Ram A Buai Zongah Kan Nih Pahnih Cu Zeibantuk Buainak Hman Nih A Kan Dawn Loh Tiin

Hi tluk kan ram buai lio pi asi ko nain kan mah caah cun ram buainak nih zei thil hmanh nih buainak a kan pek lo hrimhrim tiin, hi vawlei nuamnak kan hmuh ahcun a za an ti bak cang ko hi. Mi cheukhat fa le cu vawlei kan nun chung ah zei dah nuam tein ka um hi pei a bapi ko cu ti phun in a um kan tam tak tak cang. Kan mah nih nuam nak kan hmuh ahcun, pong kam thil hi kan caah zeihmanh lo an si ti bantuk tuk in a um mi kan tam ngai ngai cang. Mi zei maw cu chungkhar zong ruat ti lo in caan a hmang mi kan tam tuk cang. Hi nungak tleirawl nute a thil tuah mi le an um tu hi an nu le pa caah zeitluk in dah a fak hnga mu.

College kum khatnak ka kai cang lai tiin, a nu le sinin College kai ding a kal mi an fanu te cu hmun dang ah a tlangval pa he hmunkhat in inn an hlang i, vawlei nuam nak can a hmang ti mi nungak nute. Hringtu nu le pa nih fa cung ah dawtnak thinlung an ngei khawh ning le fanu/pa cheukhat nih nu le pa dawtnak kan theih thiam lo ning hi cu a mak tak tak. Kan nu le kan pa nih kan fa le hi hawi an hngar sual lai phang in an ngeih mi dih lak chuah in siangin an kan kai ter mi ka si ti theih thiam lo in duh poh in rak um ko hi cu nu le pa caah zei tluk in a fak hnga.

College kai khawhnak lam te vun hmuh bak in nu le pa cu hnu chit riang mang in, sianginn kai nak ah a herh mi nan ka tuah piak ahcun a za ko ti mi lung put tha lo cu, hi kum 18 nungak nute nih cun a tha lo mi lungput cu a ngei diam ai a poi tak tak. A nu le pa sinin sianginn kai nak ding caah tiin, phaisa a hal mi vialte cu a tlangval pa he caan tha nuam nak ah an hmang mei mei ko. Hi bantuk thi hi cu a tuah ding cu asi bak loh. College kai kho ding in caan tha a hmuh mi cu ka van that tiin, college cu kai ding asi mi cu kai duh lo in, a tu bantuk in a tlangval pa he hmun dang ah inn an hlang i, vawlei nuam nak cu an va hmang diam hi cu fanu tha cu a si hrim hrim lo ti nak asi.

Cu ti cun nu le pa nih sianginn kai nak ding an pek mi phaisa cu a tlangval pa he nuam nak ah a hmang. Hi nu te nih hin a tuah hnga lo ding mi tu kha a va tuah. Hi thil a tuah ruangah hin hmai lei a nunnak lam thluan ah an hawi le cu a phan ko ti hna lai lo. College tha tein kai i, hmai lei a caaah a tha ding mi thil tu i tim lo in, a tlangval pa he nuam tein um a duh deuh mi nu asi caah asi.

A nu le pa caah cun a tuar a har tak tak ko lai. Cu caah nu le pa dawt nak hi a hman zia a thiam mi kan si hi a herh tak tak mi asi. Hi ca a ral tu vialte nu le pa dawtnak a theih thiam mi va si hram ko uh. Nu le pa nih phaisa tam tak tak dih in sianginn an kan kai ter mi hi an ngeih hlai asi hrimhrim loh, fa le an kan dawt caah an ngeih chunh dih lak chuah in an kan kai ter mi a si ti hi rak thei thiam hram ko aw.

Be the first to comment

Leave a Reply

Your email address will not be published.


*