SAC ralkap nih Hakha in tlaihkhih mi minung 183 chung ah 90 hrawng hren rih, pahnih nunnak a liam

SAC ralkap nih Hakha in tlaihkhih mi minung 183 chung ah 90 hrawng hren rih, pahnih nunnak a liam
==============================
SAC phu nih nawlngeihnak a laak hnu 2021 February 1 in nihin tiang ah Hakha in minung 183 an tlaih cang hna i minung 90 hrawng cu thlah an si rih lo, cu hna lak ah pahnih cu an thi, tiah kan theih.

“Kanmah nih kan zulhdawi khawhtawk le kan khawmhsuat khawhtawk ah nihin tiang tlaihkhih mi hi minung 183 an si. Minung 92 hi an hren rih hna i cu hna lak ah pahnih an thi. Kan hngalhlo kar in an thlah mi zong an um kho ko. Cun, Hakha Palek Sakhaan le Rungtlang Ralkap umnak 266 in hmun dang, khua dang ah an thial hna maw thial hna lo tu cu kan hngal kho lo. Hakha ah an hren ko hna lai dah,” tiah CHRO in tuanvo ngeitu upa pakhat nih The Hakha Times ah a chim.

SAC phu nih Myanmar ramchung ah Chinmi an tlaih mi hna hi May 31 tiang ah 380 an si i, cu chung ah Hakha in minung 183 an si. 183 chung ah minung 92 (a thi mi hna he) an taang rih i an thlah than cang mi hna hi minung 91 a si cang. Hi chung ah Pu Tler Ling (Hakha) le Pu Khamh Bawi Lian (Thangzang) cu an hrem hna ning a fah ca ah Kalaymyo lampi ah an thi i nihin tiang an ruak hmuh khawh an si thai lo. The Hakha Times

thawngpang dang relchap : PDF le KIA an i bawm cang, Ralkap (10) leng An Thah Hna

People Defense Force – Katha le KIA ralkap i bawm in nihin lawng ah Ralkap (10) leng kan thah hna tiah PDF lei nih an chim. Sagain ramthen, Katha pengkulh chung ah KIA ralkap hna le PDF-Katha hna i bawm in ralkap an doh hna hi asi.

Nizaan raldohnak lawng ah Ralkap lei minung(10) an thi, PDF pasaltha pakhat nih a nunnak a pek ve tiah PDF-Katha chungtel pakhat nih RFA sin ah a chim hi asi. May 30, 2021 zaanlei suimilam pakhat hrawng ah Katha-Bamaw karlak motor lam, Moetha le Hayna khuate pawng ah kahnak a chuak tiah PDF pakhat nih a chim hi asi.

“Zaanlei suimilam 1:00PM hrawng in kahnak aa thok hi a si. PDF-Katha cu KIA nih an rak kan bomh colh. Ralkap lei hi a tlawmbik ah minung 100 cu an si lai. Miakpi, bomb ti bantuk hriamnam pical tampi an hman. Zaanlei suimilam 4PM tiang hrawng kan i kap i Ralkap lei (10) leng an thi, PDF pasaltha pakhat nih a nunnak a pek ve” tiah a chim hi asi.

KIA pawl hi an mah Kachin ram lawng ah si ti loin Sagain ramthen tiang an rak phak hi cu thawngpang tha a si ko, khuapi kip ah cawlcangh an i timh cang bia zong a si kho mi asi.

Be the first to comment

Leave a Reply

Your email address will not be published.


*