R.I.P : A Poi Tuk E Tang 8 A Kai Liomi Tleirawl Nungak Note Cu Ti Ah A Paam

Tang 8 A Kai Liomi Tleirawl Nungak Note Cu Ti Ah A Paam: Mah hi thil a cangnak hmun hi AA tlang cung hriamtlai an umnak a simi Rakhine state ah a si tiah theih a si i KIA zong an umnak state a simi ah a si. A thimi hi a min ah cun Ma Leh Leh Win a si i tang 8 a kai liomi kum 14 a simi a si tiah an chim.

A hawile hna he sianginn an lawi hnu zanlei sangah a cozah nih a sak tharmi ti dilnak tank tidil or tikham ah an i kholh hna i cu ah cun ti a thupnak ah a tla tiah a hawile nih cun an chim. An zate in minung 7 an si hna tiah an chim i a mah he a hawi pakhat zong ti a thupnak ah an tla. A sinain a hawi pakhat cu a rak nung tthan tiah an chim.

An khua Tanhluai khua sizungah an tlikpi i sibawi hna nih a dirhmun a ttha lo siizung ngan ah kalpi u an rak ti hna. Cun siizung ngan ah an kalpi lioah cu ticun lampi ah a nunnak a liam hi a si tiah an chim. Cu caah zei kan tuah paoh ah ralring tein um hna u sih law hi thamtham hi cu tiah zei paoh hi ngamh tukin hmu hna hlah u sih timi hi zawnruahnak te he van chim kan duhmi a si. A ruang cu thihnak kan timi le van chiatnak kan timi hi thil kan ttihmi sin in an rak ra hna loh i thil kan ttih lomi le zei ah kan rel lem lomi sin tu in hin an rak ra tawn hna caah a si. Ka ca a reltu vialte hi vawlei cung ttihnak le muihnak chungin Bawipa nih himnak in pe ko hna seh!

Chin capar rel ding a um chap. Lam A Tlaumi Vanmi Part-1: Newspaper catlap ah rian a lawngmi an chiah chihmi cu din loin ka zoh i rian ka kawlnak ah suimilam zoh zong thei ti loh. Alarm ka chiahmi zinglei suimilam 4 cu a van awn i cu bakin cun zinglei pei a si cang hi tiah ka van theih ceo a si. Ka thawpi cu ka chuah i tu zan caah cun za rih seh tiah ka ti cu ticun ka mit benh cu kai phoih i cabuai cungah ka chiah.

Ruah nih cun din loin a sur i ka umnak inn cung cih cu ruah fang nih a peh peh in an tlak ko hna. Zei a si paoh ah thaizing ah ka hawipa Edward nih rian pakhat khat a hmuhmi cu a um theo te lai i cu cu ka hngah a hau rih ko. A tu cu ka it phawt ve rih lai tiah biachahnak cu ka lung chungin ka tuah. Rian loin ka um hi a sau cang i a um ciami phaisa zong a dih lei a panh cuahmah cang. Keimah bantuk catang ngei ve lo caah cun rian hmuh hi a fawi lo ngai bantuk in rian hi i thim awk a tlawm. Cu ti a si caah rian hi chun zan in ka kawlnak hi a si.

A donghnak ah ka thawpi cu ka chuah i tuzan caah cun za rih seh ka ti i cu ticun ih zai cu ka rel i it kai timh lio bak ah ka room inn hnu lei ah kutka cu fak ngaiin ai awn thawng cu ka hei theih. Ka lau ngaingai. Ruah nih le a tuk tuk ttek nih a tla pah fawn. Mithla hlah maw si tiah khin ka hei ruat pah. Ka dai thlang ngai ruah sur lakah ka hawipa inn in ka rak lawi caah inn hnulei kutka cu ttha tein ka rak hrenh ta lo timi kha ka hung theih.

Thlitu nih kutka a hranh caah kutka cu a mah le a mah ai khak i a si lai tiah ka ti i va hrenh dingin ka tho i ka hei kal. Inn hnulei kutka cu a rak i awng taktak i thli zong cu a hrang tuk lem lo caah zei nih dah a awnter ti hi ka ruat pah. Cun kutka hram ah minung kalnak a cinmi keneh hna cu ka hmuh caah ka lau ngaingai ko. Cu lioah ka ke bakin kut pahnih nih a rak ka tleih i ka lau tuk caah ei ka nu tiah ka au. Ka ke cu ka van zoh cu minung pakhat nih a kut hnih in a rak tleih ko cu ka hmuh. Ka hmai ah cun a khuk ai bil i a sam a sau ngaimi a lu cu tang ah a khun.

Ka ke cu fek tein a tleih i a kut cu a ther pah. Zaangfahnak tein na inn ah ka dorter ko mi dang cu an inn kutka ai hrenh dih cang le hi ti hin cun ka thi lai tiah aw ther ngaiin a chim. A aw ka theih bakin nu a si timi cu ka theih i zei dah hi tluk tlai ah nu nih cun hi ti hin a um tiah ka ruat colh. Saupi khua ruat ti loin a poi lo a ngah ko ra ra inn chung ah na thil hna an cin dih kha nai thleng la ka ti i a liangin ka tleih i ka thawh. Cun inn chungah ka hruai. Inn chungah kan lut i ka ihkhun cungah ka tthutter.

Cun a rannak in ka hnipuan a lummi cu ka chuah hna i a pawngah ka chiah piak. A lu cu ai khun peng caah sam nih a hmai cu a huh hna i fiang tein ka hmu kho loh. Hi hi i thleng mu coka ah rawl ka ser la tiah ka chimh. Cun coka ah ka kal colh. A chim lawng ka chim rawl hleimi zong a um loh. A thar in chumh a hau ko ka ti i rian rang taktak in rawl chumh cu ka thawk. Kai rian ranh tuk ruangah facang cu ka thlek sual i coka ttuang cungah cun an i tthek hna. A rannak in ka khuk kai bil i ka ruh hna. Cu lioah innpi lei cu ruah lo piin ka hei zoh duk sual.

Ei ka nu tiah ka au i ka lau tuknak ah hnulei bak ah ka vai hlonh ko. Innpi lei ka zoh ah khan a ke cu ka hmaika te bak ah ka hmuh caah a si i movie chung mithla hna khi a lo pah. Zei hmanh a chim loh i coka ah a rak lut ve. Cun a dir i khua a hoi a hoi i apple pum khat a tangmi cu a lak zau i a kawk pah in innpi ah a kal tthan. Cun apple cu a ei pah in rawl tuah ti duh hlah hi hi kai za ko tiah a kal pah in a ka chimh.

Ka tthunak in ka tho kho rih loh i a tu tiang ka launak a dam rih taktak loh. Duhsah in ka tho i zei thil hme a cang tiah keimah le keimah cu ka lung chungin kai hal. Ka zan mang bantuk khi a lo nain a taktak a si fawn ttung. Ka hei zoh i apple cu ihkhun cungah a tthu pah in din lo bakin a ei thluahmah ko cu ka hei hmuh. Ka room hi a bi ngai le rak ka theithiam ko law mu nang ihkhun ah it law kei coka ah ka it lai tiah ka ti.

Apple cu thaw tukin a ei caah ka chimmi bia cu a ngai le ngai lo zong ka thei loh. Innpi cu ihkhun a khat cang caah ttuanglai ah it zongah hmun khat ah a itmi bantuk kan lo cang caah coka ah it hi a ttha cem tiah ka hmuh. Hmun dang cu ihnak a um ti lo bantuk kha a si ko i cu caah coka hi minung pakhat ihnak caah cun a za tthiamtthiammi kha a si ko.

Cu ticun apple duk tla tukin a ei ti ka hmuh tikah duhsah in ei ko seh ka ti i a ei dih caan hngak ti loin coka ah cun puan ka phah i ka ih taak. Edward nih rian a hmuh sual ahcun zingka teah rian interview tuah a hau lai caah tuan a tuah it ka hau cang. A thil eimi cu a mah ei in rak ei ko seh law a mah it in rak it ve te ko seh tiin ka ih taak. Zingka cu a hung si i ka ihkhun cungah ka it ko cu kai hmuh.

Be the first to comment

Leave a Reply

Your email address will not be published.


*