Thil Mak Taktak Pei A Rak Si Hi : Aruak An Vuinak Programe Chung Bak Ah A Mah Cu A Rak Um Huar Ve Ko

Kum 2012 ah khan Josh Markosh cu police sinin ph call a tong i a unau pa a thinak kong le a ruak zong mithi chiahnak ah an chiahnak kong cu a van chimh. Markosh nih cun ph call a theih bak cun a unau pa ruak umnak police station leiah cun a kal colh i ruak cu a va zoh i a unau pa bak a si timi cu a theih hnuah minthutnak zong a tuah i a chung le zong nih cun an fa pa ruakvuinak ding cun timhtuahnak an ngei hna.

A ruak hum dingin minung zong an rak chuak pah cang tiah cun an fa pa cu inn ka hramah cun a rak dir .Cu ti i mithi ruak an humh liopi bak inn ka hram i an van hmuh ko ah cun mi cheukhat cu an tih tuk caah a zaammi zong an um i a cheu cu an umnak hmunin a thi dangmi zong an um. An lak a hawi pa raltha ai ti ve mi nih cun ka hawi pa na si kho lo na thi cang i pei na ruak cu kuangchungah hin na um i kan in humh cuahmah i tiah a ti.

An fa pa nih cun keimah tak ka si ko ka konglam hi i palh sualnak a um ti ka theih i ka chung le nih hin ka dam ko ti hi thei uh ti ka duh tuk i ph kan call len hna nain a ngah lo tiah a chimh hna. An fa pa cem a rak lawi cang caah cun an vui dingin ruak an timhtuahmi cu police sinah pek than dingin an ti hna. Ahnu ah cun cu ruak cu midang an fa pa he mui a rak i lo tukmi a si tiah theih a si.Kaung Chan timi nu zong hi thinlunglei dam lonak a ngeimi a si i chun hna ah cun hriin an tem peng deuh mi a si i Cambodia ah cun hi bantuk thil hi a um theu tawn ve.

Voikhat hi hri i an temmi cun ai phoih kho i a rak chuak diam sau tuk an kawl cang nain an um kho ti lo. Nikhat cu tiva kamah hin ruak ai rawk tuk cangmi pakhat an hmuh i a chung le nih cun Kaung Chan ruak a si ko tiin vuinak tuah an timh. Cu ti i vuinak an tuah cuahmah lio ah cun Kaung Chan cu khuaruahhar in a rak lang ve. Cu ti i ruah lo tukin an van hmuh tikah cun ruak hummi zong cu an chuak dih i cu ti a chuakmi lak zongah cun a hringtu a pa tak zong ai tel ve.

Cu ti a pa bak zong ai tel ve tikah cun a fa pa cu a lung si lo tuk i a pa thlavang cu a van hauh piak. Cu tikah a pa cu a lu a van i thingthan i a fa pa si cu a vun theihkhawh. A kutin a van tongh i mithla a si lo a fa pa bak a si ti a van theih tikah cun mipi sinah cun a fa pa diktak a si ti cu a van chimhthan hna. Adermo timi pakhat zong hi khualtlawng i an i citnak motor cu Accident an ton caah ruak pakhat a mui zong ai rawk dih cang i a hmai hmuh khawh a si ti lo.

Adermo timi pa he hin an thilhrukmi ai lawh caah amah bak ah cun an rel ve. Cu tikah cun a chung le nih cun an fa pa ruakah an rel caah vui an timh i an vui lai te ah cun a hringtu nu nih cun a rak zoh than i a ruak kuangchung cu mit thep loin a zoh peng a hnuah cun a nu nih cun ai sum kho ti lo i mah hihi ka fa pa ruak a si lo tiah a chim. A nu nih a chimmi zong cu a rak hman tuk. An fa pa cu a hawi le he nuamhnak ah kal ding in ai khawh kha a si i a hnuah cun a hawi le sin cu a va phan ve.

A hawi le nih cun muithla ah an rak rel ve i an rak tih taktak. Sinan a hnuah cun a hawi pa tak a si ti cu an theih than ve. Australia ah nu pakhat zong hi a nu ruak vui dingin a va kal ve i hotel i a um lioah cun a pasal nih cun hotel chung i chuah i hmun dangah thinlung vai damh dingin a fial i an nu cu a pasal chim bantuk cun lengah a chuak. A chuah le cangka cun motor pakhat chungin pakhat nih cun meithal he a rak tinh i motor chung cun ai kal pi i a kal pinak ah cun mi pa kahnih nih an rak hngah hoi.

Hotel chungah cun an kal pi i thutden cungah cun an thut ter i cu hnuah cun zeiruangah dah na pasal nih hin thah an duh tiah bia an hal cu tikah cun a nupi cu um awk thei loin a um. Cu vial ah cun a pasal cu a nupi an tleih cangnak kong cu an hei chimh. Cu ah cun an pa aw bak nih cun that colh uh timi bia bak cu a rak chim ko. A ruak zeitin dah kan tuah ning si lai timi kong an i ceih lioah cun an nu cu a rak i thih ter.

Cu tlawmpal ah cun a hawi le nih cun nu le hngakchia an thah duh lonak kong an chimh than i an nu cu an thlah than i a pasal nih thah a duhnak kong an rak i chawnhnak record vialte zong cu an pek chih. Cu hnu ah cun Australia ah cun a tlungthan. Cu karlak ah cun an pa nih cun an nu cu moto Accident fak tukin a thi tiah a rak ti hna i vuinak zong cu an rak tuah.

An tuah cuahmah lio ah cun an nu cu a va phan. An pa nih cun a hmuh i a lau tuk. Ka palh tuk ka ngaithiam tiah ngeihthiam a hal len nain an nu nih cun a duh hlei lo i police a chawnh hna i a tleih ter hna. A pasal nih cun cu ti i a tuahnak ruang cu mipi dang sinah kal ai timh caah a si tiah a chim i sinain a chimmi cu a si lonak kong cu a chim i a pasal cu a nu pi thah timh ruangah kum 9 chung thongtla dingin a kong ceih a si.

Be the first to comment

Leave a Reply

Your email address will not be published.


*