Ralhraang Pawl Nih Taal Khua Biakinn Le Mipi Thilri An Hrawh

Ralhraang Pawl Nih Taal Khua Biakinn Le Mipi Thilri An Hrawh

 

Chin ramkulh, Falam peng, Taal khua ah Lainawng pa Min Aung Hlaing ralhraang uico pawl nih voihnih tiang bak lut in khua chungah ummi thilri mansung an hrawh hnami kong ah Institute of Chin Affairs nih faak piin an soisel hnanak le an lungtlin bak lonak kong he pehtlai in nizan August ni 27, kum 2021 ah khan thanhca an chuah.

 

Min Aung Hlaing uico ralhraang pawl nih hin July thla chungah voikhat le August thla chungah voikhat tiin Taal khua chungah voihnih bak an lut, a luan ciami July ni 20 ah khan ralhraang thazaang 90 hrawng khua chungah lut in a herh lomi meithal puahnak te hna an tuah hlei ah khuami hna umnak inn 21 le khuami hna hmanmi thilri an hrawh piak hna hnu ah an sattil zong an thah piak hna.

 

Cun a luan ciami August ni 9, kum 2021 ah ralhraang 150 hrawng cu Taal khua chungah a voihnihnak lut tthan in Biakinn le sianginn ah an mah duh poah in ni 5 chung khua an sa, khuami hna inn 36 an hrawh piak hna hlei ah Ar 380, Vok pa 8 an thah piak hna, cun khuami hna hmanmi thilri tampi zong an hrawh piak rih hna.

 

Khrihfami hna nih kan upat tukmi Bible, Pathian hla cauk (Khrihfa Hla Bu) le Biakinn chung tthutdan hna cu an duh tawk in an hrawh hna hlei ah khuami pahnih hna zong zei sualnak an neih lo bu ah tlai in an hrem rih hna.

 

A tu bantuk in uico ralhraang pawl khua chung an luh ruang le ningcang lo tuk in thil ttha lo an tuah ruangah khuami hna zong an khua chungah um ngam ti loin ramhlak ah an zaam hna.

 

Falam peng, Taal khua hi inn 36 le minung 150 in 160 kar khuasami an si i Min Aung Hlaing uico ralhraang pawl nih voihnih bak an luh hnawh hna ruangah khuami dihlak in an zaam hna, tuni caan tiang ho hmanh an kir ngam rih lo, uico ralhraang pawl nih Taal khua chungah an hrawhmi thilri le a dang dang man hi Kyat ting thong 200 in 300 kar man bak an si.

 

The 24seven News

Be the first to comment

Leave a Reply

Your email address will not be published.


*