Pastor Rev. Thla Uk Caah Thlacam Ciau Hna Usih

” Dawtmi Krih ah U le nau Dawtu vial te LBC Pastor Rev. Thla Uk damnak tling a hmuh khawhnak lai thla cam piak cio hna u dih ”
Dawtmi nulepa Ulenau dihlak, kapa damlonak kong ah thawngpang nan kan hal, ruahnak nan kan cheuh pinah thla nan kan cam piakmi dihlak cungah lunglawmhnak tampi kan ngei.

Nizaan cu Oxygen a van tum ngai nain Pathian a tha i duhsah tein a vun kai than. Flow Meter zong tuanah kan hmuh i a kan kawlpitu nan dihlak cung zongah kan i lawm tuk hringhran.

Nizaan le Nihin ah phone chawnh le thawngpang halmi tete kan in lehmanh rih lomi hna le phone kan tlai manh deuh lomi an um pah len caah kan lung a tha lo ngai.

Atu lio kapa sining cu, atak adai nain oxygen hi 90 cung a kai duh deuh rih lo i oxygen pek peng kan hau rih caah thlacamnak in kan bawm hram rih ko uh tiah kan in nawl.

Thlacam-zohkhenh pitu nulepa ulenau nan dihlak cung ah kan i lawmtuk, Pathian nih thluachuah in pe chinchin ko hna seh!

Crd : Rev.Thla Uk fanu Siang Siang FB.
==

Thawngdang relchap
Rakhai Ah Covid Zawtnak Hmuhmi Minung 1200 Tluk An Si Cang, Covid Ruangah Nunnak Liam Mi Minung 26 An Phan Rakhai ramkulh chungah Covid-19 , third wave in July 15 zaanlei suimilam 5 tiangah zawtnak hmuhmi dihlak 1200 tluk an si cang, Covid zawtnak ruangah nunnak liam mi minung 26 an si cang tiah Rakhai ramkulh ngandamnak lei nih nihin July 16 zinglei ah an langhter.

Ramkulh ngandamnak lei department cathanh chuah ning ah Rakhai ramkulh ah Covid third wave a thok ni May 12 thok in July 15 zaanlei suimilam 5 tiangah Covid zawtnak hmuhmi hi 1151 an si , Covid zawtnak ruangah nunnak liammi hi minung 25 tiang an phan cang tiah an langhter.

Covid zawtnak hmuhmi minung 1151 chung ah sizung in tumnak nawlngei mi hi minung 502 an si, sizung kakip in cawnghhramh lio mi hna hi minung 649 an si tiah ramkulh ngandamnak lei nih cathanh an chuahmi ah an langhter.

Nunnak liammi minung 26 ah hin Sitduai(စစ်တွေ) in minung 5, Mawngtaw(မောင်တော)in minung 5, Tantuai( သံတွဲ )in minung 4, Tawngkauh(တောင်ကုတ်)in minung 8, Kuah( ဂွ ) in minung 1 le Kyautphyu(ကျောက်ဖြူ in minung 3 an si tiah ramkulh ngandamnak lei cazin ning ah theih a si.

Atu lio Covid-19 hi a hlan deuh phun he a khah lo caah , a hlannak in a karh a fawi i , chawnh a fawi caah runvennak sii chunh cang mi zong Covid zawtnak chawnh nak a chuak than Rakhai ramkulh chungah Covid-19 third wave in zawtnak hmuh mi an karh i, nunnak a liam mi hna zong Covid zawtnak voihnihnak a tlun lio nak khan an tam deuh. Cu ruanga ngandamnak lei nih minung 30 nak tam hmunkhat ah i pum lo ding in le lengchuah poh ah mask bunh ding in ralrinnak ca an chuah.

Covid zawtnak runvennak ding caah zulhphung chuah mi zulh lo in le minung tampi i pum in um, mask bunh Lo ahcun phaisa liam ding le thong kum-7 thlak ding in dantat nak kan tuah lai tiah ramkulh Council nih an chim ve fawn.

Be the first to comment

Leave a Reply

Your email address will not be published.


*