Phekone Pengthen I kahdoh Nak A Linsa Taktak (+Video)

May 23 zinglei nazi 9 hrawngin kah an i thok i cu i an i donak ah cun palik bawi pakhat ai tel i cun a dang palik 4 zong an thi. SAC ralhrang lei tangmi an dih lakin minung 14 an thi tiah PDF Mongpai tuanvongei mi pakhat nih RFA sinah a rak chim. Amah nih cun Sakhan dihlak in nazi 1:30 hrawngah an lak dihnak kong a rak chim. Nazi 1 chungah an dirhmun cu a tha lo ngaingai i minung pa 2 cu kan kutah an i ap lawlaw.

Sakhan chung i um mi meithal a chia duh lomi ralkap le palik minung 15 hrawng cu a hmunah an thi colh tiah a chim. Palik zung cu kan khangh piak dih hna i palik pahnih cu kan tleih hna i tu tiangah cun nung damin kan chiah rih hna ti zongah a chim. An i donak ah cun SAC ralkap lei thi an um bakin PDF lei zongin vawlei chungah bomb an phumi ai lamh sual ruangah hliamhma tuar mi an um i meithal kahnak zongin hliamhma tuarmi 4 an um i pakhat nih cun mual a kan liam tak ve tiah theih a si.

An i donak ah cun tatyin 422 ralhrang nih meithal a nganmi he i bawm in an kan kah len ko nain mipi leiin hliam hma tuarmi kan um lo ti awk tluk si. Aruang cu May 23 zinglei nazi 8 hrawngah khuami pawl lengchuak lo dingin PDF tuanvongei tu pawl nih May 22 ah mipi ralrinnak an rak kan pek cang ruangah si. Khuami cheukhat cu inn le lo chuah takin hmunhimnak zong an i kawl cia hna. A tu dirhmun ah hin SAC ralhrang nih meithal an puah tuk ruangah a tangmi um chun khuami cheukhat hna cu leng zongah an chuak ngam hna lo.

Tuah hin leng i chuah menah cun khualei hoihin meithal lianmi an kah tuk ruangah lengchuah zong kan caah a him lo taktak cang tiah mi pakhat nih cun a chim. Tu dirhmunah hin Shanram phekone Township telin Kayak ramkulh khua cheukhat pawl hna ah cun bomb puak siseh i kah dohnak a um lengmang ruangah ramlak i dornak hawl tu mipi 5000 tluk an um cang tiah theih a si.

Cu kong he pehpar in May 23 i ralzaam buk i tuanvongei mi mipakhat nih cun khua tamtuk ah bomb puak thawng le meithal puak thawng thangin i dohnak a um tikah khuachungah um ngam ti loin rawltam le tihal ruahsur tuar in upa hngakchia tar he ram lakah saram bantukin a zaammi hi minung 5000 reng lo kan si cang hna e tiah mipi sinah theihternak an tuah. A bikin Loikaw peng Demoso peng le Phekone peng i a ummi ralzam pawl hi an tam bik.

Ralzaam an tam tuk caah caan saupi chung i ram lak um zong hi a si kho fawn lo. Cu ruangah May 23 in ralzaam buk thar kan dirh i umhmun kan khuarnak pawngkam i ummi ralzaam cheukhat cu kan sin i um dingin kan sawm ve hna. Cu bantuk dirhmunin kan um ruangah ralzaam buk umnak pawngkam ah i do lo dingin nawlnak kan ngei tiah a chim.

Mongpai zong ramri a simi. Kayak ramkulh khua cheukhat kan hnu zarhah khan PDF le SAC ralkap pawl fak ngaiin an i do ve i Kayah ramkulh hrambunh ralkapbu nih bomhnak an rak ngeih cang bantukin hmailei zongah i kap bawmin hmaikal an i tim peng i hmailei tik cun caan zongah i donak a um peng kho men tiah zumhnak an ngei.

Video

Be the first to comment

Leave a Reply

Your email address will not be published.


*