Pi Lalthianghlimi nih Bible Voi 7 Bak A Kut In A Tial Tu A Hmuhmi Thluachuahnak Khuaruah Har

Mizoram Aizawl khuapi Ramhlun North veng ah khua a sami Pi Lalthianghlimi nih cun Bible a kut bak in voi 7 tiang a tial dih cang tiah kan theih. A nih hi nuhmei a si i a fale 2 he a hmei mi an si .Bible tial hram ai thok nak cu thihnak an ton i a ngeihchiat tuk ruang ah a si . A voikhat nak a tial tan hi cu a pasal u neihchun a thih ruang ah a si ivoithum a tial dih hnu 2018 kum November thla ah a pasal Lalchuanawma nih cun a thihtak ve.

A pasal bak a van thih cun a tuarthiam lo tuk i Bible tial zong cu pehtlai ai tim ti lo nain , Pathian nih hnemhnak ah hmang dingin a ka fial a ti caah Bible tial cu a peh than .A hmasa ah cun Bible relnak in a ngeihchiat nak cu a rak i hnem nain online ah Bible a tial dihtu a hmuh hna hnu ah Bible tial hram ai thok ve cu a si .A hmasa bik a tial thok lio ah hin cun nauno a ngeih lio a si i a naute ai hngilh can le a pasal le a chungkhar an i hngilh hnu lawng ah a tial khawh tawn .

Bible a tial nak ah hin a kut zong a phing dih i Bible tialcu nuam tuk in a theih i pehtlai in a tial peng.Bible voi 7 a tial dih hnu ah Pi Lalthianghlimi nih a chim mi cu”Pathian bomhnak in Bible a voi 7 nak cu 2021,May 10 ah ka dih khawhve cang.Pathian thluachuah ka don ning le a ropui ning cu chimcawk ding a si hrim lo. Ka pasal nih hin kum 7 chung a ka dampi i a ka dampi chung ah cun Bible hi voi 3 ka tial khawh. Ka pasal nih a ka thihtak hnu ah Bible tial cu ka peh kho trilo nain Pathian lo cu i bochan ding dang hlei ka ngei lo timi kai fiang i Bible tial cu ka pehthan .

Pasal zuntuar pah in Bible tial cu a fawi hrim lo i ka mitthli he ka tialcan a tampi . Asinain ka dihkhawh hrim lai timi ruahchan nak ka ngei peng i zinglei nazi 2 hna ah ka tho i zankhuadei ka tial can a tampi .Ka pasal a damlio i ka tial lio ah cun ka pawngte ah a ka umpi i tisa a ka tuah piak Pathian bia a ka ruahpah i a nuamtuk. Ka pasal nih kum 7 chung a ka nunpi mi philhlonak hrim ah voi 7 cu ka tial hrim lai ka ti i Pathian bomhnak thawngin voi 7 cu ka dih kho ve cang .

Minung lei timhlamhnak lawngin cun Bible tial hi a tlamtling kho lailo timi ka theihtuk ve i Pathian sin ah ka hal chih i Pathian nih hlawhtlinnak a ka pekmi a si ko timi hi kai fiang tuk .Asinain ka tial lio ah hin Sehtan nih hna a ka hnawhtuk i thisen pek hau dirhmun tiang ka phan i ka damlo .Asinain Pathian nih zei bantuk zawtnak zong a teikhawh timi ka zumh caah ka pehchih i Pathian nih damlonak vialte cu a ka lak piak dih” tiah a chim.

Bible voi 7 tial dingin pen 524 a hman dih.A voikhatnak Bible a tial tan ah hin hin ni 428 a rau i ,a voihnihnak ah cun ni 299 a rau. A voithum nak ah cun ni 384 a rau i a voi 4nk ah cun ni 335 a rau.A voi 5nk ah cun ni 254 a rau i a voi 6nk ah cun ni 165 lawng a rau i, a donghnak a voi 7nk ah cun ni 206 a rau

Be the first to comment

Leave a Reply

Your email address will not be published.


*