaizawng khua an um ve. Khua 4 karlak kahdohnak a si ti khawh a si. Cucaah, Matupi um ralhrang pawl nih Leihva an phan lai hrawng in ralrin tein an ummi ruah tikah Khua 4 chungah Dalan pakhat khat cu kan um hrimhrim ko lai, timi hi a fiang tukmi a si.

Matupi um hmun a khuar mi ralhrang nih zeiruangah dah Senthang ramchung Leihva tiva hi an theih khawh i, ralrin tein an um cia hnga? Dalan nih chimh lo le thawngthanh lo ahcun aho hmanh nih theih khawh dingmi hmunram a si lo. Cucaah, hi khua 4 minung pakhat khat nih kan miphun kan unau kan Leirawi hna timi hi a fiang tuk ko rua.

Be the first to comment

Leave a Reply

Your email address will not be published.


*