PDF-Kalay Nih Kalay Peng Mipi Sinah Theihternak Le Ralrin Peknak Cathanh A Chuah Cang

PDF-Kalay Nih Kalay Peng Mipi Sinah Theihternak Le Ralrin Peknak Cathanh A Chuah Cang! May 31 ah PDF-Kalay nih cun ralhrang hi biatak tein kan kah cang hna lai caah an umnak kiangkap ah um ti lo dingin mipi sinah theihternak le ralrin peknak cathanh a chuah cang. Cu cathanh cu a tanglei bantukin a si. Tuni zinglei 8:00 am hrawngah ralhrang rual 50-100 hrawng hna nih Kalay peng Tha Si khua cu an luhhnawh i hramhram in mipi an tlaih hna, an hro hna, thilri an chuh hna. Khuami 8 drawing an tlaih hna pin ah khua chungmi hna sinin tangka sing 50 hrawng an chuh hna.

Ralhrang tuahsernak lehrulhnak ah PDF-Kalay nih Tha Si khuachung ah hmunhma a khuarmi ralhrang hna cu tuni 9:00 am ah kan kharkhumh hna i chun 12:00 tiang kan i kap. Kahdohnak ah a tlawmbik ralhrang 2 an thi i PDF-Kalay lei pakhat hliam a tuar (A fak cu si lo). Kalay mipi hna cungah ruru hranghrang in a ummi ralhrang hna cu PDF-Kalay nih biatak tein kan kah cang hna lai timi kha kan in theihter hna. Kalay peng mipi zong nih PDF-Kalay hi kan dirkamh cio u, cun ralhrang hna nih hmunhma an khuarnak zung, sakhan, sianginn le inn hna kiangkap ah luhchuah le umkal lo hrimhrim lo dingin zaangfah kan in nawl hna. (Zalen) Laknak: The Hakha Post

Thawngpang dang relchap : SAC ralkap nih Hakha in tlaihkhih mi minung 183 chung ah 90 hrawng hren rih, pahnih nunnak a liam
==============================
SAC phu nih nawlngeihnak a laak hnu 2021 February 1 in nihin tiang ah Hakha in minung 183 an tlaih cang hna i minung 90 hrawng cu thlah an si rih lo, cu hna lak ah pahnih cu an thi, tiah kan theih.

“Kanmah nih kan zulhdawi khawhtawk le kan khawmhsuat khawhtawk ah nihin tiang tlaihkhih mi hi minung 183 an si. Minung 92 hi an hren rih hna i cu hna lak ah pahnih an thi. Kan hngalhlo kar in an thlah mi zong an um kho ko. Cun, Hakha Palek Sakhaan le Rungtlang Ralkap umnak 266 in hmun dang, khua dang ah an thial hna maw thial hna lo tu cu kan hngal kho lo. Hakha ah an hren ko hna lai dah,” tiah CHRO in tuanvo ngeitu upa pakhat nih The Hakha Times ah a chim.

SAC phu nih Myanmar ramchung ah Chinmi an tlaih mi hna hi May 31 tiang ah 380 an si i, cu chung ah Hakha in minung 183 an si. 183 chung ah minung 92 (a thi mi hna he) an taang rih i an thlah than cang mi hna hi minung 91 a si cang. Hi chung ah Pu Tler Ling (Hakha) le Pu Khamh Bawi Lian (Thangzang) cu an hrem hna ning a fah ca ah Kalaymyo lampi ah an thi i nihin tiang an ruak hmuh khawh an si thai lo. The Hakha Times

Be the first to comment

Leave a Reply

Your email address will not be published.


*