R.I.P : Mindat Ralzam Ni 6 Bawhte Ramlak ah a Nunnak a Liam

Mindat Ralzam Ni 6 Bawhte Ramlak ah a Nunnak a Liam
———–
Nihin (May 22) chun sml. 1:00 hrawng ah Mindat ralzaam hna lak ah aa telmi ni 6 bawhte cu ramlak ah a nunnak a liam. May 21 ah Mindat peng, Pukon khuate ah CDF-Mindat le SAC ralhrang kahdohnak a chuak i U Naing Thang le Daw Naing Li nih ni 6 lawng a si rihmi a fapate cu ramlak ah an zaampi ve.

Ramlak an umnak ah thli a fak, ruah a sur tik ah bawhte a cuap fak tuk in a hnorsuan i, nihin ah a nunnak a liam hi a si. The Chin Journal

thawngpang dang : Thawngfiang : Apoi Tuk E CDF in Salai Thang Nai, A Nunnak A Liam, Adang (9) Nih Hliam An Tuar

Nihin zaanlei sml. 2:00 in sml. 6:00 tiang Mindat peng, Bokun khua ah CDF-Mindat le SAC ralhrang kahdohnak a chuak i CDF lei in minung pakhat nih a nunnak a pek, tiah Mindat mipi uktu bu nih tu zaan ah thawngpang an chuah.

“SAC ralhrang pawl nih an uniform i hruk loin misawhsawh thilpuan an i hruk i ralzaam bantuk in an ra. Ahlan bang in RPG le mortar bomb pawl an hman,” tiah thawngthanhnak ah an langhter.

Nihin kahdohnak ah CDF-Mindat in minung 9 zong hliamhma an tuar. Asinain, an hliamhma a fak lo. SAC ralhrang lei in minung pakhat a thi i, hliamhma a pumi zong an um, tiah an langhter.

Nihin SAC ralhrang he kahnak ah a nunnak a liam mi, CDF-Mindat pasaltha hi a min ah Thang Nai (kum 15) a si tiah khuami pakhat nih a chim. Ngakchia tleirawl te a si rih nain Ralhrang pawl cawlcangh a celh ti lo ruang ah nunnak thap in a cawlcang, nihin ah a nunnak ram caah a pek ve.

Hliam a tuar mi vialte zong Pathian nih hnem hram hna sehlaw damnak pe colh hram hna seh. Tulio ah a bik in kahnak a zual hma mi, emergency dirhmun ah a um mi cu Mindat hi asi. Pathian nih teinak kan pe colh hram seh. VOM

Be the first to comment

Leave a Reply

Your email address will not be published.


*