PDF Nih Ralhraang Motor Bomb In An Puah Than, Pa 10 Hrawng An Thi

PDF Nih Ralhraang Motor Bomb In An Puah Than, Pa 10 Hrawng An Thi

Tuni August ni 20, kum 2021 zanlei suimilam 2:00PM hrawngah khan Sagaing ramtthen, Pale peng ah Min Aung Hlaing ralhraang pawl motor cu Pale-Gangaw motor lam cung, Pinnpin timi lam kuaih zawn ah PDF nih mine bomb in an puah hna i ralhraang 10 hrawng an thi tiah Pale PDF hna sin in thawngpaang theih a si.

Zanlei suimilam pahnih hrawngah khan Pale PDF nih ralhraang motor bomb in an puah, ralhraang pawl nih an hawi le thimi ruak pawl cu a rannak in an rak laak colh hna, ruak zei zat set an si cu theih si lo, Pale PDF ralkap lei tu in cun a thimi le hliamhma pumi ho hmanh an um lo.

Nizan August ni 19 zongah khan Gangaw le Kalaymyo kar ah Min Aung Hlaing ralhraang pawl phur tu motor pahnih cu Yaw Defense Force (YDF) hna nih mine bomb in an phomh hna i ralhraang 20 hrawng an rak thi cang.

Min Aung Hlaing le a ralhraang pawl sunghnak ni le caan a nai cuahmah cang, an mah lawng si loin an dirhmi piosawtthi phu hna le an khanhmi khuabawi pawl zong PDF lei nih an fimtawl thluahmah hna ruangah cheukhat khuabawi pawl cu an chungkhar hna he an zaam.

Relchap
Chin Miphun Cu Kan Sifaak Nain Minung Lungput Bak Neimi Kan Si

Chin miphun paoh hi kan dihlak in zumhtlaak (titsa nei) kan si dih lo nain Chin miphun paoh nih midang sin ah fawi tein biakamnak kan tuah lo, kan Lai phungthluk ah “ka bia kam le ka tlah ttawn” ti si bantuk in biakamak kan tuah cangmi cu kan nunnak pek tiang in kan upat.

Chin miphun paoh kan fel dih lo nain Chin miphun cu 100% in minung lungput a neimi le a langhtermi kan si, Chin miphun paoh kan rum dih lo nian mi cung ah dawtnak le zaangfahnak lei ah cun kan si a faak lem lo (Chin ramkulh chungah kutdok kan um lo), a rummi hna zong nih chaw le va nak in a daimi le a nuammi nun khuasak an duh deuh.

Chin miphun paoh ca kan thiam dih lo nain Chin miphun cu midang cungah dawtnak le zaangfahnak lungput a neimi kan si, kan holhka a hraang nain a chung lei ah a thlum, Chin miphun paoh nih Salai le Mai timi an hmang dih lo nain Salai le Mai timi nih hin Chin miphun nu le pa kan sinak a thleidan ter.

Chin miphun paoh tlaangcung theng ah kan um dih lo nain Chokhleipaar a tlaihchan tu lawng te kan si, Chin miphun paoh kan i uah lo nain Chin miphun cu ningzah kan thei tuk, Chin miphun cu ramhlak ah khuasa kan si nain ramhlak upadi kan hmang lo.

Chin miphun paoh nih biaknak kan i hruhpi lo nain a hlaan lio tein kan Chin miphun hruaitu hna nih zei bantuk biaknak upa maw hruaitu hmanh an that bal hna lo, Chin ram chungah mah le duhmi biaknak cio zalong tein biak khawh a si, Chin miphun cu mi nehsawhnak lungput kan nei lo nain a kan nehsawh tu a zohsawh mi kan si ve lo.

Chin miphun nih a ho ram hmanh kan cuh hna lo nain kan ram a kan cuh tu cu zei bantuk minung an si zongah ttihnak a pel te hmanh nei loin a do ngam tu kan si, Chin miphun cu ca kan thiam lo, kan si a faak nain vawlei cung ram kip ah Chin miphun kan phan kho ve dih cang, mah hi Chin miphun hna kan kong tlawmpaal te kan vun langhtermi si.

Credit – Za Biak Nawl

Be the first to comment

Leave a Reply

Your email address will not be published.


*