Thihnak Hnakin Thihhnu Thlarau Hell Kal Khi A Fak Deuh

A faak bik mi cu

Thihnak ton hi a faak bik mi asi lo. Mi zeipoh a thi ding lawngte kan si ko. Thihnak nihcun mirum, sifaak, muidawh, muichia, mingo, minak tiin thleidanlo tein a kan phak dih te ko lai. Cu thihnak kan ton mi cu a faak bikmi asi lo. A faak bik mi cu hihi asi, “thih hnu ah kan Thlarau hell i a tlaak ding mi khi asi”.

Thih hnu ahcun hitihin thleidannak a um te lai. Khrih zumh buin a thi mi le Khrih zumhlo in a thi mi tiin thleidan kan si te lai. Culak i a zumlo mi lak ah i tal i hell i tlaak khi a faak bik mi cu asi. Na nun liao caan na neih liao ah Khrih nih an sawmnak aw hi thei in zumh dingah duhpiaknak kan ngei.

Thaizing ah kumvei ah hmaithla ah kan ti awk asi lo. Tuzaan ah a thi kho dih mi kan si. Cucaah, atubak kha Khrih zumhnak dingah caan ttha na neih mi cu asi.

Thihnak ton hi a faak bik mi asilo.
A faak bik mi cu “thih hnu i hell i Thlarau kal ter khi asi deuh”.

Reltu vialte Thlarau nih fian nak in pee kho hna seh.

Kaalawm tuk.
Crd, Van Bawi Lian
==

Bantuk ruahnak a ngeitu cu hruaitu dingah an i tlaak lo.

Hruaimi pakhat khat bia ing khawhlo ruang i hruaimi kha a lam kip in hrial le a thangchiat aa zuam mi hruaitu.

Hruaimi kha heh tiah thazaang peek len i a rak i timhmi cu hruaimi khurchung i thlaak a hman mi hruaitu.

Hmaainawr dingin ruahnak cheuh len țung i mah vial hnu ah i thlaai peng, hruaimi lawng saaraal ah terh a hman mi hruaitu.

Hruaimi vialte rualraan tein zoh lo in thleidan a ngei tuk mi hruaitu.

A rian tlaihmi kha țha tein hngalh țunglo i midang rian kongah buai a huam tuk i mah rian hmanh țuan khawh hlenglo i midang rianțuan piak timh a hman mi hruaitu.

Ram le miphun ca le Khrihfabu caah peek nak kong heh tiah cawnpiak țung i amah bal cu peek ve van chimlo in an peek cia eihmuar a hman mi hruaitu.

Thil pakhat kong meeting nak ah an ceih i biachahnak an neih cang hnu ah a leng ah phunzaai a hman tuk mi hruaitu.

Meeting nak ah ceih ding cuahpi i mipi an lung a tlinglo i aa ngal fawi tuk mi hruaitu.

Mah duhnak lawng a zoh thiam i midang duhnak hmuhpiak a thiamlo mi hruaitu.

Hruaimi thangchiat a hman mi hruaitu.

Hmaailei kong rak cuanh chungnak a ngeilo mi hruaitu.

A sial cia nak ah silo in mi sial cia nak lawng ah zalong tein kal a duhmi hruaitu.

Tikhur huat huam țunglo i midang huat cia cungah hmaaisa bik le hraai tam cem din a duh peng mi hruaitu.

Hruaimi nih thlanti he rianțuan liao ah mah duh salam in khua a rak sa mi hruaitu.

Mi thangchiatnak chim hman ngai i kaa hnih khat a kong chia van chim sual tikah thi deng i thinhung a hmang mi hruaitu.

Hruaimi duhnak hmuhpiak thiam aa zuamlo mi hruaitu.

Ruahnak thar (news idea) ngeih aa tim ballo mi hruaitu.

Mah nih thilțha hmuh khawh țunglo i midang nih an hmuh cia mi thilțha cungah aa lawm khawhlo mi hruaitu.

Hruaimi zeirello a Hman mi hruaitu, nan nih hna cu degree zong nan neilo tiphun i cawnnak a neimi kha hruaimi teinak ah a hman mi hruaitu.

A fim thiamnak kha an theih ve sual lai tiah, thuhnawk a hman mi hruaitu.

Bantukin ruahnak a pu mi vialte hruaitu cu hruaitu siding ah an i tlaak lo tiah keimah nih ka ruah! Hi leng ahhin chap awk a tampi rih lai.

Hruaitu kan si bantukin hruaimi dirhmun zohpiak thiam le an sining cohlang thiam hi a biapi tuk! Hruaitu si uar ngang i ram le khrihfabu le titlang hrawnh pengtu siinak cun a remh khotu le a hruai khotu kut ah chiah i hruaimi dirhmun zongah dir ding asi ko.

Kawl nih cun hruaimi țha na si hnu ah hruaitu țha na si lai an ti.
Mirang nih cun Sianginn hngakchia țha na si hnu ah saya țha na si lai an ti!

Cucaah, hruaitu lawng uar lo in le Saya lawng uar lo in, hruaimi țha le Sianginn Hngakchia țha si i zuam hna usih law, a donghnak ahcun hruaitu țha le saya/mah țha kan si te ve lai.

Reltu vialte nan cungah kaalawm.
Crd, Van Bawi Lian.
==

Relchap
PATHIAN sinah lawmh biachim hi a phu ko dakaw!

Voikhat cu tar asi cang mi kum-85 pa cu ruahlopi ah a tlu i sii-inn ah an tlikpi colh. Doctor hna nih oxygen minutes 30 chung an peek hnu ah a hun nung țhan.

Doctor hna cu tarpa sinah cun an van ra i a tu i oxygen man kha Dollar 500 asi lai tiah an van chim hna le caangka te in a mitthli a tla i a țap thluahmah.

Doctor hna nih cun kapu tangka pek awk na neihlo zongah na lungrawk hlah kan in zaangfah ko lai tiah an hnemh! A chung le zong nih cun kandam pei a biapi ko cu dollar 500 tham cu a tam țunglo, țap hlah law kapu tiah an hmemh chih ve.

Asinain, 85 asi cang mi putarpa nih cun hitihin a leh hna : Dollar 500 pek awk ka ngeihlo ruangah ka țap asilo ee. Cun, dollar 500 hi a tamtuk ka ti ruang zongah ka țap asilo ee.
Ka țapnak a ruang cu mu, minutes 30 thaw van i peek hmanh i dollar 500 asi mi hi ka chuahkaa in kum-85 ka si tiang thaw a ka peetu PATHIAN nihhin a man ka hal sehlaw zeitluk tam dah a si hnga timi ka ruah ah ka țap ee tiah a ti hna.

Nihin tiang thaw an hlaantu kha BAWIPA asi.
Cu thaw cu a laak te in nifatin peek na si, cu thaw nifatin an petu BAWIPA sinah hin nikhat ah voi zeizah dah BAWIPA kaalawm na ti ve tawn?

Nifa tein BAWIPA sinah hin lawmh biachim hi a phu hrimhrim ko dakaw.
Nifa tin BAWIPA sinah lawmh bia a chim khotu siding in BAWIPA nih fiannak kan pe ko seh!
Amen!

Crd, Van Bawi Lian
==

Relchap
#Carelnak nih hngalhnak a haar ter.
Hi catluan tawi tete hi rak rel ve ding in kan sawn hna.

#Zawtnak phurtu nih cun zawt damnak si siam an i tim lo.

#Khrihfabu hrawhtu cawnpiaknak diklo nihcun Khrihfabu damnak cawnpiaknak dik chim an i tim lo.

#Bawmhnak lawng a bawhmi nihcun mi bawmhhal an ningzak tawn!

#Ningzah hngallo mi hna sinin mipakhat sinah ningzahnak a phan tawn.

#Zalam tlumlo in keimah ve tiah a au mi pawl khi mah hngallo deuh an/kan si.

#ATthangcholo mi nun nihcun chimhhrinhnak kha a huat.

#Tuaktaanlo lairelnak nih ngaihchihnak a chuahter.

#Hmursaau tukmi hmurkaa in khat le khat remlo nak lawng an chuak.

#Ahawipa/nu biathli a phuan lengmang tu cu a hosin hmanh in biathli a thei ti lai lo.

#Leiledang hmanh aa seh minung le minung zong khua caan ahcun i hmuh thiamlonak zong um phung asi ko.

#Nulepa a upat mi hna cu pumrua le thilthuam dawh an ngeilo hmanh ah nundawh a ngeitu an si.

#Pawngkam zoh in nun zia a thiammi hna khi mifim cu an si.

#Mah nih tuah ngamlo mi tuah awk ah midang fial cu mah le mah lucung ah meittil chiah he aa khat.

#Chungthulengnaal timi cu chung nun ah um ttunglo mi langhter a hman mi khi an si.

#Zultu ttha si hnu lawngah hruaitu ttha si khawh asi.

#Kapalh ti naa theih hlaan chung poh cu palhnak lam na zawh asi.

#Kapalh/tlau ti theih/hngalhnak nih lamtak a hmuhsak.

#Palh duhlo mi hi a palh mi an si tawn.

#Duhpoh khuasak cu hlawhtlinnak hee aa hlat.

Kaalawm tuk!
Van Bawi Lian.
==

Relchap
1. Mah duh ning poah/Mah le siarem ning paoh in PATHIAN kan thangtthat lai ti cu, ning hngal asi.
Vawlei bawi pawl hmai hmanh ah mah duh ning paoh le mah le siarem ning paoh in um a ngah lo.

Bawi lawng nih sal kha a duh ning in a um ter awk asi. Sal nih bawi kha a duh ning in zeitikhmanh ah a umter kho bal lo.

PATHIAN cu kan BAWIPA asi, kan sal asi lo.
Cucaah, kanmah siarem ning le kanmah duh ning poah in si hlenglo tein AMAH duh ning le AMAH nih a ti ningin kan thangtthat awk asi.

2. Thawngttha biachimtu pakhat na si tikah, soiseltu le dohtu, thangchiattu na neihlo ahcun PATHIAN rian na ttuannak ah faak deuh in naa zuam a hau rih.
A hlawh a tling mi cu dohtu, soiseltu, thangchiattu an nei tawn.

Minung duhning in siloin BAWIPA bia ningin kan chim deuh awk asi.
Biatak cu micheukhat kan caah cun a khaa tawn. Asinain, biatak lo nihcun nun a remh kho taktak fawn lo.
Biatak cu dohtu a nei zungzal.

3. Katlau ti aa hngal duhlo mi cu lam dik a hmu kho lai lo.
Tlaunak i hngalh hi lam dik hmuhnak asi.

4. Mah tthawnnak a bochan tukmi hna sinah PATHIAN bawmhnak a phan leem lo. Ka chambau tiah, BAWIPA bawmhnak herh in a nun tangpi ah aa chia mi hna sihah BAWIPA bawmhnak a phan tawn.

5. Lungkhong tuk cu mah le mah i nehsawh he aa khat. Biatak an chimh ko nain, lungkhong tuk ruangah a zulh duhlo mi cu a mah pum lila a nehsawh kha asi ko. A ngaih duhlo man a tuartu cu a mah lila asi caah asi.

Kaalawm tuk.
Van Bawi Lian.

Be the first to comment

Leave a Reply

Your email address will not be published.


*