PDF-Bilin sakhaan an lak, tiah SAC ralkap lei minung pawl nih thawng diklo thanh

PDF-Bilin sakhaan an lak, tiah SAC ralkap lei minung pawl nih thawng diklo thanh

 

August 25, Mon Ramkulh Bilin ah PDF sakhaan pakhat SAC ralkap nih an lak tiin anmah leitang minung pawl nih facebook le telegram cahmai ah thawng diklo an thanh len tiah theih a si.

 

“Hmanthlak an tarchih mi khi Paung peng ah SAC ralkap nih KNU sakhaan an rak lak lio hmanthlak an si. Cun, hmanthlak pakhat an hman mi thiamthiam ah Thaton khua an rak tlaih mi hmanthlak aa tel fawn i hihi a diklo mi a si,” tiah khuami lei nih an fianter ve..

 

August 11 zaan lio Paung peng The-inn khua pawng KNU sakhaan an rak lak lio ah KNU ralkap 3 le khuami 15 an rak tlaih hna, tiah Than Lwin Times nih a langhter.

 

Minute 1 ah liter 500 a rawn kho mi Oxygen Plant le Chest X-ray Hakha a phan cang

 

Vawlei killi ah a um mi Khrihfabu (Khrihfami) hna nih an thawhkhawm mi in timhtuah mi Oxygen Plant le Chest X-ray cu August 25 ah Hakha a phan cang i Pathian sin pekchanhnak zong an tuah cang, tiah kan theih.

 

“Hihi miphun damnak caah tiin zawnruahnak he vawlei killi um mi Khrihfabu le zumtu hna nih kutsamh mi a si i kan i lawm taktak. Pathian nih miphun damnak caah thlua kan chuahpiak sehlaw pechantu dihlak thluachuah pe ko hna seh,” tiah upa pakhat nih a chim.

 

Hihi Hakha Township Public Healthcare & IDPs Management Committee nih an tawlrel mi a si i tangka fang in sing 3600 hrawng dih in tawlrel mi a si, tiah kan theih.

 

 

Tedim Myanma Economic Bank hngak Palek 3 an kahthah hna

 

August 25, 11:30 AM hrawng ah Tedim Myanma Economic Bank a hngak mi Palek 3 cu aho si hngalh lo mi hna nih meithal in an kah hna i an thi, tiah theih a si.

 

Hi kahnak hi Tedim Myanma Economic Bank ah pension thlahlawh an chuah lio ah a si tiah Tedim Post nih a langhter.

 

Lunglawmhnak

 

Hakha Pyidawtha Sang, CB Bank hmai, Market chak ah Moe Sandar te chungkhar nih an inn cu “Nuam Store” dawrkhaan tuahnak ah an kan hlanh i thla 2 chung dawrkhaan man an kan la lo (an kan dawt).

 

Cu hlan COVID-19 zawtnak a chuah hnu vialte zong dawrkhaan man hi hnarcheu (zatceo) an kan dawt peng fawn.

 

Atu bantuk boruak har lio le caanchia lak ah zawnruahnak he an kan dawtnak hi Pathian nih theihpiak ko hna seh, tiin kan lunglawmhnak The Hakha Times in kan langhter.

 

Nuam Nuam Nu

The Hakha Times

 

 

 

 

 

 

 

 

Be the first to comment

Leave a Reply

Your email address will not be published.


*