U Maung Moe @ Moe Kyi cu tuzing June 17 suimilam 10 hrawngah meithal in an kah

Yangon, Sanchaung, Tantatar sangbawi U Maung Moe @ Moe Kyi cu tuzing June 17 suimilam 10 hrawngah meithal in a lu ah an kah tiah theih a si. U Maung Moe hi ralhrangbu nih rian an khinh mi a si, innchung ah a um lio ah an kah mi a si. A lu ah hma a pu i sii-inn ah zohkhenh lio a si tiah theih a si.

Ralhrangbu nih uknak an lak hnuin June 16 tiang Yangon khuapi chung veng/sang bawi a thi mi 8 an si cang. Nizaan June 16 zinglei ah Yangon, Hlaingtharyar No.13 sangbawi U Hla Oo panglong market pawngah meithal in an kah i a thi. A thi mi chungkhar hna hi ralhrangbu nih minung pakhat an thi ahcun kyat sing 5 kan bawmh tiin ralhrangbu thawngthanhnak Myaywaddy TV nih a thanh. The Chin Post

thawngpang dang relchap : Thantlang ah COVID-19 mizaw 8 hmuh an si, a zualhma an um lo
==============================
June 17, COVID-19 Emergency Response Committee, Thantlang (CERT) nih COVID-19 zawtnak check hram an thok, minung 20 check an si i 8 sin ah zawtnak hmuh an si nain a zualhma an um lo, tiah kan theih.

“Kanmah CERT nih Thantlang Baptist Church (TBC) ah siikhaan kan tuah i nihin kha kan lim. Kan lim hnu ah Dr. Hmuh Thang Clinic (siikhaan) um mizaw minung 20 kha kan check hna i minung 8 sin ah zawtnak hmuh a si. A zaw mi zong cu a zualhma an si lo,” tiah CERT Treasurer Sayama Chin Chin nih The Hakha Times ah a chim.

Atulio hi Mizoram in Thantlang ah a luut mi zong an um len. Cun, atulio COVID-19 boruak he pehtlai in felfai deuh in tawlrel a hau i rianrang ngai in Biaknaklei upa hna le Khuanu Khuapa i bawm in CERT zong kan dirh. Atu mizaw hna hi zeitindah kan tawlrel hna lai, ti mi tu cu a checktu siibawi nih cutin khatin a kan ti ning in tawlrel an si lai, ti zong a cunglei tuanvo ngeitu nih a chim fawn.

Myanmar ram ah COVID-19 hi dot thumnak (third wave) kan phan i a zual lei a panh ca ah Chinram hmun tampi ah COVID-19 zawtnak a karh cuahmah. Thantlang zong ah minung 8 sin in zawtnak hmuh a si cang. #Photo: Thantlang ah COVID-19 rak check bal lio photo. The Hakha Times

Be the first to comment

Leave a Reply

Your email address will not be published.


*