NLD Party Hrawh Ding Kongah Tuluk A Hna Tla Lo

NLD Party Hrawh Ding Kongah Tuluk A Hna Tla Lo

 

Uknak chut tu le mipi a kan that cuahmah tu Min Aung Hlaing le a ralhraang pawl nih NLD party hrawh khawhnak ding caah dot khat hnu dot khat in rian an ttuanmi hi Myanmar ram cozah caah ralhraang pawl a cohlaang tu Tuluk hmanh a hna tla lo tiah The Irrawaddy nih hlathlainak an tuahnak in an theih.

 

Myanmar ram chungah ralhraang nih uknak an laak hnu in thla 3 a hung rauh hnu ah an mah ralhraang nih an thimmi UEC hna nih NLD party hi kan hrawh lai tiah mipi theih bak in thawngthanhnak an tuah. A luan ciami May ni 21, kum 2021 ah khan Naypidaw khua Union Election Commission zung ah an tuahmi UEC le ramkhel party hna ton biaruahnak ah ralhraang thimmi UEC Chairman Thein Soe nih mah ti hin a chim.

 

“Upadi he aa tlaak lo ning in le a hlaan kan tein timh ciammaam tein teinak hmuhnak ding in rian a ttuan tu NLD party hi zei tin dah kan tuah lai, party hi kan hrawh lai, NLD party aiawh in rian a ttuan tu pawl cu rampi a rawi tu sinak in dan kan tat hna lai, kan ruah ciam ciam hnu ah rian kan ttuan lai” tiah ralhraang khanhmi Thein Soe nih a chimmi cu si.

 

Kan theih cio bantuk in NLD party Chairman Daw Aung San Suu Kyi telh in party lutlai deuh hna le party member tampi hna tiang in ralhraang nih an tlaih hna hnu ah ziknawh eihmuarnak upadi te hna hmang in taza an cuai hna, kum caan saupi thongthlaak khawhnak ding caah upadi pohmah a phun phun in an bunh piak hna.

 

Cun U Thein Soe nih a hruaimi UEC nih NLD nih Landslide bak in teinak a rak hmuhnak kum 2020 rampi election zong diknak le zalonnak um lomi thimnak a si tiin thimnak result an hrawhnak kong zong a luan ciami July ni 26, kum 2021 ah khan thanhca an chuah. NLD party kan hrawh lai a timi U Thein Soe biachimmi nih hin ralhraang pawl duhnak a langhter tuk caah ramdang hna zong nih NLD party hrawh a si tak sual lai ti an phang ngai.

 

Min Aung Hlaing nih a mah uknak le nawl neihnak hmun seh ti a duh tuk lung in Daw Aung San Suu Kyi nih hruaimi NLD party hrawh an timhmi cungah kan thinphang ngai tiah UN Special Envoy of the Secretary-General on Myanmar simi Ms. Christine Schraner Burgener zong nih a luan ciami August ni 11, kum 2021 ah khan American ram New York khua ah tuahmi Press Confrence ah a chim.

 

A cung lei bantuk in dirhmun a phanh lio ah Tuluk cozah zong nih NLD party hrawh ding a lungtlin lonak kong cu August thla tanttim lio ah khan ralhraang pawl sin ah a chim tiah The Irrawaddy nih cun an langhter. A luan ciami August ni 12 ah khan ralhraang khanhmi ramdang vuanci Wana Maung Lwin le China Ambassador to Myanmar in Chen Hai hna cu online cung in biaruahnak an neihnak ah Mr. Chen Hai nih ralhraang phu cu Kawlram cozah tiah a auh hna i NLD party hrawh ding an lungtlin lonak kong zong a chim.

 

Hi biaruahnak ah hin Tuluk nih Kawlram chungah thil tuah an duhmi project 21 le bawmhnak dang dang hna caah USD 6 millions kan in pek hna lai tiah biakamnak a tuah bantuk in NLD party hrawh an duh lonak kong zong an chim chap. NLD party hrawh ding an duh lonak kong an chimmi tu cu ralhraang phu nih mipi theih ding in an langhter duh bak lo.

 

A ngai ngai te ti ah cun Tuluk hi Ralhraang phu he lawng si loin NLD he zong pehtlaihnak ttha tein a neimi an si, kan hnu lei in Chinese Communist Party kum 100 tlinnak puai an tuahnak ah NLD nih lawmhpinak ca a kuat hna bantuk in Tuluk zong nih lawmhnak ca an rak leh ve hna.

 

The 24seven News

Be the first to comment

Leave a Reply

Your email address will not be published.


*