Ralhrang Nih Rialti Khua Inn Dihlak An Khangh, Thlanrawn Zong An Khangh: Oct 14 tuzingah Rialti lei in a rami ralhrang nih Falam peng Thlanrawn khua cu mei in an khangh tiah theih a si. 

Ralhrang Nih Rialti Khua Inn Dihlak An Khangh, Thlanrawn Zong An Khangh: Oct 14 tuzingah Rialti lei in a rami ralhrang nih Falam peng Thlanrawn khua cu mei in an khangh tiah theih a si.

 

Thlanrawn khuathar i inn 6 hna cu vutcam ah an cang. Thlanrawn hei lonh (Hakha lei) ah ralhrang hna cu mipi vengtu ralkap nih an bawh hna caah an i kap tiah khuami hna nih an chim. An i kahnak cu Falam khuapi he aa hlat lo caah Falam khualu i ralhrang sakhan in miakpi 122 (Let-net-ci 122 mah-mah) in voithum an kah hna caah Falam khuapi cu a tlirh dih tiah theih a si.

 

Rialti khua ah minung umnak inn 10, biakinn, kudawng hna cu Oct 13 le 14 ah ralhrang nih ciam dihlak in an khangh.

 

Rialti khuami pakhat nih “Minung a thimi cu kan um lo. Innchung thilri cu a cheu hrawng lawng kan i ken khawh. A taangmi vialte mei nih a kangh dih. Kan zuatmi saram hna cu zeitindah an um kan thei lo, ralhrang nih an thahmi zong an um lai” tiah a chim. Rialti khua ah inn 13 an um i a dihlak in ralhrang nih an khangh tiah theih a si.

 

Hakha Kiangkap Kahdohnak Ralhrang 10 An Thi: October 13, nizan ah Chin ramkulh, Hakha peng Hngiarlawn khuapawng ah ralhrang le  CNA, CDF  kahdohnak a chuak i ralhrang 10 an thi tiah theih a si.

 

Hakha khua in a chuakmi ralhrang hna cu Falam in a rak i thawhmi ralhrang motor le Tank motor 2  a dong hna tiah ruah a si caah Hakha khua chuahnak ah Chin ralkap nih an doh hna hi a si.

 

Falam peng Thlanrawn khua lonh (Hakha lei) ah ralhrang le mipi vengtu ralkap an i kap cuahmah lio a si. CNF chimnak nawlngeitu Salai Htet Ni nih cun “Atu hi zanlei 2:oopm hrawng khan Falam peng Thlanrawn ah CNA, CDF le ralhrang kan i kah cuahmah lio a si. Thawng fiang zeihmanh a um kho rih lo” tiah a chim.

 

Cu kahdohnak le ralhrang nih khua mei in an khangh ruang ah Falam peng Lungpi, Tlangzar, Thlanrawn, Taal le Rialti khua hna cu an zaam hna tiah theih a si.

 

Ni 3 chung Kawkareik kahdohnak ahralhrang 11 an thi, 20 leng hliam an tuar: Kawkareik khuapi pawngah KNLA le ralhrang nithum chung kahdohnak a um i ralhrang 11 an thi, 20 leng hliam an tuar tiah KNLA nih an thanh. October 11 ni ah Kawkareik khuapi pawng KNU nih hmunhma an laknak hmun Kaw Hnuaih khua chungah ralhrang hna an rak luh caah KNLA nih hmaitonh in an kah hna i ralhrang lei 5 an thi,  18 an i hliam.

 

October 12 ni ah Kawkareih khuapi pawng KNU nih hmunhmaan laknak Yua Thit Khua chungah ralhrang an rak lut i KNLA  he hmaitonh in kahdohnak a um, ralhrang lei in 4 an thi i 3 hliam hliam an tuar. A thi mi 4 chungah bawi pakhat aa tel.

 

October 13 ah Kayin ramkulh Kawkareik peng, Kamainkung khua pawngah ralhrang bu le KNLA in a chuakmi DKBA le Eagles Brigade fonhmi hna cu nizan chun Suimilam 11:00 hrawngah an i kap i ralhrang 2 an thi tiah theih a si.

 

Ralhrang nih nihin ah hriamngan lawngte in an kan kah i cu hriamngan kuan pawl cu khuachung ah tla/an puah caah khuachung inn pakhat a rawk. Nizan zinglei suimilam 10:30 hrawngah Shwekyatmin (Suai-ciat-min) phungki sianginn, pawngah ralhrangbu hna cu umhmun an khuar. Cu hna le Karen  ralkap hna cu an i kap i hriamngan lawngte an hman.

 

Nizan kahdohnak ah ralhrangbu lei ralbawi telh in a dang 4 an thih lengah hliam a tuarmi an tam taih theih a si. Ralhrang a thimi ruak hna cu cuka khua ah an vui ta hna tiah Than Lwin Time nih a tial.

 

Htilin (ထီးလင်း) Zitaw (ဇီးတော) Khua Pyusawhtee (ပျူစောထီး) Hna Cu An Meithal He Htilin YDF Sinah An I Fonh: Magway ramthen Htilin peng Zitaw khua ah a ummi ralhrangbu hmanrua Pyusawhtee hna cu an meithal hna he Htilin YDF sinah an i fonh tiah theih a si. Zitaw khua Pyusawhtee hna cu Oct 14, tuni zinglei 8:30 am ah mah nih tuahmi meithal zun 24 le Hting Taing (ထိန်တိုင်း) khua in meithal zun 1, a dihlak meithal zun 25 he Htilin YDF sinah an i fonhmi a si.

 

Oct 10 zongah khan Htilin palek sakhan in meithal he a rami Pyusawhtee hna cu Htilin YDF nih an kah hna i pakhat a thi, meithal zun 20 an lakpiak hna. Cu an lakpiakmi meithal zun 20 le tuni i an apmi meithal zun 25, a dihlak zun 45 hna hi Htilin peng palek hna nih PDF hna sin in an lakmi an si tiah theih a si.

 

Ralhrang Mawtaw Hmanthlak Le Social Media I Tar Ruangah Kalaymyo Ah Mi Pahnih An Tlaih Hna: Oct 9 ah Sagaing ramthen, Kalaymyo ah a rami ralhrang mawtaw rual hna cu hman an thlak i social media ah an tar ruangah Oct 13, nizan ah khan Kalaymyo ah ကိုဖိုးတုတ် le ကိုမြတ်ညီညီ cu ralhrang nih an tlaih hna tiah theih a si.

 

Min langhter a duh lomi pakhat nih “Gangaw lei in a rami mawtaw, a tlawmbik 40 cu an si lai. Cucu hman an thlak i social media ah an tar ruangah an tlaih hna tiah kan theih” tiah a chim. An pahnih in Kalaymyo lamtonnak (Lansone), Pinlong veng i an inn ah an tlaih hna.

 

Atu cu Kalaymyo i  ဒေသကွပ်ကွဲရေးစစ်ဌာနချုပ် (ဒကစ) ah an kalpi hna tiah mithmutu pakhat nih a chim. ကိုဖိုးတုတ် le ကိုမြတ်ညီညီ hi mi sawhsawh an si. Lamzawhnak zongah an i tel bal lo. PDF he zong zeihmanh pehtlaihnak an ngei lo tiah Kalaymyo lamzawhnak hruaitu pakhat nih a chim. Kalaymyo ah Feb 1 in ralhrang nih an tlaihmi hna hi 120 leng an si cang tiah RFA nih a tial.The Chin Post

 

Adang: Min Aung Hlaing Hi ASEAN Summit Ah Tel Ter Lo Ding In Philippines Ramdang Vuanci Nih Chim

 

Kan hnu lei ASEAN Summit ah meeting kaimi vialte hna nih Kawl ralhraang pawl nih tuah ding le zulh ding tiah hnatlaaknak an rak tuahmi thil pa 5 hna cu Kawl ralhraang pawl nih zeirel lo tuk in nihin ni tiang pakhat te zong an zulh, an tuah duh lo hlei ah mipi cungah thahnawnnak a tuah pengtu ralhraang pawl an pu simi Min Aung Hlaing hi ASEAN Summit ah tel ter lo ding in Philippines Foreign Minister simi Teodoro Locsin Jr nih a chim.

 

ASEAN Summit ah zapi hnatlaaknak rak tuahmi thil pa 5 tuah duh lo tu le a zul duh lo tu Min Aung Hlaing hi ASEAN Summit ah kai ter lo ding, ASEAN timi phu cungah ram mipi hna nih an neihmi zumhnak le ningzahnak hi a biapi tukmi si tiah Philippines ramdang vuanci Teodoro Locsin Jr nih cun fiang tak tak in a chim ko cang.

 

ASEAN nih Brunei ram foreign Minister pa cu ASEAN Special Envoy ca ding ah an thim nain Min Aung Hlaing le a ralhraang pawl nih Daw Aung San Suu Kyi he ton biaruah ternak caan ttha pek an timh lo ruangah nihin ni caan tiang ASEAN Special Envoy zong Kawlram a rak tlawng kho rih lo.

 

Cu ruangah ASEAN he hmunkhat ah rian a ttuan duh lo tu Min Aung Hlaing he tutan October ni 26 in ni 28 tiang tuah dingmi ASEAN Summit ah tel ter lo ding le sawm lo ding in ASEAN ramdang vuanci pawl thaizing October ni 15, kum 2021 ah ceimainak le biachahnak an tuah lai.

 

Adang: Ralhraang Pawl Nih Falam Peng Khuate Inn An Duah Thluahmah, Khuami Pa 2 Zong An Thah Cang Hna

 

Tuzing October ni 14, kum 2021 zing ah khan Chin ramkulh Falam peng Lungpi khua le Thlanrawn khua kar ah Min Aung Hlaing ralhraang pawl nih Chin ralkap aa fonhmi pawl kar ah kahdohnak a chuak, Falam khua khah-lah-yah 268 sakhan lei in lamhlaat bomb kahnak in an rak kah bawmh thluahmah hna.

 

Lungpi khua le Thlanrawn khua kar ah hmunhma khuarmi Min Aung Hlaing ralhraang pawl cu Chin National Army le Chinland Defense Force ralkap hna nih suimilam cheu chung hrawng an va kah hna, CNA le CDF lei in cun hliamhma pumi an um lo, ralhraang lei tu cun a thimi zei zat an um theih khawh si rih lo tiah CNA lei in bia chimnak nawl nei tu Salai Htet Ni nih a chim.

 

Kahdohnak a chuah hnu ah Falam khua khah-lah-yah 268 lei in 122MM timi lamhlaat bomb kahnak in voithum an rak kah, ralhraang lei nih bomb an kah ruangah Falam khua chung ah aa chokletmi an um lo, cun khuate lei hna zong nih ralhraang pawl an rak phanh hlaan tein an khua le an inn an rak chuahtaak cia cang hna.

 

Tu tiang ah hin ralhraang pawl nih Thlanrawn khua ah biakinn telh in khuami hna inn 13 hrawng an duah cang, inn zei zat dah a kangh cang timi kong belte fiang tein theih khawh si rih lo, tu nak tam zong hin ralhraang pawl nih tunak tam zong in an duah khawh rih, Lungpi le Tlangrawn khua kar ah ummi Rel Ti khua biakinn telh in inn dihlak nawn in an khangh rih.

 

Adang: Yangon Ramtthen In Khuabawi 65 Bak Rian In An Chuak

 

Yangon ramtthen, Khayan peng chungah sanguk bawi le khuate khuabawi 65 hna Min Aung Hlaing le a ralhraang pawl kut tang ah rianttuan duh ti loin an chuak, tu bantuk in khuabawi le sanguk bawi minung 65 an chuah ruangah khuate lei le sang chung uknak hram a rawk cang tiah Khayan Channel nih an langhter.

 

Khayan peng chungah hin People’s Defense Force Khayan nih a luan ciami October ni 3, kum 2021 ah khan khuabawi le sanguk bawi pawl an rian in chuak ding in thanhca an rak chuah, cu thanhca an chuah hnu October ni 6 in tuni October ni 14 tiang (ni 9) chung ah khuabawi le sangukbawi 65 bak an rian in an chuak.

 

A tu bantuk in rian a chuahtaak tu minung hna lak ah hin khuapi chung in sanguk bawi 13 an i tel i khuate 56 in khuabawi hna zong an dihlak in an chuak, khuate 56 tiah an vun langhtermi hi kan theih cio bantuk in khuate lei cu ohsuh in a kalmi an um caah si, khuate khuabawi minung 56 si loin khuate 56 in khuabawi tinak deuh kha si.

 

Sangukbawi le khuate khuabawi rian in an chuah hna lio ah Khayan peng chungah caan kar lak hruaitu ding in People Administration phu zong a luan ciami October ni 12 ah khan an dirh.Chin 24seven news

Be the first to comment

Leave a Reply

Your email address will not be published.


*