Rallokap Ceilak KNDF Nih A Thuat Hna I Minung Ceilak An Thah Hna

Nihin June 5, 2021 ah Karenni mipi venghimtu phu nih Kawl Ralkap (20) leng kan thah hna lawng si loin an hriamnam tampi kan chuh hna tiah cathanh an chuah. Kayah ramkulh raldohnak ah KNDF nih Min Aung Hliang hruai mi Ralhrang (20) leng an thah hna hi a si i an mah KNDF lei in minung pakhat nih ram caah a nunnak a pek ve tiah an cathanh mi ahcun an langhter.

Kayah ramkulh, Demoso khuapi chung ah kahnak fak ngai in a chuah hi asi. Nihin zaanlei suimilam 4:00PM- 9:00PM tiang kahnak a um. Ralhrang lei nih Bomb, Miakpi ti bantuk hriamnam pical tamtuk an hman ti asi. Cu bantuk thiamthiam in Karenni, Moebye khuapi chung zongah KNDF le Ralhrang karlak raldohnak fak ngai in a chuak rih. Nihin raldohnak lawng ah KNDF nih ralhrang lei (20) an thah hna. Bomb le Miakpi a tamtuk in an kah caah kaphnih a thi mi le hliamtuar mi felfai ngai in langhter awk a tha rih lo ti a si.

thawngpang dang relcahp : Surkhua Mi an Zaam Dih hna, Tar Lawng Khua ah an Taang
————–
Hakha peng, Surkhua ah SAC ralhrang pawl an rak luh caah khuami an zaam dih i, a zaam kho lomi kum upa tar minung 20 in 30 karlak hrawng lawng khuachung an taang, tiah thawng kan theih. SAC ralhrang pawl Surkhua an phak hnu ah khuachung ah meithal an puah hnawh len hna caah khuami an um ngam ti lo i an zaam dih hi a si.

Minung pakhat nih, “SAC ralhrang pawl an rak phan i zaan ah khuacung ah voi tam ngaite meithal puah sawh in an puah len. Khuami pawl an um ngam ti lo caah an zaam dih hna. A zaam kho lomi tarnu tarpa pawl cu biaknak lei rianttuantu hna nih an zohkhenh hna,” tiah a chim.

SAC ralhrang an phak hnu ah Surkhua a zaamtakmi hi an zapi in 1,700 in 1,800 karlak hrawng an si lai, tiah a cunglei minung nih a chim chap. June 1-2 tiang SAC ralhrang pawl cu Surkhua meithat zung ah hmunhma an khuar nain June 4 ah cun Surkhua ah an um ti lo, tiah khuami pakhat nih a chim. Loklung khua in a zaammi hna zong atu tiang khua an hlam kho rih hna lo, tiah thawng kan theih. The Chin Journal

Be the first to comment

Leave a Reply

Your email address will not be published.


*