Pathian mithmuh ahcun

Pathian mithmuh ahcun;-

 

Dawtmi u le nau hna kal tak le then a hmangmi minung he i duhdawtnak cun Pathian Fapa a simi Jesuh Khrih kan Bawipa he i duhdawt hmanh a tha deuh. Zeicatiah cun Jesuh Khrih cu nang le kei kan pasal ding a si bantukin Jesuh Khrih he i duhdawt hnu ahcun midang cungah dawtnak le zaangfahnak zong kha a takin ngeih khawh a si. Cucaah cun Jesuh zong nih, “Nawl kan pekmi hna cu hihi a si: pakhat le pakhat i daw u,” tiah a kan ti. ( Johan 15 : 17 )..

 

Zumhnak thawngin kan pasal ding a simi Jesuh Khrih kan Bawipa bia hi kan ngeih bak ko a si ahcun kan biakmi Pathian kan Pa taktak zong a simi Bawipa Yahweh nih a duhmi a Nawlbia vialte kha kan zulh zong a si caah hin Jesuh a rak zultu a simi Johan zong nih a kan timi cu, “A Fapa Jesuh Khrih min zumh le Khrih nih nawl a kan pek bantukin pakhat le pakhat i dawt hi a si. Pathian nawl a ngaimi paoh cu Pathian chungah an um i an chungah Pathian kha a um. Cun Pathian kan chungah a um ti kan hngalhnak cu hihi a si: Thlarau a kan pekmi thawngin kannih nih kan hngalh,” tiah a kan ti. ( 1Johan 3 : 23 – 24 )..

 

NOTE : Khrih ah dawtmi u le nau hna nu le va cu Pathian mithmuh ah pumkhat an si bantukin nang le kei zong hi zumhnak thawngin Pathian mithmuh ahcun a Fapa Jesuh Khrih he pumkhat kan si ve cang caah khan Bawipa Jesuh Khrih chungah a ummi si zungzal ko hna u sih. Zeicatiah Jesuh Khrih zong nih a rak timi hna bia te cu, “Ka chung i nan um i ka bia kha nan chungah a hmunh ahcun, nan duhmi paoh kha nan ka hal lai i nan hmuh ko lai. Nannih nih thei tampi nan tlai thawngin ka Pa sunparnak kha nan langhter i cuticun ka zultu i nan i canning cu a si. Ka Pa nih a ka dawt bantukte in kei zong nih kan dawt ve hna; kan dawtnak hna chungah hin um ko uh. Ka Pa nawlbia kha ka ngaih i a dawtnak chungah ka um bantukte hin ka nawlbia nan ngaih ahcun kan dawt hnanak chungah hin nan um ve lai. Ka lunglawmhnak kha nan chung-ah a um i nan i lawmhnak cu a tlin nakhnga, hi bia cu kan chimh hna. Kei ka nawlbia cu hihi a si. Keimah nih kan dawt hna bantukte hin pakhat le pakhat i daw u,” tiah a rak ti hna. ( Johan 15 : 7 – 12 )..

 

Ka dawtle hna, pakhat le pakhat i daw u sih, zeicahtiah dawtnak cu Pathian sinin a rami a si, dawt a hmangmi paoh cu Pathian hrinmi an si i Pathian an hngalh. Dawt a hmang lomi paoh nih cun Pathian an hngal lo, zeicahtiah Pathian cu dawtnak a si. ( 1Johan 4 : 7 – 8 ). A biathiang aa hrawmmi zumtu kan dihlak cungah Fimchimtu Thiang Thlarau nih kan thlarau mit auter ve sehlaw cuticun hngalhfiannak zongah kan pe cio ko seh. Amen.

 

Thank You For All;

Johnly Fambawl

Be the first to comment

Leave a Reply

Your email address will not be published.


*