R.I.P : Apoi Tuk Hringhran E Sayachi Thang Nuam Nih A Kan Liam Tak Than E

Apoi le a poi hringhran ko mu, nai hrawng cu thihnak thawng lawng te kan van theih ko. Tuzing ah Kalaymyo Tahan ah khua a sa mi Ca chimtu Vice Principal sau ngai te a rak ttuan mi Sayachi Thang Nuam nih mual a kan liam tak tiah thawng kan theih. A umnak hi Taungpila khan a si, a tan tak mi a chungkhar le Bawipa tu nih hnem hram ko hna seh.

thawngpang dang relchap : June 18: Hakha Thawngpang
=================
nizaan Hakha lamruk tonnak ah kum 13 hrawng mi hngakchia le a upa rallokap nih an tlaih hna. Hi an tlaihmi pa hi a phone hmanthlak ruangah asi, a phone chungah an uico pawngah meithal chia in hman a thlak mi kha rallokap pawl nih an hmuh tikah an tlai i an inn ah an kalpi. Innchung an thlok, an kawlhawl i zei hmanh an hmuh lo caah an i kalpi than.

A min cu Van Tum a si, kum 13 hrawng a si. A upa Peng Awi (kum 15 hrawng) zong an tlaihchih ve. Meithal hi aho ta dah a si tiah an hal tikah ka pa ta, ka pa nih lo ah a riahpi tiah an leh hna, cuticun an inn in an chuak i rallokap pawl nih an kalpi hna tiah theih a si. A nu le a pa hi a thenmi an si. A pa cu nupi dang a ngei i Kohkun lei ah an um. A nu cu Zion biakinn pawngah a um.

Tuzaan lei ah rallokap nih Hakha Zion biakinn cu an luhhnawh i Mucu sayamah le a fale pahnih, Zion Church pastor pahnih le a dang pakhat, an zatein pasarih an tlaih hna tiah theih a a si. Van Tum le Peng Awi an tlaihmi hna le Zion Biakinn an luhhnawhmi hi aa pehtlai lai tiah zumh cio a si. Asinain a si bak ti cu chim awk a tha thlu lo.

Cun Zion biakinn an luhhnawh i 7 an tlaihmi hna chungah Van Tum te unau le hringtu an nu an i tel maw tel lo ti kan i fiang kho lo. Van Tum a nu cu Zion Biakinn zohkhenhtu (Daruan) a si. Pasarih an tlaih hna timi ah khan Mucu sayamah le a fale pahnih tiin kan theih fawn. Mucu sayamah cu Sayamah Tawk Sung a si i Van Tum nu nau a si tiah kan theih. Cucaah kan theih tawk ahcun Mucu sayamah le a fale pahnih timi hi Van Tum le unau le hringtu an nu an si lai tiah kan zumh. Note: A hmun ah va kal in thawng va hlat awk a that lo caah a langin kan hlathlaimi a si i kan palh sualmi a um ahcun kan ngaithiam u! Update tuah khawh tu kan i zuam lai. The Chin Post

Be the first to comment

Leave a Reply

Your email address will not be published.


*