THILPEK SUNGLAWI BIK CEM

THILPEK SUNGLAWI BIK CEM

1. BIBLE CATHIANG
BAWIPA PATHIAN nih hmuhkhawh in a kan pekmi lakah a sunglawi bik cem cu Bible hi a si. BAWIPA PATHIAN nih, van le vawlei, nika thlapa le arfi hna le sermi thil tampi hna hi niruk chungah a ser dih ko hna. Sihmanhselaw kan Bible Uk 66 a kan pek khawhnak ding caah kum tampi, kum a thongthong in a rau i, PATHIAN mi tampi hna nih nunnak pekin an kilven i tangka tamtuk hrinhran an pek i caan tamtuk hringhran an pek hnu ceo ah kan nih Laiholh hna in kan hmuh khawh ve mi hi a si.

Kan Bible hi zeitluk indah a man a fah i a har mu. Na inn le na lo, na suithi le na hlawn, na motor te hna nak in a man a faak deuh. Na nu le na pa, na nupi le na va, na fanu le na fapa hna nakin aman a faak deuh. Bible aman hi tuak khawh a si lo. Cucaah na Bible cungah na Mobile te hna, na mithmaan te hna le thildang thilri hna kha chia ti hna hlah. A cungbik ah chia peng cang. Hi kan Bible Cathiang hi; Enok,
Noah, Abraham, Isak, Jakob le Josep te hna nih an rak rel khawh lomi a si.

2. THIANG THLARAU
BAWIPA PATHIAN nih hmuh khawh lo in a kan pekmi lakah a sunglawi bik cem cu a THIANG THLARAU hi a si. THIANG THLARAU kan co cio khawhnak ding caah, Saram thisen, Profet hna thisen, lamkaltu hna thisen le minung vialte hna thisen zong nih a man a pe kho lo. FAPA Thisen, BAWIPA JESUH KHRIH Thisen thawng lawnglawngin kan hmuh khawhmi a si.

BAWIPA PATHIAN nih a kan pekmi vialte lakah a Sunglawi bik cem le a man a faak bik cem zong THIANG THLARAU hi a si. Cucaah kan herh bik cem zong THIANG THLARAU hi a si.
Bible Cathiang hi um in THIANG THLARAU hi kan sinah um hlah selaw, PATHIAN phunglam cu kan theih lai nain, zulh khawhnak țhawnnak kan ngei lai lo, Hrințhannak kan hmu kho lai lo. PATHIAN Lung kan tong kho lai lo. Bible Cathiang a rak um hlan in THIANG THLARAU thawngin, Enok, Noah, Abraham, Isak le Jakob te hna nih PATHIAN an rak biak i a Lung an rak ton.

BAWIPA PATHIAN nih a kan pekmi vialte lakah a Sunglawi bik cem cu THIANG THLARAU hi a si i a pahnihnak cu Bible Cathiang hi a si.

Enok, Noah, Abraham, Isak le Jakob te hna le PATHIAN mi tampi nih an rel khawh lomi Bible Cathiang rel awk kan ngeihhlei hi zeitluk indah kan van a țhat! Cucaah; THIANG THLARAU a ngaihchiatter hlah law, Bible Cathiang hi rel loin um hin hlah. Na kalnak kipah na Bible Cathiang na ken ahcun, Bible a kilvengtu PATHIAN THAW, THLARAU nih an umpi peng lai.

BAWIPA nih Daihnak in pein Thluachuah in pe ko hna seh.

Lamkaltu
Tluang Lian (Martar)

Be the first to comment

Leave a Reply

Your email address will not be published.


*