Thawngpang Tha: Ralhrangbu Deputy Home Minister Naupa Ko Soe Moe Hlaing Biahalnak Hmun Ah A Thi

Ralhrangbu Deputy Home Minister Naupa Ko Soe Moe Hlaing Biahalnak Hmun Ah A Thi
===================================
Ralhrangbu Deputy Home Minister Naupa, ramkhel kongah thong a raktla bal cang mi ralhrangbu nih an tlaih hnuah biahalnak hmun ah an hremnak ah a nunnak a liam tiah theih a si.

Hi kong he pehtlaih in Kawlram ramkhel thongtla hlun bu steering committee chungtel U Tun Kyi nih “Ko Soe Moe Hlaing hi ramkhel thongtla hlun a si. Lt.Col. Tan Hlaing naupa a si. An unau in lamdang cio ah an kal.

May 22 zaanah Pago ah an tlaih, 24 ah a ruak rak la uh an ti, kan va lak tikah a ruak cu pe lo in Mingalardo ralhrangbu siizung ah an kuat. Mah ahcun a pum an hlai i mahka ahcun an vui ko. An sual tak tak – Ka chim duh mi cu a chungle hmanh tha tein chimchawnh an i duh ter lo, Unau zong an in ngan lo ti mi hi a si” tiah a chim.

Ko Soe Moe Hlaing hi Pago Bawneci biahalnak sakhan ah an hremnak hliamhma celh lo in a thi mi a si i a ruak hi a chungle zong zohter an sianh hna lo tiah theih a si. #Myanmar Harp, Rf: The Chin Post

thawngpang dang : Kum dang ah siangakchia 3000 deng an kai tawnnak Hakha BEHS No. 1 sianginn ah siangakchia thar an um lo
==============================
Hakha BEHS No. 1 sianginn hi kum dang ahcun siangakchia 2800 in 3000 kar an kai tawnnak a si nain 2021 May 25 tiang ah sianginn ap in a kai mi an um rih lo, tiah kan theih. “Kum dang atu tik ahcun siangakchia ap le cohlan kan limlawh lei khi a si cang.

June 1 bak in cacawn kan thok cang. BEHS No.1 ah hin siangakchia 3000 leng kan phanh caan a um i aa thial na, khualei a kir na, tiin kum canceo ah 2800 hawng kan taang tawn. Tukum tu hi cu kan hei theih tawk ah nihin tiang nulepa nih an fale sianginn an ap hna lo. Keimah pumpak zong ka fa ka ap ve lo. June 1 ah khin thil sining a vung fiang deuh te hnga,” tiah CDM Saya pakhat nih The Hakha Times ah a chim.

Hakha ah hin BEHS No. 1 hi sianginn ngan bik pakhat a si i siangakchia 3000 hrawng an kai tawnnak sianginn a si nain nulepa hna nih SAC ralkap uknak tang ah fimcawn ding an fale an sian hna lo ca ah nihin tiang sianginn kai an um rih lo. Cu bantuk in Hakha sianginn dangdang zong an si ve thiamthiam, tiah kan theih. The Hakha Times

Be the first to comment

Leave a Reply

Your email address will not be published.


*